'ఇందూ' కుట్రలో సుబ్బారెడ్డి భాగస్వామే,,,తెలంగాణ హైకోర్టు

'ఇందూ' కుట్రలో సుబ్బారెడ్డి భాగస్వామే అని తెలంగాణ రాష్ట్ర హైకోర్టు వ్యాఖ్యానించింది. ఇదిలావుంటే ఉమ్మడి రాష్ట్రంలో ఇందూ-గృహ నిర్మాణ మండలి ప్రాజెక్టుకు సంబంధించిన కుట్రలో.. అప్పటి ముఖ్యమంత్రి వై.ఎస్‌.రాజశేఖరరెడ్డి తోడల్లుడు వై.వి.సుబ్బారెడ్డి కూడా భాగస్వామేనని.. తెలంగాణ హైకోర్టుకు సీబీఐ వివరించింది. అర్హత లేని కంపెనీ హౌసింగ్‌ బోర్డు నుంచి ప్రాజెక్టు పొందిందని.. అలాంటి కంపెనీలో సుబ్బారెడ్డి వాటా పొందడం కుట్రలో భాగమేనని వాదించింది. జగన్‌ అక్రమాస్తుల వ్యవహారంలో.. ఇందూ-హౌసింగ్‌ బోర్డుకు సంబంధించి సీబీఐ నమోదు చేసిన కేసును కొట్టివేయాలంటూ.. వై.వీ.సుబ్బారెడ్డి హైకోర్టులో పిటిషన్‌ దాఖలు చేశారు. దీనిపై గతంలో వాదనలు విన్న తెలంగాణ హైకోర్టు.. తీర్పును వాయిదా వేసింది.

అనంతరం సుప్రీంకోర్టు వెలువరించిన తీర్పు ఈ కేసుకు వర్తిస్తుందంటూ దరఖాస్తు చేయడంతో.. శుక్రవారం హైకోర్టు సీజే ఉజ్జల్‌ భూయాన్‌ విచారణ చేపట్టారు. పిటిషనర్‌ తరఫు సీనియర్‌ న్యాయవాది కె.వివేక్‌రెడ్డి వాదనలు వినిపిస్తూ.. సుప్రీంకోర్టు ఇటీవల వెలువరించిన తీర్పు ప్రకారం అవినీతి నిరోధక చట్టం కింద కేసు నమోదు చేయాలంటే డిమాండ్‌ ఉండాలని.. ఇక్కడ వై.వి.సుబ్బారెడ్డిపై అలాంటి ఆరోపణలు లేవని కోర్టు దృష్టికి తీసుకొచ్చారు. ముడుపులు ఇవ్వడం.. తీసుకోవడం ఏవీ జరగలేదన్నారు. ప్రాజెక్టులో జాప్యం వల్ల ఇందూ శ్యాంప్రసాద్‌రెడ్డి బయటికి వెళుతుంటే.. ఆ వాటాను సుబ్బారెడ్డి కొన్నారని స్పష్టం చేశారు. సుబ్బారెడ్డికి వ్యతిరేకంగా ఒక్క సాక్షి కూడా వాంగ్మూలం ఇవ్వలేదని న్యాయస్థానం దృష్టికి తెచ్చారు.

సీబీఐ తరఫున ప్రత్యేక న్యాయవాది ఎం.నాగేంద్రన్‌ వాదనలు వినిపించారు. ఇందూ ప్రాజెక్ట్‌ను పొందే అర్హత వసంత ప్రాజెక్ట్స్‌కు లేదన్నారు. దాంట్లో సుబ్బారెడ్డి వాటా పొందడం కుట్రలో భాగమేనని వాదించారు. హౌసింగ్‌ బోర్డు భాగస్వామ్యంతో నిర్మించిన ప్రాజెక్టులో విల్లాలను.. తన కుటుంబ సభ్యులకు కేటాయించుకోవడం ప్రయోజనం పొందడమే అవుతుందన్నారు. ఈ ప్రాజెక్ట్స్‌లో సుబ్బారెడ్డి భాగస్వామి అయ్యాక.. ఇందూ ప్రాజెక్టుకు గృహ నిర్మాణ మండలి కూకట్‌పల్లిలో అదనంగా మరో 15 ఎకరాలను కేటాయించిందని.. సీబీఐ వెల్లడించింది. ఇరువురి వాదనలను విన్న హైకోర్టు ప్రధాన న్యాయమూర్తి.. తీర్పును వాయిదా వేశారు.