రోడ్డు ప్రమాదంలో ఒక వ్యక్తి మృతి
Andhra Pradesh Telugu | Suryaa Desk | Published : Tue, Feb 21, 2023, 02:20 PM
శ్రీకాకుళం జిల్లా, జి.సిగడాం మండల పరిధి ఆనందపురం బ్రిడ్జి సమీపంలో సోమవారం ఉదయం జరిగిన రోడ్డు ప్రమాదంలో ఒక వ్యక్తి మృతి చెందాడు. వివరాల్లోకి వెళ్ళితే....... ఎచ్చెర్ల మండలం తమ్మినాయుడుపేటకు చెందిన సీపాన లోకనాథం(46) ఆదివారం సాయంత్రం జి.సిగడాం మండల పరిధి దవళపేటలో ఉన్న అత్తవారికి వ్యవసాయ పనులు సాయం చేసేందుకు వచ్చాడు. తిరిగి సోమవారం ఉదయం తన స్వగ్రామం తమ్మినాయుడుపేట ద్విచక్ర వాహనంపై బయలుదేరాడు. ఈ క్రమంలో ఆనందపురం బ్రిడ్జి వద్దకు వచ్చేసరికి పొందూరు వైపు నుంచి వస్తున్న ఓ ప్రైవేట్‌ కళాశాలకు చెందిన బస్సు ఢీకొనడంతో తలకు తీవ్రంగా గాయాలయ్యాయి. సమాచారం అందు కున్న ఎస్‌ఐ సామంతుల రామారావు సిబ్బందితో ఘటనా స్థలానికి చేరుకున్నారు. లోకనాథంను 108 వాహనంలో చికిత్స నిమిత్తం శ్రీకాకుళం సర్వజన ఆసుపత్రికి తరలించారు. అక్కడ చికిత్స పొందుతూ మృతి చెందాడు. కాగా లోకనాథం తాపీ మేస్త్రీగా పనిచేస్తూ కుటుంబాని పోషించుకుంటున్నాడు. ఇతనికి భార్య ధనలక్ష్మి, కుమార్తెలు లలిత, లీల ఉన్నారు. లోకనాథం మృతితో స్వగ్రామంతో పాటు అత్తవారి గ్రామంలో విషాదఛాయలు అలముకున్నాయి. భార్య ధనలక్ష్మి ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్టు ఎస్‌ఐ రామారావు తెలిపారు.
|
|