భూమా అఖిలప్రియ ఇంటివద్ద ఉద్రిక్తత

 మాజీ మంత్రి భూమా అఖిలప్రియను శనివారం ఆళ్లగడ్డలో పోలీసులు హౌస్‌ అరెస్టు చేశారు. నంద్యాల ఎమ్మెల్యే శిల్పా రవిచంద్రకిశోర్‌ రెడ్డి తమ కుటుంబంపై చేసిన ఆరోపణలను రుజువు చేయడానికి నంద్యాలలోని గాంధీ చౌక్‌ వద్దకు బహిరంగ చర్చకు రావాలని ఆమె సవాల్‌ విసిరిన నేపథ్యంలో ఇంటి నుంచి బయటకు వెళ్లకుండా అడ్డుకున్నారు. ఆళ్లగడ్డలో సుమారు 200 మంది పోలీసులు ఆమె ఇంటి వద్ద మోహరించారు. ఆళ్లగడ్డ, నంద్యాల నియోజకవర్గాల నుంచి టీడీపీ నాయకులు, శ్రేణులు రాకుండా పోలీసులు గ్రామాల్లో బందోబస్తు ఏర్పాటు చేశారు. కేసులు బనాయిస్తామని బెదిరించారు. పట్టణానికి వచ్చే కార్లను నిశితంగా తనిఖీ చేశారు. అఖిలప్రియ తన భర్త భార్గవరామ్‌ నాయుడు, తమ్ముడు భూమా విఖ్యాత్‌రెడ్డితో కలసి ఉదయం 10గంటలకు ఇంటి నుంచి బయటకు వచ్చారు. 30 యాక్ట్‌ అమలులో ఉన్నందున వెళ్లకూడదంటూ సీఐ జీవన్‌ గంగనాథ్‌బాబు ఆమెకు నోటీసు ఇచ్చారు. ఎమ్మెల్యేను ఆయన బంఽధువుల వివాహానికి వెళ్లనిచ్చారని, తనను మాత్రం బంధువుల పెళ్లిళ్లకు వెళ్లకుండా హౌస్‌ అరెస్టు చేసి పక్షపాతం చూపారని ఆమె ఆరోపించారు. ఆళ్లగడ్డ సీఐ ఇచ్చిన నోటీసును సవాల్‌ చేస్తూ అఖిలప్రియ శనివారం అత్యవసరంగా హైకోర్టును ఆశ్రయించారు. అఖిలప్రియ తరఫున ఆమె అనుచరుడు గుంటూరు జిల్లా తుళ్లూరు మండలం బోరుపాలెం గ్రామానికి చెందిన ఎల్‌ఏఎమ్‌ ప్రేమ్‌చంద్‌ హౌజ్‌ మోషన్‌ పిటిషన్‌ వేశారు. వాదనల అనంతరం న్యాయమూర్తి జస్టిస్‌ బీఎస్‌ భానుమతి వ్యాజ్యాన్ని డిస్పోజ్‌ చేస్తున్నట్లు ప్రకటించారు. ఈ నేపథ్యంలో ఆళ్లగడ్డలో అఖిలప్రియ ఇంటి వద్ద మోహరించిన పోలీసులు అక్కడి నుంచి వైదొలిగారు.