వారు సమయాన్ని 99 శాతం సొంత ప్రయోజనాల కోసం వెచ్చిస్తారు...బాబా రామ్ దేవ్

అదానీ, అంబానీ, బిర్లాల కంటే తన సమయం చాలా విలువైందని యోగా గురువు బాబా రామ్‌దేవ్ ఆసక్తికర వ్యాఖ్యలు చేశారు. అంతేకాదు, పారిశ్రామికవేత్తలు 99 శాతం స్వప్రయోజనాల కోసమే వెచ్చిస్తారని, ఒక ప్రవక్త మాత్రం సమాజం మంచి కోసం సమయం వెచ్చిస్తారని బాబా రాందేవ్ అన్నారు. ఓ కార్యక్రమంలో పాల్గొనేందుకు ఆదివారం (ఫిబ్రవరి 19) గోవాకు వచ్చిన యోగా గురూ రామ్‌దేవ్ చేసిన వ్యాఖ్యలు వార్తల్లో ప్రముఖంగా నిలిచాయి. పనాజీలో నిర్వహించిన ఈ కార్యక్రమంలో గోవా ముఖ్యమంత్రి ప్రమోద్ సావంత్, కేంద్ర మంత్రి శ్రీపాద్ నాయక్ పాల్గొన్నారు. బాబా రామ్‌దేవ్ సహచరుడు ఆచార్య బాలకృష్ణను సన్మానించేందుకు ఈ కార్యక్రమం ఏర్పాటు చేశారు.

‘నేను హరిద్వార్ నుంచి మూడు రోజుల పాటు ఇక్కడికి వచ్చాను. అదానీ, అంబానీ, టాటా, బిర్లాల కంటే నా సమయం విలువ ఎక్కువ. కార్పొరేట్లు తమ సమయాన్ని 99 శాతం సొంత ప్రయోజనాల కోసం వెచ్చిస్తారు. ఒక జ్ఞాని (Seer) మాత్రం తన సమయాన్ని అందరి మంచి కోసం వెచ్చిస్తారు’ అని బాబా రామ్‌దేవ్ అన్నారు.

ఆచార్య బాలకృష్ణపై బాబా రాందేవ్ ప్రశంసలు కురిపించారు. పతంజలి కంపెనీని క్లిష్ట దశలో నుంచి ఈ ఆర్థిక సంవత్సరంలో 40,000 కోట్ల రూపాయల టర్నోవర్‌ ఇచ్చే స్థాయికి పునరుద్ధరించారని కొనియాడారు. ఆచార్య బాలకృష్ణ వృత్తిగత నైపుణ్యాలు, పారదర్శక, వ్యాపార నిర్వహణ, జవాబుదారీతనాన్ని ఆయన ప్రశంసించారు. పతంజలి లాంటి సామ్రాజ్యాలను సృష్టించడం ద్వారా భారతదేశాన్ని ‘పరమ వైభవశాలి’గా మార్చాలనే కలను సాధించవచ్చని రామ్‌దేవ్ పేర్కొన్నారు.

శనివారం జరిగిన ఓ కార్యక్రమంలో బాబా రాందేవ్ మాట్లాడుతూ.. దేశంలో క్యాన్సర్ కేసుల పెరుగుదలపై కీలక వ్యాఖ్యలు చేశారు. కోవిడ్ -19 మహమ్మారి తర్వాత దేశంలో క్యాన్సర్ కేసులు పెరుగుతున్నాయని ఆయన చెప్పారు. అయితే, వైద్య నిపుణులు ఈ రెండింటి మధ్య ఎలాంటి సంబంధం లేదని, క్యాన్సర్ కేసుల పెరుగుదల సాధారణ దృగ్విషయమేనని కొట్టి పడేస్తున్నారని ఆయన చెప్పుకొచ్చారు. ‘దేశంలో క్యాన్సర్ మహమ్మారి కోరలు చాస్తోంది. కోవిడ్-19 మహమ్మారి తర్వాత క్యాన్సర్ కేసులు బాగా పెరిగాయి. చాలా మంది ప్రజలు తమ కంటి చూపును, వినికిడి శక్తిని కూడా కోల్పోయారు’ అని బాబా రామ్‌దేవ్ అన్నారు. శనివారం గోవాలోని మిరామర్ బీచ్‌లో జరిగిన సభలో మాట్లాడుతూ ఆయన ఈ వ్యాఖ్యలు చేశారు. వేదికపై రాందేవ్‌తో పాటు సీఎం ప్రమోద్ సావంత్ కూడా ఉన్నారు. ఫిబ్రవరి 2న రాజస్థాన్‌లోని బార్మర్ జిల్లాలో జరిగిన బాబాల సమావేశంలో ముస్లింలు ఉగ్రవాదాన్ని ఆశ్రయిస్తున్నారని, హిందూ మహిళలను అపహరిస్తున్నారని ఆరోపించారు. రామ్‌దేవ్ చేసిన వ్యాఖ్యలు దుమారం రేపాయి. పతంజలి వ్యవస్థాపకుడు దేశంలో రెండు వర్గాల మధ్య శత్రుత్వాన్ని పెంచే విధంగా వ్యాఖ్యలు చేశారంటూ ఆయనపై ఫిర్యాదు చేయగా.. ఎఫ్‌ఐఆర్ నమోదైంది.