వైసీపీ ఎమ్మెల్సీ అభ్యర్థిగా మాజీ మంత్రి రామసుబ్బారెడ్డిని దాదాపు ఖాయం

కడప జిల్లా నుంచి స్థానిక సంస్థల వైసీపీ ఎమ్మెల్సీ అభ్యర్థిగా మాజీ మంత్రి రామసుబ్బారెడ్డిని దాదాపు ఖాయం చేసినట్లు తెలుస్తోంది. సీఎం జగన్‌ నేతల దగ్గర ఈ అంశాన్ని ప్రస్తావించారు. రామసుబ్బారెడ్డి అభ్యర్థిత్వం గురించి ఎమ్మెల్యేలు, నేతలతో చెప్పారు. త్వరలోనే అధికారికంగా ప్రకటన చేస్తామని చెప్పారట.. సోషల్ మీడియాలో కూడా రామసుబ్బారెడ్డికి ఎమ్మెల్సీ ఖాయమని చర్చించుకుంటున్నారు. వైఎస్సార్‌సీపీ బలాన్ని బట్టి చూస్తే.. ఈ సీటు ఏకగ్రీవం కావడం పక్కా అంటున్నారు.

మాజీ మంత్రి రామసుబ్బారెడ్డి టీడీపీ నుంచి వైఎస్సార్‌సీపీలో చేరే సమయంలోనే జగన్‌ నుంచి పదవి ఇస్తామనే హామీ ఇచ్చినట్లు తెలుస్తోంది. జమ్మలమడుగు నియోజకవర్గానికి చెందిన రామసుబ్బారెడ్డి ఎమ్మెల్సీ పదవి ఇస్తే.. స్థానికంగా ఎమ్మెల్యే సుధీర్‌రెడ్డికి లైన్ క్లియర్ అవుతుందని భావిస్తున్నారట. రామసుబ్బారెడ్డి కూడా పార్టీ కార్యక్రమాల్లో చురుగ్గా పాల్గొంటున్నారు.

రామసుబ్బారెడ్డి ఎప్పటి నుంచో జమ్మలమడుగు నియోజకవర్గం టీడీపీలో కీలక నేతగా ఉన్నారు. 2014 ఎన్నికల తర్వాత నియోజకవర్గంలో రాజకీయ పరిస్థితులు మారిపోయాయి. రామసుబ్బారెడ్డి రాజకీయ ప్రత్యర్థి, వైఎస్సార్‌సీపీ నుంచి గెలిచిన ఆదినారాయణరెడ్డి అనూహ్యంగా టీడీపీలో చేరారు.. ఆయనకు మంత్రి పదవి కూడా దక్కింది. దీంతో చంద్రబాబు రామసుబ్బారెడ్డికి ఎమ్మెల్సీ పదవి ఇచ్చారు. 2019 ఎన్నికలకు ముందు చంద్రబాబు ఇద్దరు నేతల్ని పిలిచి మాట్లాడారు. జమ్మలమడుగు నుంచి రామసుబ్బారెడ్డి.. కడప లోక్‌సభ స్థానం నుంచి ఆదినారాయణ రెడ్డి పోటీ చేయగా ఓడిపోయారు. ఎన్నికల ఫలితాల తర్వాత మాజీ మంత్రి ఆదినారాయణ రెడ్డి టీడీపీకి గుడ్ బై చెప్పి బీజేపీలో చేరారు. ఆ తర్వాత రామసుబ్బారెడ్డి కూడా వైఎస్సార్‌సీపీలోకి వెళ్లారు. ఇప్పుడు ఎమ్మెల్సీగా అవకాశం ఇవ్వబోతున్నారు.

మరోవైపు కడపతో పాటూ మిగిలిన స్థానాల్లో కూడా ఎమ్మెల్సీ పదవుల ఎంపికపై అధిష్టానం కసరత్తు చేస్తోంది. చాలామంది ఆశావహుల పేర్లు తెరపైకి వస్తున్నా.. జిల్లాలవారీగా ఆయా సామాజిక సమీకరణాలను బట్టి ఎంపిక ఉంటుందని చెబుతున్నారు. త్వరలోనే అభ్యర్థుల్ని ప్రకటించే అవకాశం ఉండగా.. తొమ్మిది స్థానాలు వైఎస్సార్‌సీపీలో ఖాతాలోకి వెళ్లనున్నాయి.