ప్రణాలు తీస్తున్న సహజీవనాలు... తాజాగా మరో మహిళ బలి

సహజీవనం వ్యక్తులకు దారితీస్తున్న ఘటనలు ఇటీవల పెట్రేగిపోయాయి. దేశ రాజధాని ఢిల్లీలో మరో మహిళ ప్రియుడి చేతిలో ప్రాణాలు కోల్పోయింది. ఇటీవల కాలంలో ఢిల్లీలో ఇటువంటి ఘటనలు ఆందోళనకు గురిచేస్తున్నాయి. సహజీవనంలో ఉన్న ఓ 28 ఏళ్ల మహిళకు ప్రియుడు నిప్పంటించడంతో తీవ్ర గాయాలతో చికిత్స పొందుతూ ఆస్పత్రిలో కన్నుమూసింది. డ్రగ్స్ విషయంలో ఇద్దరి మధ్య గొడవ జరిగి, చివరకు ప్రియుడు ఆవేశంలో ఆమెపై టార్పిన్ ఆయిల్ పోసి నిప్పంటించాడని వాయువ్య ఢిల్లీలోని అమన్ విహార్ పోలీసులు తెలిపారు. పోలీసుల కథనం ప్రకారం... బల్బీర్ విహార్‌కు చెందిన మహిళ.. ఓ పాదరక్షల కంపెనీలో పనిచేస్తోంది. ఆమెకు ఇది వరకూ వివాహమై ఇద్దరు పిల్లలు ఉన్నారు. భర్తతో విడిపోయిన ఆమె.. మోహిత్‌ అనే వ్యక్తితో గత ఆరు సంవత్సరాల నుంచి సహజీవనం చేస్తోంది.

ఫిబ్రవరి 10 న రాత్రి ఇరువురి మధ్య గొడవ జరిగినట్టు కుటుంబసభ్యులు వెల్లడించారు. తన స్నేహితులతో కలిసి మోహిత్ డ్రగ్స్ తీసుకుని ఇంటికి రాగా.. ఈ విషయం తెలిసిన బాధితురాలు నిలదీసింది. దీంతో వాగ్వాదం జరిగి గొడవకు దారితీసిందని చెప్పారు. ఆవేశంతో ఇంటిలో ఉన్న టార్పిన్ ఆయిల్‌ను ఆమెపై పోసి మోహిత్ నిప్పటించాడు. ఈ ఘటనలో తీవ్రంగా గాయపడిన బాధితురాలిని చికిత్స కోసం ఎస్జీఎం ఆస్పత్రిలో చేర్పించారు. ఫిబ్రవరి 11న సమాచారం అందుకున్న పోలీసులు అక్కడకు చేరుకుని పరిశీలించారు.

తీవ్ర గాయాలతో ఉన్న ఆమె వాంగ్మూలం ఇచ్చే పరిస్థితిలో లేకపోవడంతో మెరుగైన వైద్యం కోసం సఫ్దర్జంగ్ ఆస్పత్రికి అక్కడ నుంచి ఎయిమ్స్‌కి తరలించారు. ఎయిమ్స్‌లో చికిత్స పొందుతూ బాధిత మహిళ సోమవారం మృతిచెందింది. భర్తను వదిలేసిన ఆమెకు ఇద్దరు పిల్లలు ఉండగా.. ఒకరి వివాహమైనట్టు పోలీసుల విచారణలో వెల్లడయ్యింది. ఇంకొకరు మాత్రం ఆమెతోనే ఉంటున్నారు. మాట్లాడలేని స్థితిలో ఉండటం వల్ల ఆమె నుంచి స్టేట్‌మెంట్ రికార్డు చేయలేకపోయామని, మృతదేహానికి పోస్ట్‌మార్టం నిర్వహించినట్టు పోలీసులు తెలిపారు.

కుటుంబసభ్యులు సమాచారం ఆధారంగా నిందితుడి మోహిత్‌పై హత్య కేసు నమోదుచేసి, అతడ్ని అరెస్ట్ చేశారు. ఢిల్లీలో శ్రద్ధా వాకర్ హత్య తర్వాత వరుస ఇలాంటి ఘటనలు చోటుచేసుకుంటున్న విషయం తెలిసిందే. నిక్కీ యాదవ్‌ను ఆమె ప్రియుడు హత్యచేసి శవాన్ని ఫ్రిజ్‌లో దాచిపెట్టిన ఘటన వాలంటైన్స్ డే రోజు వెలుగులోకి వచ్చింది.