కోడికూరతో వినూత్నంగా నిరసన,,, బళ్లారిలోని గిరిజన బాలుర వసతి గృహం విద్యార్థుల ఆందోెళన

 బళ్లారిలోని గిరిజన బాలుర వసతి గృహంలో ఓ ఆసక్తికర ఘటన చోటు చేసుకొంది. హాస్టల్‌లో చికెన్ రుచిగా వండలేదని విద్యార్థులు వినూత్న రీతిలో ఆందోళనకు దిగిన ఘటన కర్ణాటకలో చోటుచేసుకుంది. వివరాల్లోకి వెళితే.. బళ్లారిలోని గిరిజన బాలుర వసతి గృహంలో విద్యార్థుల కోసం బుధవారం మధ్యాహ్నం చికెన్ వండి పెట్టారు. అయితే, చికెన్ సరిగ్గా లేదని కొంత మంది విద్యార్థులు రాత్రి 10.30 గంటల సమయంలో కోడికూరతో వినూత్నంగా నిరసన చేపట్టారు. వేళపాళా లేకుండా తన ఇంటి ముందు ఆందోళన చేయడంతో తీవ్ర ఆగ్రహానికి గురైన డిప్యూటీ కలెక్టర్.. ఆ విద్యార్థులను లగేజ్‌తో ఇంటికి పంపించారు. తల్లిదండ్రులను తీసుకొచ్చిన తర్వాత విషయం చెప్పి హాస్టల్‌లోకి అనుమతించాలని ఆదేశించారు. గిరిజన సంక్షేమశాఖాధికారి ఆదేశాలతో 25 మంది విద్యార్థులను గురువారం బయటకు పంపించారు.

మరోవైపు, ఆందోళనలు తీవ్రతరం కాకుండా ముందు జాగ్రత్త చర్యల్లో భాగంగా బందోబస్తు ఏర్పాటు చేశారు. డిగ్రీ విద్యార్థుల కోసం ఏర్పాటుచేసిన హాస్టల్‌లో మొత్తం 300 మంది ఉన్నారు. గతంలో నెలకు ఓసారి చికెన్‌ వండిపెట్టాలని నిబంధన ఉండేది. ఇటీవల ప్రతి బుధవారం ఇవ్వాలని ప్రభుత్వం నుంచి ఆదేశాలు రావడంతో చికెన్‌ బుధవారం మధ్యాహ్నం వండిన చికెన్ సరిగా లేదని 25 మంది విద్యార్థులు భోజనం చేయలేదు. దీనిపై వార్డెన్‌ విచారణ చేయగా.. చికెన్‌ సరిగ్గా లేదని భోజనం చేయడం లేదు.. ఎమ్మార్వో వచ్చి పరిశీలించాలని డిమాండ్‌ చేశారు.

దీంతో ఆయన హాస్టల్‌కు వచ్చి భోజనం చేసి.. కొద్దిగా మసాల ఎక్కువైందని, ఈ రోజుతో సరిపెట్టుకోండని సర్ధిచెప్పారు. వచ్చే వారం నుంచి ఎలాంటి ఇబ్బంది లేకుండా చూస్తామని చెప్పినా విద్యార్థులు వినిపించుకోలేదు. రాత్రి సుమారు 10 గంటల సమయంలో రెండు బకెట్లలో కూర తీసుకుని డిప్యూటీ కలెక్టర్ నివాసం వద్దకు బయలుదేరారు. పలువురు అధికారులు, పోలీసులు నచ్చజెప్పినా వినలేదు. అడ్డుకుంటే పోలీస్‌ స్టేషన్‌ ముందే బైఠాయిస్తామని బెదిరించడంతో పోలీసులు వెనడుగు వేశారు.

రాత్రి 10.30 గంటల సమయంలో డీసీ నివాసం వద్ద నిరసన తెలపడంతో ఆయన విద్యార్థుల వద్దకు వచ్చి సమస్యలను తెలుసుకున్నారు. తల్లిదండ్రులు మీపై ఎంతో నమ్మకంతో వసతిగృహంలో ఉంచి చదివిస్తున్నారు. వేళాపాళా లేకుండా ఇంటి వద్దకు వచ్చి ఆందోళన చేయడం సరికాదని... 300 మంది ఉండగా, కేవలం 25 మందికి మాత్రమే చికెన్‌ బాగలేదా? అని మందలించారు.

గిరిజన సంక్షేమ శాఖాధికారితో మాట్లాడి ఆందోళనకు దిగిన విద్యార్థులను గురువారం లగేజ్‌తో ఇంటికి పంపించేయమని, తల్లిదండ్రులతో వస్తే మాట్లాడిన తర్వాత మరోసారి అవకాశం ఇవ్వాలని గట్టిగా సూచించారు. దీంతో గురువారం ఉదయం వారిని బయటకు పంపించారు.