గరిష్ఠంగా ఏడాదికి రూ.2 కోట్లు ప్యాకేజీ,,,ఎయిర్ ఇండియాలో పైలట్ల నియామకాలు

పైలట్లకు గరిష్ఠంగా ఏడాదికి రూ.2 కోట్లు ప్యాకేజీ జీతం ఇచ్చేలా ఎయిర్ ఇండియా తాజాగా నిర్ణయం తీసుకొంది. దేశీయ అతిపెద్ద పౌర విమానయాన సంస్థ ఎయిర్‌ ఇండియా ఏడాది క్రితమే టాటా గ్రూప్ చేతికి వెళ్లింది. ఆ తర్వాత కీలక మార్పులకు నాంది పలికింది. ఇటీవలే ఏకంగా 470 అత్యాదునిక ప్యాసింజర్ విమానాల కొనుగోలు కోసం బోయింగ్, ఎయిర్ బస్ సంస్థలతో చారిత్రాత్మక ఒప్పందాన్ని కుదుర్చుకున్న విషయం తెలిసింది. ఈ క్రమంలో బోయింగ్, ఎయిర్ బస్‌ల నుంచి అందుకునే 470 విమానాలను నడిపించేందుకు వివిధ ర్యాంకులు,రోల్స్‌లో సిబ్బందిని నియమించుకునే ప్రక్రియను ప్రారంభించింది. ప్రస్తుతం ఎయిర్ ఇండియాలో 140 విమానాలకు సరిపడా సిబ్బంది ఉన్నారు. ఈ క్రమంలో అత్యాధునిక విమానాలను నడిపించే పైలట్లకు ఏకంగా ఏడాదికి రూ.2 కోట్ల వరకు ప్యాకేజీ ఇచ్చేందుకు సిద్ధమైనట్లు బిజినెస్ టుడే పేర్కొంది. బోయింగ్ బీ777 క్యాప్టెన్ కోసం రూ.2 కోట్లు వెచ్చించే అవకాశాలు ఉన్నాయని పేర్కొంది.

B737 NG/MAX నుంచి బోయింగ్ బీ777 విమానాల వరకు ఫస్ట్ ఆఫీసర్ రోల్స్ కోసం దరఖాస్తు ఆహ్వానిస్తున్నట్లు తెలిపింది ఎయిర్ ఇండియా. ఆయా విమానాల పైలట్లకు ఉన్నత స్థాయి నైపుణ్యాలు కలిగి ఉండాలని పేర్కొంది. ఈ మేరకు ఆసక్తి ఉన్న అభ్యర్థుల సాలరీ బ్రేకప్స్‌ని వెల్లడించింది. ఉన్నత స్థాయి ఉద్యోగానికి నెలకి 21,000 డాలర్లు చెల్లించేందుకు సిద్ధంగా ఉన్నట్లు పేర్కొంది. అంటే భారత కరెన్సీలో దీని విలువ నెలకి రూ. 17,39,118 గా ఉంటుంది. ఏడాది పరంగా చూసుకుంటే ఆ ఉద్యోగానికి రూ.2.08 కోట్లకుపైగానే ఉంటుంది.

విమానాల ఇండస్ట్రీలో నైపుణ్యవంతులైన పైలట్ల కొరత ఉండడం కారణంగానే ఆయా రోల్స్‌కి భారీ ప్యాకేజీలు ఇచ్చేందుకు ఎయిర్ ఇండియా సిద్ధమైనట్లు తెలుస్తోందని మార్టిన్ కన్సల్టింగ్ సంస్థ సీఈఓ మార్క్ మార్టిన్ పేర్కొన్నారు. ప్రత్యేక ఎయిర్ క్రాఫ్ట్స్‌లో 5000 నుంచి 7000 గంటల పాటు ప్రయాణించ గల సామర్థ్యం ఉన్న పైలట్లు ప్రస్తుతం భారీగా డిమాండ్ ఉందన్నారు. ప్రపంచ వ్యాప్తంగా పైలట్ల కొరత వేదిస్తోందని, అందుకే ఈ డిమాండ్ పెరుగుతున్నట్లు వివరించారు.

మరోవైపు.. ఎయిర్ ఇండియా కంపెనీ వెబ్‌సైట్‌లో పలు ఉద్యోగాలకు దరఖాస్తులు ఆహ్వానిస్తోంది. అందులో క్యాబిన్ క్రూ మెంబర్స్, గ్రౌండ్ స్టాఫ్, సెక్యూరిటీ, ఇతర టెక్నికల్ రోల్స్ ఉన్నాయి. అలాగే.. ఎయిర్ ఇండియా 470 అత్యాధునిక విమానాల కొనుగోలుతో భారత ఏవియేషన్ సెక్టార్‌లో కొత్తగా 2,00,000 ఉద్యోగాలు వస్తాయని బిజినెస్ టుడే గతంలోనే పేర్కొంది. ప్రస్తుతం ఎయిర్ ఇండియా వెబ్ సైట్‌లో కొత్త నియామకాలకు దరఖాస్తులు ఆహ్వానిస్తుండడం ఆ ట్రెండ్‌కి నాందిగా తెలుస్తోంది.

ఎయిర్ ఇండియా ఇటీవలే 470 అత్యాధునిక ప్యాసింజర్ విమానాల కొనుగోలుకు ఒప్పందం కుదుర్చుకుంది. అయితే, ఎయిర్ ఇండియా 2006 నుంచి కొత్త విమానాల కోసం ఎటువంటి ఆర్డర్ ఇవ్వకపోవడం గమనార్హం. కానీ 16 ఏళ్ల తర్వాత ఇంత భారీ స్థాయిలో ఆర్డర్ ఇచ్చింది.