విధేయత గురించి కాకాణి మాట్లాడటం వింతగా ఉంది: కోటంరెడ్డి

విధేయత గురించి కాకాణి మాట్లాడటం వింతగా ఉందని నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి అన్నారు. ఇదిలావుంటే నెల్లూరు జిల్లాలో కోటంరెడ్డి వర్సెస్ మంత్రులు, వైఎస్సార్‌సీపీమధ్య వార్ నడుస్తోంది. తాజాగా మంత్రి కాకాణి గోవర్థన్ రెడ్డి తనపై చేసిన వ్యాఖ్యలకు ఎమ్మెల్యే కోటంరెడ్డి కౌంటర్ ఇచ్చారు. వైఎస్ కుటుంబంగురించి మాట్లాడే అర్హత కాకాణికి లేదని.. మౌనంగా నిష్క్రమిద్దాం అనుకుంటే అందరూ తనపై విమర్శలు చేస్తున్నారని మండిపడ్డారు. కోటంరెడ్డి శ్రీధర్‌రెడ్డి వైఎస్సార్‌సీపీకి వీర విధేయుడు కాదని కాకాణి చేసిన వ్యాఖ్యల్ని ప్రస్తావించారు.

అవును మంత్రి కాకాణి చెప్పింది నూటికి నూరు శాతం నిజమేనని.. తాను కష్టాల్లో నడిచిన వ్యక్తిని.. ఎక్కడ ఉంటే అక్కడ విధేయుడిగా ఉంటానే తప్ప పక్కదారులు చూసే మనిషిని కాదన్నారు కోటంరెడ్డి. బావా కాకాణి వైఎస్ కుటుంబానికి మీరు వీరవిధేయుడైతే.. పొదలకూరులో ఓదార్పు యాత్ర సమయంలో వైఎస్‌ విగ్రహాన్ని పెట్టేందుకు ఎందుకు అడ్డుకున్నారని ప్రశ్నించారు. కాకాణి విధేయత గురించి మాట్లాడుతుంటే జాలిగా ఉందన్నారు. తనను తిడితే ప్రభుత్వంలో పదవులు వస్తాయనుకొని విమర్శలు చేస్తున్నారని.. వైఎస్సార్‌సీపీలో ఉండి చంద్రబాబు కాళ్లకు దండం పెట్టింది కాకాణి కాదా అన్నారు. మంత్రి పదవిని ఇప్పించిన ప్రభుత్వ సలహాదారు సజ్జల రామకృష్ణారెడ్డిని విమర్శిస్తే కాకాణికి కోపం వచ్చినట్లుందన్నారు.

రాజకీయ జీవితం ఇచ్చిన ఆనంపై విమర్శలు చేయడం కాకాణికి ఎంతవరకు సబబన్నారు. అధికార పక్షం నుంచి ప్రతిపక్షానికి వద్దామనుకుంటే తనది నమ్మక ద్రోహమన్నారని.. మరి కాకాణి జెడ్పీ ఛైర్మన్‌ చేసి రాజకీయ మెట్టు ఎక్కించిన ఆనంకు వ్యతిరేకంగా మాట్లాడతారా అన్నారు. ఆనంను కాకాణి ఎంత క్షోభ పెట్టారో జిల్లా అంతటికి తెలుసన్నారు. నెల్లూరు కోర్టు చోరీ కేసులో అన్ని వేళ్లూ కాకాణి వైపు చూపిస్తున్నాయని.. ముందు ఆ కేసు సంగతి చూసుకోవాలన్నారు. నెల్లూరు జిల్లాకు వచ్చిన సీబీఐ సంగతి చూసుకోవాలని హితవు పలికారు. తనపై కిడ్నాప్ కేసు.. మర్డర్ కేసు పెట్టుకోవాలన్నారు. తనపై కేసులు పెడతామంటున్నారని.. కేసులతో భయపడతానని అనుకోవడం వారి అమాయకత్వమన్నారు. ఇష్టం వచ్చినట్టు మాట్లాడితే ఊరుకునేది లేదన్నారు.

తాను అధికారంలో ఉన్న వైఎస్సార్‌సీపీ నుంచి దూరంగా జరగాల్సిన పరిస్థితుల్లో మౌనంగా ప్రతిపక్షంలోకి వెళ్లాలనుకున్నట్లు చెప్పారు. పార్టీకి చెందినవాళ్లు తన వ్యక్తిత్వాన్ని శంకించే విధంగా మాట్లాడుతుంటే చూడలేక స్పందిస్తున్నట్లు చెప్పారు. తనకు బెదిరింపు కాల్స్‌ వచ్చినా భయపడటం లేదని.. తనను, తమ్ముడిని కొట్టేసుకుంటూ తీసుకెళ్తానని అనిల్ అనే వ్యక్తితో ఫోన్ చేయించారని.. అతడు సజ్జల కోటరీ నుంచే మాట్లాడినట్లు తనకు తెలిసిందన్నారు. అలాంటి ఫోన్‌ కాల్స్‌ తనకొస్తే.. నెల్లూరు రూరల్‌ నుంచి వీడియో కాల్స్‌ వస్తాయని సజ్జల గుర్తు పెట్టుకోవాలన్నారు. సలహాదారుగా ప్రభుత్వ పనులను మాసేసి ఆపరేషన్‌ నెల్లూరు రూరల్‌ అనే విధంగా సజ్జల వ్యవహరిస్తున్నారని ధ్వజమెత్తారు.