పరకామణి భవనంలో,,,ప్రారంభమైన లెక్కింపు

తిరుమల వెంకటేశ్వర స్వామికి వచ్చే కానుకల గురించి ప్రత్యేకించి చెప్పనక్కర్లేదు. తిరుమలలో మరో పరకామణిలో లెక్కింపు ప్రారంభమైంది. శ్రీవారికి భక్తులు సమర్పించిన హుండీ కానుకలను నూతన పరకామణి భవనంలో ఆదివారం ఉదయం నుంచి లెక్కించడం మొదలు పెట్టారు. తిరుమల శ్రీవారి ఆలయానికి సమీపంలో ఉన్న నూతన పరకామణి భవనంలో ఈవో ప్రత్యేక పూజలు నిర్వహించారు. నూతన పరకామణి భవనంలో వాస్తు హోమం, గోపూజ, శ్రీవారి చిత్రపటానికి ప్రత్యేక పూజలు నిర్వహించారు. శ్రీవారి ఆలయం నుంచి తీసుకుని వచ్చిన హుండీ కానుకలను వేరు చేయడం, లెక్కించడం ప్రక్రియను ప్రారంభించారు.

బెంగుళూరుకు చెందిన దాత మురళీకృష్ణ సహకారంతో నూతన పరకామణి భవనాన్ని అత్యాధునిక భద్రతతో ఏర్పాటుు చేసినట్లు తెలిపారు. గత ఏడాది సెప్టెంబర్ 28న రాష్ట్ర ముఖ్యమంత్రి వైఎస్ జగన్ నూతన పరకామణి భవనాన్ని ప్రారంభించినట్లు చెప్పారు. ఇందులో సీసీ కెమెరాలు, ఇతర మౌలిక వసతులు కల్పన పూర్తయినందున కానుకలను లెక్కించడం ప్రారంభించామన్నారు. ఇవాళ 12 హుండీలను శ్రీవారి ఆలయం నుంచి నూతన పరకామణికి తరలించి.. లెక్కింపు ప్రక్రియను ప్రారంభించామన్నారు. ముందస్తుగా హుండీ కానుకలను పరకామణికి తరలించేందుకు ట్రయల్ రన్ చేసి నేడు సక్సెస్ పుల్ తరలించాంమన్నారు.

తిరుమల శ్రీశ్రీశ్రీ పెద్ద జీయర్ స్వామి వారి ఆశీస్సులతో ఉదయం 5.30 గంటలకు శ్రీవారి ఆలయం నుండి 12 హుండీలు చిన్న లిఫ్ట్ సహాయంతో లారీలో తరలించినట్లు చెప్పారు. ఇకపై ప్రతిరోజు అన్ని హుండీలు నూతన పరకామణి భవనానికి చేరుకుంటాయన్నారు. నెల రోజుల తరువాత ఆలయంలోని పరకామణి మండపాన్ని భక్తులు కూర్చునేందుకు అనువుగా తీర్చిదిద్దనున్నట్లు ఈవో వివరించారు.

శ్రీవారి దర్శనార్శం తిరుమలకు విచ్చేసిన భక్తులు స్వామి వారికి సమర్పించే కానుకల లెక్కింపు స్వయంగా వీక్షించే విధంగా భవనంకు నలువైపులా అద్దాలు ఏర్పాటు చేసింది టీటీడీ. ఈ నూతన పరకామణి భవనంలో అన్ని సిబ్బందికి అవసరం అయ్యే అన్ని ఏర్పాట్లు కల్పించారు. సోమవారం నుంచి హుండీ కానుకలను నూతన పరకామణి భవనంలో లెక్కించేందుకు చర్యలు తీసుకున్నారు. శ్రీవారి ఆలయంలో ఉన్న పరకామణిలో భక్తులు కూర్చుని ధ్యానం చేసుకునేందుకు కేటాయించారు. ప్రతి రోజు దాదాపుగా 12 నుంచి 13 హుండీలు పరకామణికి వస్తాయి.. ఏ రోజుకు ఆ రోజు హుండీ కానుకలను లెక్కించే విధంగా చర్యలు తీసుకున్నారు. ప్రతి రోజూ 225 మంది సిబ్బంది పరకామణి విధులు నిర్వర్తించే విధంగా చర్యలు తీసుకున్నారు.

మరోవైపు తిరుమల ఆస్థాన మండపంలో యువ ధార్మిక సమ్మేళనం ప్రారంభమైంది. ఈ కార్యక్రమంలో ఆంధ్ర, తెలంగాణ, కర్ణాటక రాష్ట్రాల నుండి విచ్చేసిన దాదాపు 1600 మంది 10 నుండి 15 సంవత్సరాల లోపు పిల్లలు పాల్గొన్నారు. యువ ధార్మిక సమ్మేళనం ద్వారా యువత ఆధ్యాత్మికంగా ఉన్నతంగా జీవించవచ్చని అతిథులు తెలిపారు. ప్రతి ఒక్కరికి విద్య రావచ్చు గాని, సంస్కారం రాదని, సంస్కారం కలిగిన వ్యక్తి దేవుడు గురించి ఆలోచిస్తారన్నారు. వేదాలు, పురాణాలు, ఉపనిషత్తులు సంస్కారవతమైన జీవితాన్ని అలవర్చుకోవడానికి ఎంతగానో ఉపయోగపడతాయని వివరించారు.