వార్డు మెంబర్‌గా కూడా గెలవలేని లోకేష్ పాదయాత్ర చేయడమా

వార్డు మెంబర్‌గా కూడా గెలవలేని నారా లోకేష్.. పాదయాత్ర చేయడం హాస్యాస్పదంగా ఉందని వైఎస్సార్ కాంగ్రెస్ పార్టీ నాయకురాలు, తెలుగు అకాడమీ ఛైర్‌పర్సన్ నందమూరి లక్ష్మీపార్వతి ఎద్దేవా చేశారు. ఈ మేరకు విశాఖపట్నంలో మంగళవారం లక్ష్మీపార్వతి మీడియాతో మాట్లాడుతూ.. న్యాయ వ్యవస్థపై ఎదురు దాడి చేసే తప్పుడు సంస్కృతికి ప్రధాన ప్రతిపక్షం తెరతీసిందన్నారు. 

గత టీడీపీ ప్రభుత్వ హయాంలో ఏపీ ఫైబర్ నెట్ స్కామ్‌లో దోపిడీకి పాల్పడ్డ వ్యక్తి.. ఇప్పుడు నీతిమంతుడిగా ప్రజల ముందుకు వస్తున్నారని లోకేష్‌పై లక్ష్మీపార్వతి తీవ్ర ఆరోపణలు చేశారు. కేంద్ర ప్రభుత్వం సీరియస్‌గా దృష్టి సారిస్తే లోకేష్‌కు జైలు శిక్ష ఖాయమన్నారు. సంస్కార హీనమైన మాటలు మాట్లాడుతున్న వాళ్లను చూస్తే వాళ్ల పుట్టుక అయినా సక్రమమైనదేనా అనే అనుమానం కలుగుతోందన్నారు.

చంద్రబాబునాయుడు 100 రూపాయలు చీర, పుచ్చిపోయిన కందిపప్పు ఇస్తామని పిలిచి అమాయక మహిళల ప్రాణాలు తీశారని లక్ష్మీపార్వతి ఆరోపించారు. టీడీపీ నాయకులకు అంబేడ్కర్ రాసిన రాజ్యాంగం కాకుండా.. వాళ్ళకు ప్రత్యేకమైనది ఏమైనా ఉందా అని ప్రశ్నించారు. ఎన్టీఆర్‌ను వెన్నుపోటు పొడిచినందుకు చంద్రబాబులో ఏమాత్రం పశ్చాత్తాపం లేదని ఆక్షేపించారు. నందమూరి బాలకృష్ణ హోస్ట్‌గా చేస్తున్న అన్‌స్టాపబుల్ ప్రోగ్రాంలో హంతకులు ఇద్దరు ఒకరినొకరు సమర్థించుకున్నట్లు అనిపించిందని దుయ్యబట్టారు.

రాష్ట్రంలో ప్రతిపక్ష పార్టీలు ప్రజా కంటకంగా మారాయని లక్ష్మీపార్వతి ఆక్షేపించారు. రియల్ ఎస్టేట్ వ్యాపారం కోసం తెచ్చిందే అమరావతి ఆత్మగౌరవ నినాదం అని ఆరోపించారు. ఇక, సీపీఐ నేతలు నారాయణ, రామకృష్ణ తమ పార్టీని చంద్రబాబుకు తాకట్టు పెట్టారని విమర్శించారు. చంద్రబాబు మనసు, శరీరం కుళ్లిపోయాయని.. ఎన్టీఆర్‌కు చేసిన మోసం, అన్యాయాలకు క్షోభించి క్షీణించిపోయే రోజులు ఆయనకు ఎంతో దూరంలో లేవన్నారు. సహవాస దోషంతో జనసేన పార్టీ అధినేత పవన్ కళ్యాణ్ కూడా తప్పుడు మార్గంలో పయనిస్తున్నారని విమర్శించారు.