అచ్చు మన సినిమా తరహాలో లండన్ లోనూ ఓ లేఖ

కొన్ని ఘటనలు వివిధ చోటు ఒకే తరహాలో జరుగుతుంటాయి. అలాంటిదో ఇపుడు లండన్ లో తాజాగా వెలుగులోకి వచ్చింది. సీతారామం సినిమాలో హీరోయిన్ రష్మికా మందన 20 ఏళ్ల కిందట రాసిన ఓ లేఖను తీసుకొని సంబంధిత వ్యక్తులకు అందజేసేందుకు వచ్చే సీన్ గుర్తుంది కదా.. ఇప్పుడు లండన్‌లోనూ ఇలాంటిదే ఓ ఘటన వెలుగులోకి వచ్చింది. ఓ మహిళకు ఫ్యామిలీ ఫ్రెండ్ రాసిన లెటర్ ఏకంగా వందేళ్ల తర్వాత వెలుగులోకి వచ్చింది. డెలివరీ అడ్రస్ వెతుక్కుంటూ వచ్చి ఆగిపోయింది. 1916లో బాత్ నుంచి లండన్‌కు పంపిన ఉత్తరం అది. శతాబ్దానికి పైగా ఆలస్యంగా, లండన్‌లోని మిలీనియల్ థియేటర్ డైరెక్టర్ అపార్ట్‌మెంట్‌కు వచ్చింది. ఆ అపార్ట్‌మెంట్‌ నిర్మాణానికి ముందు అక్కడ ఎవరు ఉండేవారు?

సౌత్ లండన్‌కు చెందిన నార్వుడ్ సొసైటీ ప్రకారం.. ఆ సమయంలో ప్రముఖ స్టాంప్ డీలర్ భార్య అయిన కేతి అనే మహిళ అక్కడ నివసించేవారు. ఆ ఉత్తరం ఆమెకు వచ్చిందే. సెలవుపై బాత్‌కు వెళ్లిన ఓ స్నేహితుడు ఆమెకు ఈ లేఖ రాశాడు. ‘మై డియర్ కేతి. చాలా తీవ్రమైన చలితో, ఇక్కడ నేను దయనీయంగా ఉన్నాను’ అంటూ లేఖలో కేతికి ఆ వ్యక్తి తెలిపాడు.

లేఖపై కింగ్ జార్జ్ -V స్టాంపు, బాత్ పోస్ట్‌మార్క్ ఉన్నాయి. ఆ లేఖ రాసిన తర్వాత సరిగ్గా ఏం జరిగి ఉంటుందనేది ఎవరికీ అంతుబట్టడం లేదు. సార్టింగ్ కార్యాలయంలో అది మిస్సై ఉండవచ్చునని హిస్టరీ మ్యాగజైన్ ఎడిటర్ స్టీఫెన్ ఆక్స్‌ఫర్డ్ అభిప్రాయపడ్డారు. ఆ తర్వాత కొన్నాళ్లకే సార్టింగ్ ఆఫీస్‌లో మరమ్మతు చర్యలు చేపట్టినట్లు తెలుస్తోంది. ఎవరైనా ఆ లేఖను దాచిపెట్టి మర్చిపోయి ఉండవచ్చు లేదా ఫర్నీచర్ వెనుక చిక్కుకుపోయి ఉండవచ్చు అని అధికారులు భావిస్తున్నారు.

మొత్తానికి అధికారులు ఆ లేఖను దాని చిరునామా ‘క్రిస్టల్ ప్యాలెస్’కు పంపించారు. 1916లో అదొక పెద్ద విక్టోరియన్ ఇల్లు. ఇప్పుడు, అక్కడ పెద్ద అపార్ట్‌మెంట్ ఉంది. ఆ భవనంలో నివాసం ఉంటున్న 27 ఏళ్ల ఫిన్లే గ్లెన్‌ ఆ లేఖను అందుకున్నాడు. తన భార్యతో కలిసి ఆ లేఖలోని విషయాలను అర్థం చేసుకునేందుకు ప్రయత్నిస్తున్నామని గ్లెన్ తెలిపాడు. ఆ లేఖకు సంబంధించి ఏవైనా సమాధానాలు దొరుకుతాయేమోనని వారు దాన్ని నార్వుడ్ సొసైటీకి అందజేశారు. ‘చాలా మందికి ఈ లేఖ గురించి చాలా ఆసక్తికరంగా ఉంది. దానికి కారణం ఏంటో నాకు తెలియదు’ అని గ్లెన్ వ్యాఖ్యానించాడు.

ఇతరులకు రాసిన లెటర్లను తెరవడం బ్రిటన్‌లో నేరం. అయితే, ఆ లేఖ చాలా పాతది కాబట్టి దాన్ని తెరవడం నేరం కాదని గ్లెన్ చెప్పాడు. ‘నేను ఒకవేళ నేరం చేసి ఉంటే, క్షమాపణ మాత్రమే చెప్పగలను’ అని గ్లెన్ వ్యాఖ్యానించాడు. ఆ లేఖ మిస్టరీ ఇంకా కొనసాగుతోంది.