ఆ కుక్క విశ్వాసంతోపాటు తెలివిని ప్రదర్శించింది

కుక్క అంటే విశ్వాసంగలది అని ఎవరైనా చెబుతారు. కానీ ఓ కుక్క తన యాజమానుల  పట్ల విశ్వాసాన్నే కాదు తెలివిగా ప్రవర్తించి వారి పిల్లలను కాపాడింది. శునకాలు కొన్నిసార్లు తమ తెలివితో అబ్బుర పరుస్తాయి. అలాంటిదే ఓ వీడియో ఇప్పుడు సోషల్ మీడియాలో వైరల్ అవుతోంది. వైరల్ అవుతున్న ఆ వీడియో క్లిప్‌లో.. ఇద్దరు చిన్నారులు బాల్ ఆడుకుంటుంటారు. ఇంతలో ఆ బాల్.. ఆ పక్కనే ఉన్న చిన్న నీటి కొలనులో పడిపోతుంది. ఆ బాల్‌ను పైకి తీసేందుకు ఏదో వస్తువును పట్టుకొచ్చేందుకు అమ్మాయి ఇంట్లోకి పరుగెత్తగా, అక్కడే ఉన్న అబ్బాయి.. నీటి కొలనులోకి వంగి బాల్‌ను అందుకునే ప్రయత్నం చేస్తాడు. అక్కడే ఉన్న పెంపుడు శునకం అది గమనించి బాలుడి వద్దకు పరుగెత్తుకొస్తుంది. బాలుడి జాకెట్‌ను నోట కరుచుకొని అతడిని వెనక్కి ఈడ్చుకొస్తుంది.

చివరన నెట్ కట్టి ఉన్న ఓ కర్ర అక్కడే ఓ మూలన ఉంటుంది. బాలుడిని ఓ చోట కూర్చోబెట్టిన శునకం.. నేరుగా ఆ కర్రను నోట కరుచుకొని వెళ్లి నీటిలో ఉన్న బాల్‌ను తెలివిగా నెట్‌లోకి వచ్చేలా చేసి బయటకు తీసుకొస్తుంది. ఆ తర్వాత ఆ బాల్‌ను తన నోటితో తీసుకొచ్చి బాలుడికి అందిస్తుంది..

ఆ శునకం తెలివి చూసి నెటిజన్లు ఆశ్చర్యం వ్యక్తం చేస్తున్నారు. ఆ సమయంలో అది అలా చేసుండకపోతే, బాలుడు నీటి కొలనులో పడి ప్రమాదానికి గురై ఉండేవాడు. ఈ నీటి మడుగులో నీళ్లు కూడా మురికిగా ఉండటం గమనార్హం. ఎక్కడ జరిగిందో తెలియదు గానీ.. ఈ ఘటనకు సంబంధించిన సీసీటీవీ వీడియో ఇప్పుడు వైరల్ అవుతోంది. ‘స్మార్ట్ డాగ్’ అంటూ ఆ శునకంపై నెటిజన్లు ప్రశంసల వర్షం కురిపిస్తున్నారు. ‘ఈ కుక్క చాలా మంది మనుషుల కంటే చాలా నయం’ అంటూ ఓ యూజర్ కామెంట్ పెట్టాడు. విశ్వాసానికి మారుపేరైన శునకాలు.. యజమాని కోసం ప్రాణాలు ఇచ్చేందుకు కూడా వెనుకాడవు. శిక్షణ ఇవ్వాలేగానీ, అద్భుతాలు చేస్తాయి. అందుకు ఈ వీడియోనే ఉదాహరణ.