జుట్టు పెట్టిన చిచ్చు... చివరి నిమిషంలో పెళ్లి క్యాన్సిల్

ఓ పెళ్లి రద్దుకు జుట్టు కారణమైంది. అమ్మాయికి జుట్టు తక్కువగా ఉందని చివరి నిమిషంలో పెళ్లి క్యాన్సిల్ చేసుకున్నాడు వరుడు. ఉత్తర ప్రదేశ్‌లోని అయోధ్య జిల్లా బీకాపూర్ గ్రామంలో ఈ ఘటన చోటు చేసుకుంది. పీటల మీది దాకా వచ్చిన పెళ్లి ఆగిపోవడంతో పెళ్లికుమార్తె బంధువులు పోలీసులను ఆశ్రయించారు. జుట్టు తక్కువ ఉన్న విషయం చెప్పకుండా మోసం చేసి పెళ్లి చేయాలని చూశారని వధువు తల్లిదండ్రుల మీద వరుడు ఫిర్యాదు చేశాడు. ఇరుపక్షాలు పోలీస్ స్టేషన్‌కు చేరుకొని రాత్రి వరకు సుదీర్ఘంగా చర్చలు జరిపారు. అయినా, ఆ అమ్మాయిని పెళ్లి చేసుకునేందుకు ఆ అబ్బాయి ససేమిరా అన్నాడు.

పెళ్లంటే వధూవరులు సంప్రదాయ బద్ధంగా మేకప్ అవుతారు. పెళ్లికుమార్తెలు సాధారణంగా వత్తైన జుట్టు ఉన్నా.. కృత్రిమ జుట్టుతో తమ జడను మరింత పొడవుగా అందంగా తీర్చిదిద్దుకుంటారు. మరి ఈ అబ్బాయికి వధువు జుట్టు తక్కువగా ఉందని, చివరి నిమిషంలో ఎలా తెలిసింది? పెళ్లి వేదిక వద్దకు వరుడు తన బంధువర్గంతో ఊరేగింపుగా బయల్దేరాడు. ఊరేగింపు వధువు గ్రామ సమీపానికి వచ్చింది. ఇంతలో వధువుకు జుట్టు తక్కువగా ఉందని, అబ్బాయి పెళ్లికి బాగానే ఒప్పుకున్నాడని.. కొంత మంది గుసగుసలాడటం మొదలుపెట్టారు. ఆ నోటా, ఈ నోటా ఆ విషయం అబ్బాయి చెవిన పడింది. వెంటనే అతడు తన తల్లిదండ్రులను వెంటబెట్టుకొని నేరుగా అమ్మాయి ఇంటికి వచ్చాడు. అమ్మాయిని పిలిచి జుట్టు గురించి నిలదీశాడు. అమ్మాయి తనకు జుట్టు తక్కువగానే ఉందని చెప్పింది. మనస్తాపానికి గురైన వరుడు.. ఈ పెళ్లి క్యాన్సిల్ అంటూ అక్కడ నుంచి వెళ్లిపోయాడు.

అదనపు కట్నం కోసమే అబ్బాయి కుటుంబం చివరి నిమిషంలో అనవసర రాద్ధాంతం చేసిందని, పెళ్లికి నిరాకరించిందని.. వధువు కుటుంబ సభ్యులు పోలీసులకు ఫిర్యాదు చేశారు. అబ్బాయి, అతడి తండ్రితో పాటు మరో 9 మంది బంధువులపై పోలీసులు కేసు నమెదు చేశారు. దీంతో ఈ ఘటన చర్చనీయాంశంగా మారింది.