తల్లిని నిర్లక్ష్యం చేసేవారికి గుణపాఠం నేర్పేలా.... ఏలూరు ట్రిబ్యునల్ సంచలన తీర్పు
Andhra Pradesh Telugu | Suryaa Desk | Published : Wed, Feb 22, 2023, 06:02 PM
తల్లిదండ్రులను నిర్లక్ష్యం చేసేవారికి గుణపాఠం నేర్పేలా ఏలూరు ట్రిబ్యునల్ సంచలన తీర్పు వెలువరించింది. వృద్ధాప్యంలో తల్లిదండ్రుల్ని నిర్లక్ష్యం చేసే పిల్లలకు ఇదొక గుణపాఠం. ఆస్తి లాక్కుని ఇంట్లో నుంచి గెంటేసే కొడుకులు, కోడళ్లకు ఇదో వార్నింగ్. పశ్చిమ గోదావరి జిల్లాలో వృద్ధాప్యంలో తల్లిని వేధిస్తున్న కొడుకు, కోడలు కేసులో కోర్టు సంచలన తీర్పు ఇచ్చింది. పుల్లూరి నాగమణి అనే వృద్ధురాలిని ఆమె కొడుకు వెంకన్న, కోడలు రేవతి వేధిస్తున్నారు. కనీసం ఆమె సంరక్షణ కూడా చూడలేదు. ఈ వ్యవహారంపై ట్రిబ్యునల్ కోర్టు విచారణ జిరిపింది. నాగమణి విషయంలో కొడుకు వెంకన్న, కోడలు రేవతి నిర్లక్ష్యం స్పష్టంగా కనిపించిందని.. కోర్టు తీర్పు వెల్లడించింది.
2007 పార్లమెంట్ యాక్ట్ ప్రకారం 2 వారాలు జైలు శిక్ష విధిస్తూ నరసాపురం సబ్ కలెక్టర్, సబ్ డివిజనల్ మేజిస్ట్రేట్ సూర్యతేజల ట్రిబ్యునల్ కోర్టు తీర్పు వెల్లడించింది. అలాగే కొడుకు పుల్లూరి వెంకన్న, కోడలు రేవతిలు ఉంటున్న ఇల్లు స్వాధీనం చేసి.. తల్లి నాగమణికి ఆ ఇల్లు అప్పగించాలని సూచించారు. ఆ ఇంట్లోని మరో పోర్షన్ అద్దెతో ఆమె జీవనం గడిపేలా ఆదేశాలు ఇచ్చారు. తల్లిదండ్రులను చూడాల్సిన బాధ్యతను ఎవరైనా పిల్లలు ఉల్లంఘిస్తే శిక్ష తప్పదని సబ్ కలెక్టర్ సూర్యతేజ హెచ్చరించారు.
|
|