ట్యూబెక్టమీ ఆపరేషన్ చేయించుకొందని మహిళను గెంటేసిన భర్త

ట్యూబెక్టమీ ఆపరేషన్ చేయించుకొందని ఓ మహిళను ఆమె భర్త గెంటేశాడు. ఈ గటన ఒడిశా రాష్ట్రంలో నెలకొంది. అప్పటికే పది మంది పిల్లలకు జన్మనిచ్చిన ఓ మహిళను ఆశా కార్యకర్తలు ఒప్పించి.. కుటుంబ నియంత్రణ శస్త్రచికిత్స చేయించారు. అర్థాకలితో పది మంది పిల్లలను పెంచడం కష్టంగా మారిన ఆ కుటుంబం దయనీయ స్థితిని గమనించి.. ఆమెను ఒప్పించారు. అయితే, ఈ విషయం తెలిసి భర్త శివాలెత్తిపోయాడు. ఆమెను ఇంటి నుంచి గెంటేశాడు. దీంతో ఆమె మూడు రోజులుగా తన పిల్లలతో రోడ్డుపైనే గడుపుతున్నారు. ఈ సంఘటన ఒడిశాలోని కేంఝర్‌ జిల్లా టెల్కోయి సమితి దిమిరియా గ్రామంలో చోటుచేసుకుంది. ఆధునిక కాలంలోనూ కొనసాగుతున్న విపరీత పోకడలకు అద్దం పడుతోంది.

వివరాల్లోకి వెళ్తే.. దిమిరియా గ్రామానికి చెందిన రవి దెహురి, జానకి దంపతులకు పద కొండేళ్ల కిందట వివాహం అయ్యింది. పది మంది పిల్లలు ఉండగా.. ఇటీవల మరో బిడ్డను ప్రసవించింది. అయితే, కాన్పు సమయంలో ఆ బిడ్డ చనిపోయాడు.పదకొండేళ్లకు 11 మంది పిల్లలను కంది. తరచూ గర్భం దాల్చుతుండడంతో ఆమె కూడా అనారోగ్యానికి గురయ్యారు. దీంతో స్థానిక ఆశా కార్యకర్తలు చొరవ తీసుకుని, ఆమెకు పరిస్థితిని వివరించారు. కుటుంబ నియంత్రణ చికిత్స చేయించుకుంటే మంచిదని నచ్చజెప్పారు. అందుకు అంగీకరించిన ఆమె ఇటీవల శస్త్రచికిత్స చేయించుకుని ఇంటికి వచ్చారు.

తన అనుమతి లేకుండా భార్య ట్యూబెక్టమీ ఆపరేషన్ చేయించుకోవడంతో భర్త రవి అగ్గిమీద గుగ్గిలమయ్యాడు. ఆమె ఇంట్లోకి రాకుండా అడ్డుకుని పితృ దేవతలకు పూజలు చేయడానికి అనర్హురాలివని బయటకు గెంటేశాడు. లోపలకు వస్తే చంపేస్తానంటూ ఇంటి ముందు ఆయుధాలు పట్టుకుని తిరుగుతున్నాడు. గత్యంతరం లేక ఆమె తన పిల్లలతో రోడ్డుపై ఉంటోంది. వారికి ఆశా కార్యకర్తలే ఆహారం సమకూర్చి ఆదుకున్నారు. వైద్య అధికారులు వచ్చి రవికి నచ్చజెప్పినా ఫలితం లేకపోయింది. తల్లీపిల్లలను సంరక్షణ కేంద్రానికి తరలించి రవిపై పోలీసులకు ఫిర్యాదు చేస్తామని అధికారులు చెప్పారు.

బాధితురాలు జానకి మాట్లాడుతూ.. ‘నా పిల్లలు పెరిగి పెద్దవాళ్లు అవుతున్నా నేను ఏటా గర్భం దాల్చడం చాలా ఇబ్బందిగా ఉంది... మా ఊళ్లోని చాలా మంది మహిళలు కుటుంబ నియంత్రణ శస్త్రచికిత్స చేయించుకోడానికి వెళ్లారు.. కానీ నా పరిస్థితిని భర్త అర్ధం చేసుకోకుండా ఇంటి నుంచి గెంటేశాడు’ అని వాపోయింది. భర్త రవి మాత్రం ‘మేము భుయాన్ కమ్యూనిటీకి చెందినవాళ్లం.. సమాజంలో ఉన్న నమ్మకం ప్రకారం ఆడవాళ్లకు ఆపరేషన్‌ చేస్తే నీళ్లు రావు.. అలాంటి ఆపరేషన్‌ను నేను తీవ్రంగా వ్యతిరేకిస్తున్నాను’ అన్నాడు.