నా భార్యను బుజ్జగించాలి...లీవ్ ఇవ్వండి ఫ్లీజ్

ఇంట్లో శుభకార్యం ఉందనో.. ఒంట్లో బాగోలేదనో.. ఎదైనా అత్యవసర పరిస్థితి ఉందనో.. సాధారణంగా తాము పని చేసే చోట ఉద్యోగులు తమ పై అధికారులు లీవ్ అడుగుతూ ఉంటారు. పరిస్థితులను బట్టి పై అధికారులు కూడా సెలవులు మంజూరు చేస్తూ ఉంటారు. కొన్ని సార్లు చాలా సిల్లీ రీజన్లు చెబుతూ కూడా కొందరు లీవ్ అడుగుతూ ఉంటారు. అలాంటిదే ఉత్తర ప్రదేశ్‌లో చోటు చేసుకుంది. అలగిన తన భార్యను బుజ్జగించేందుకు లీవ్ అవ్వాలని ఓ కానిస్టేబుల్ ఉన్నతాధికారికి లెటర్ రాశారు. అది కాస్తా సోషల్ మీడియాలో వైరల్‌గా మారింది.

వివరాల్లోకి వెళితే.. ఉత్తర ప్రదేశ్‌కు చెందిన గౌరవ్ చౌదరి అనే వ్యక్తి 2016లో పోలీసు శాఖలో కానిస్టేబుల్‌గా విధుల్లోకి చేరారు. ప్రస్తుతం అతడు మహారాజ్గంజ్ జిల్లాలోని నౌత్వానా పోలీస్స్టేషన్ పరిధిలో డ్యూటీ చేస్తున్నాడు. గౌరవ్కు నెల రోజుల క్రితం అంటే.. గతేడాది డిసెంబర్లో వివాహం జరిగింది. ఆ తర్వాత ఆమెను పుట్టింట్లో వదిలేసి పెళ్లైన కొన్ని రోజులకే డ్యూటీలో జాయిన్ అయ్యారు. వెళ్తూ వెళ్తూ.. జనవరిలో తన మేనల్లుడి పుట్టినరోజు ఉండటంతో వారం రోజులు లీవ్ తీసుకొని వస్తానని చెప్పి ఆమెకు మాటిచ్చాడు. కానీ అంతకు ముందుగానే గౌరవ్‌పై భార్య చిరు కోపాన్ని ప్రదర్శించటం ప్రారంభించింది. తన ఫోన్కాల్స్కు స్పందించడం మానేసింది. ఒక వేళ ఫోన్ లిప్ట్ చేసినా.. తన తల్లికి ఇచ్చేది.

దీంతో అలిగిన తన భార్యను బుజ్జగించేందుకు తనకు లీవ్ కావాలని కానిస్టేబుల్ ఏఎస్పీని లీవ్ లేటర్ రాశారు. "పెళ్లై నెల రోజులు కాకముందే భార్యను వదిలి వచ్చినందుకు ఆమె నాపై అలిగింది. నేను ఫోన్ చేసినా ఎత్తటం లేదు. ఎత్తినా వాళ్ల అమ్మకు ఇచ్చి మాట్లాడమని చెబుతోంది. నాపై చాలా కోపంగా ఉంది. నేను ఆమెను బజ్జగించాలి. అందుకు నాకు సెలవులు కావాలి" అని ఏస్పీకి రాసిన లేఖలో కానిస్టేబులు గౌరవ్ వాపోయాడు.

తన బాధను వ్యక్తం చేస్తూ.. వారం రోజులు సెలవులు కావాలని కోరారు. అయితే కానిస్టేబుల్ బాధను అర్థం చేసుకొన్న ఏఎస్పీ అతీశ్ కుమార్ సింగ్.. అతడికి 5 రోజులు సెలవులు మంజూరు చేశారు. దీంతో ఆ కానిస్టేబుల్ హ్యాపీగా తన భార్య వద్దకు వెళ్లేందుకు సిద్ధమయ్యాడు. నేటి నుంచి అతడి సెలవులు అమల్లోకి రానున్నాయి. అయితే ఈ కానిస్టేబుల్ లీవ్ లెటర్ మాత్రం సోషల్ మీడియాలో తెగ ట్రెండ్ అవుతోంది. అలిగిన భార్యను బుజ్జగిచేందుకు కానిస్టేబుల్ రాసిన లీవ్ లెటర్‌పై నెటిజన్లు తమదైన శైలిలో స్పందిస్తున్నారు.