జనవరి 30, 31 తేదీల్లో దేశవ్యాప్తంగా సమ్మెకు బ్యాంకర్లు

బ్యాంకుల్లో పనులు ఉన్నవారు తమ పనులను వెంటనే చక్కబెట్టుకోండి. లేకుంటే అంతే. ఇధిలావుంటే ఉన్నట్లుండి బ్యాంక్ యూనియన్లు కీలక నిర్ణయం తీసుకున్నాయి. జనవరి 30, 31 తేదీల్లో దేశవ్యాప్తంగా సమ్మెకు దిగనున్నట్లు బ్యాంక్ ఉద్యోగ సంఘాల సమాఖ్య వెల్లడించింది. ఈ రెండ్రోజుల సమ్మెతో బ్యాంక్ కార్యకలాపాలకు తీవ్ర అంతరాయం ఏర్పడనుంది. అయితే జనవరి 30, 31 సోమ, మంగళవారాలు. అంతకుముందు రెండు రోజులు అంటే జనవరి 28,29 వరుసగా నాలుగో శనివారం, ఆదివారం కావడం వల్ల అప్పుడు కూడా బ్యాంకులు పనిచేయవు. దీంతో వరుసగా మొత్తం 4 రోజులు బ్యాంక్‌లు పనిచేయవన్నమాట. అందుకు ముందుగానే సిద్ధం కావాల్సి ఉంటుంది.

రెండ్రోజుల సమ్మెకు దిగనున్నట్లు బ్యాంక్ యూనియన్ల ఐక్య వేద యునైటెడ్ ఫోరమ్ ఆఫ్ బ్యాంక్ యూనియన్స్ తెలిపింది. ముంబయిలో జరిగిన సమావేశంలో ఈ నిర్ణయం తీసుకున్నారు. ముఖ్యంగా తమ డిమాండ్లను నెరవేర్చట్లేదని ఇలా సమ్మెకు పిలుపునిచ్చారు బ్యాంక్ ఉద్యోగులు. దీంతో దేశవ్యాప్తంగా బ్యాంక్ కార్యకలాపాలపై ప్రతికూల ప్రభావం పడనుంది. ఆ డిమాండ్లలో ముఖ్యంగా 5 రోజుల పనిదినాలు, NPS రద్దు, వేతన పెంపు సవరణలపై చర్చలకు ఆహ్వానించడం, వేకెన్సీ పోస్టులకు రిక్రూట్‌మెంట్ జరపడం వంటి డిమాండ్ల సాధన కోసమే ఈ సమ్మె నిర్వహిస్తున్నట్లు పేర్కొన్నారు ఆల్ ఇండియా బ్యాంక్ ఎంప్లాయీస్ అసోసియేషన్ జనరల్ సెక్రటరీ సీహెచ్ వెంకటాచలం. దీని గురించి ఎన్నో సార్లు లేఖలు రాసినప్పటికీ ఇండియన్ బ్యాంక్స్ అసోసియేషన్ (IBA) నుంచి ఎలాంటి స్పందన రాలేదని ఆయన తెలిపారు.

ఈ సమ్మె కారణంగా ఏటీఎం సర్వీసులపైనా ప్రభావం పడే అవకాశాలు కనిపిస్తున్నాయి. వారంలో 5 రోజుల పని మాత్రమే కాకుండా ఇంకా చాలా డిమాండ్లు ఉన్నాయని, దీర్ఘకాలంగా దీనికి పరిష్కారం లభించట్లేదని వెల్లడించారు వెంకటాచలం. నేషనల్ పెన్షన్ సిస్టమ్ రద్దు సహా వేతన సవరణ, నియామకాలు సకాలంలో పూర్తి చేయడం వంటి డిమాండ్లను నెరవేర్చట్లేదని ఆయన ఆరోపించారు.

బ్యాంకులు 4 రోజులు పనిచేయవు కనుక.. వాటికి అనుగుణంగా తమ తమ బ్యాంకు పనులు షెడ్యూల్ చేసుకోవడం, పూర్తి చేసుకోవడం గురించి ఆలోచించాలి. లేదంటే చిక్కులు తప్పకపోవచ్చు. అయితే సమ్మెకు ఇంకా 15 రోజుల సమయం ఉన్న నేపథ్యంలో ఆలోగా కేంద్రం ఏం చేస్తుందో చూడాలి. చర్చలకు పిలిచి సమస్య పరిష్కారానికి హామీ ఇస్తే.. సమ్మె విరమించుకునే అవకాశం ఉంటుంది. లేదంటే 4 రోజుల అంతరాయం తప్పదు. సాధారణంగా బ్యాంకులకు జనవరి నెలలో ఎక్కువ సెలవులే ఉన్నాయి. సంక్రాంతి పండగ, గణతంత్ర దినోత్సవం సహా రెండో, నాలుగో శనివారాలు, ఆదివారాలు బ్యాంకులు పనిచేయవన్న సంగతి తెలిసిందే. ఇప్పుడు సమ్మె దెబ్బకు ఆ సెలవుల సంఖ్య ఇంకా ఎక్కువైంది.