స్మగ్లర్ టాలెంట్ కు ఫిదా అయిన ఆనంద్ మహీంధ్రా

టాలెంట్ ఎక్కడుంటే వాటిపై స్పందించే నైజం ప్రముఖ పారిశ్రామికవేత ఆనంద్ మహీంద్రాది. తాజాాగా ఆయన ఓ స్మగ్లర్ టాలెంట్ కు ఫిధా అయ్యారు. ఇదిలావుంటే స్మగ్లర్ల క్రియేటివిటీ లెవల్స్ రోజురోజుకు మితిమీరిపోతున్నాయి. డ్రగ్స్, గంజాయి, బంగారం, విదేశీ కరెన్సీ ఇలా ఐటెం ఏదైనా ఊహకందని పద్ధతుల్లో తరలిస్తూ.. అవాక్కయ్యేలా చేస్తున్నారు. కళ్ల ముందే స్మగ్లింగ్ చేస్తున్నా ఎవ్వరికీ ఎలాంటి అనుమానం రాకుండా జాగ్రత్తపడుతున్నారు. ఇలా కూడా స్మగ్లింగ్ చేయొచ్చా అని ముక్కు మీద వేలేసుకునేలా రకరకాల పద్ధతులు పాటిస్తున్నారు. కాగా.. వాటిని ఎప్పటికప్పుడు పోలీసులు భగ్నం చేస్తున్నారనుకోండి. కానీ.. వారు పాటిస్తోన్న పద్ధతులు చూసి.. ప్రతీ ఒక్కరు అవాక్కవుతున్నారు. అయితే.. ఈ అవాక్కవుతున్న లిస్టులో మహీంద్రా గ్రూప్ ఛైర్మన్ ఆనంద్ మహీంద్రా కూడా చేరిపోయారు. సోమవారం రోజు కలకత్తాలో విదేశీ కరెన్సీని తరలిస్తూ దొరికిన ఓ స్మగ్లర్‌ వినూత్న ఆలోచనపై ఆనంద్ మహీంద్ర స్పందించారు. తన టాలెంట్‌ గురించి ట్వీట్ కూడా చేశారు.

కలకత్తా నుంచి బ్యాంకాక్ వెళ్తున్న ఓ ప్రయాణికుడు కస్టమ్స్ అధికారులకు ఏమాత్రం అనుమానం రాకుండా 33 లక్షల విలువ చేసే 40,000 వేల అమెరికన్ కరెన్సీని గుట్కా ప్యాకెట్స్‌లో దాచిపెట్టి కాటన్ బాక్స్‌లో పెట్టి ప్యాకింగ్ చేసి ఎయిర్పోర్ట్ దాటించే ప్రయత్నం చేశాడు. కస్టమ్స్ అధికారులకు అతని కదలికలపై అనుమానం రావడంతో వెంటనే అతన్ని అదుపులోకి తీసుకొని క్షుణ్ణంగా స్కానింగ్ చేయగా కరెన్సీ అక్రమ రవాణా వ్యవహారం కాస్త గుట్టురట్టు అయింది. అనంతరం కస్టమ్స్ అధికారులు ప్రయాణికుడిని అరెస్టు చేసి అతని వద్ద నుండి 40 వేల అమెరికన్ కరెన్సీని స్వాధీనం చేసుకున్నారు. అయితే.. ఈ స్మగ్లింగ్ ఐడియాపై ఆనంద్ మహీంద్రా ట్వీట్ చేయటం గమనార్హం.

ఇండియాలో వినూత్న ఆలోచనలకు ఎలాంటి కొదవా లేదు. అయితే.. ఈ స్మగ్లింగ్ చేస్తున్న వ్యక్తి తన క్రియేటివిటీని న్యాయబద్ధంగా ఉపాధి పొందే పనులపై, మంచి లక్ష్యాలపై పెడితే ఎంతో మంచి ఫలితాలు వస్తాయి. అంటూ ఆనంద్ మహీంద్రా ట్వీట్ చేశారు. కాగా.. ఆనంద్ మహీంద్రా చాలా విషయాలపై ట్విట్టర్ వేదికగా స్పందిస్తుంటారు. అందులో ప్రధానంగా క్రియేటివ్ ఆలోచనలతో ఏ పని చేసినా.. ఆనంద్ మహీంద్రా ట్వీట్ చేసి మరీ ప్రోత్సహిస్తుంటారు. ఆలోచన బాగా నచ్చితే.. వాళ్లకు మంచి మంచి అవకాశాలు కూడా ఇస్తుంటారు. మరీ.. ఈ స్మగ్లర్‌కు తన క్రియేటివిటీతో ఆయనను ఆకర్షించగలిగాడు కానీ.. అది మంచి పని చేసుంటే దశ తిరిగేదేమో..‍!