విశాఖపట్టణం జిల్లాలో గుర్తు తెలియని యువతి హత్య

విశాఖపట్టణం జిల్లా, యర్రవరం సమీపంలో జాతీయ రహదారి పక్కన పొదల్లో గత నెల 22వ తేదీన ఒక మహిళ మృతదేహాన్ని స్థానికులు గుర్తించిన విషయం తెలిసిందే. సమాచారం అందుకున్న పోలీసు ఉన్నతాధికారులు సంఘటనా స్థలానికి చేరుకుని క్షుణ్ణంగా పరిశీలించారు. మృతదేహం ఆనవాళ్లనుబట్టి రెండు మూడు రోజుల క్రితం హత్య జరిగివుంటుందని, 30 ఏళ్ల హిజ్రాగా భావిస్తున్నామని సీఐ తెలిపారు. అనంతరం కేసు నమోదు చేసి దర్యాప్తు చేపట్టారు. హత్యకు గురైంది హిజ్రాగా భావించిన పోలీసులు ఎలమంచిలితోపాటు పాయకరావుపేట నుంచి అనకాపల్లి వరకు పలు ప్రాంతాల్లో వుంటున్న హిజ్రాలను ఆరా తీశారు. తమకు తెలిసిన వారెవరూ అదృశ్యం కాలేదని వారు చెప్పారు. ఇదిలావుండగా 20-22 వయసున్న గుర్తు తెలియని యువతి కొంతకాలం నుంచి పట్టణంలో తిరుగుతుండేదని, ఆమె తల్లిదండ్రులు లేకపోవడంతో తన మామ్మ వద్ద వుండేదని, యర్రవరం సమీపంలో మృతదేహం లభ్యంకావడానికి కొద్ది రోజుల ముందు నుంచి కనిపించడంలేదని కొంతమంది స్థానికులు పోలీసుల చెవిన వేసినట్టు తెలిసింది. అంతేకాక ఆ యువతి కొంతమంది యువకులతో సన్నిహితంగా వుండేదని చెప్పినట్టు సమాచారం. దీంతో హత్యకు గురైంది ఆ యువతే అయివుంటుందన్న కోణంలో పోలీసులు దర్యాపును ముమ్మరం చేసి, యువతితో సన్నిహితంగా వున్న యువకులను గుర్తించే పనిలో నిమగ్నమయ్యారు. ఇందులో భాగంగా కొంతమంది మంది యువకులను పోలీసు స్టేషన్‌కు రప్పించి పలు విధాలా ప్రశ్నించినట్టు స్థానికంగా చెప్పుకుంటున్నారు. అయితే పోలీసులు ఎవరినీ అదుపులోకి తీసుకోలేదని, యువకుల నుంచి వివరాలు సేకరించి పంపించేశారని తెలిసింది. యువతి హత్య కేసు మిస్టరీని పోలీసులు త్వరలోనే ఛేదిస్తారన్న నమ్మకం వుందని స్థానికులు ఆశాభావం వ్యక్తం చేస్తున్నారు.