అలాంటి సమాజం ఆవిష్కృతం కావాలి: పవన్ కళ్యాణ్

మహిళలపై అఘాయిత్యాలు జరగని సమాజం ఆవిష్కృతం కావడానికి ప్రభుత్వాలు పకడ్బందీ చర్యలు చేపట్టాలని జనసేన అధినేత పవన్ కళ్యాణ్ ఆకాంక్షించారు. సృష్టిలో సగభాగం మహిళ అని, ప్రతి మనిషి జీవితంలో కీలకపాత్ర పోషించే ఆడపడుచులందరికీ అంతర్జాతీయ మహిళా దినోత్సవం సందర్భంగా శుభాకాంక్షలు తెలియజేస్తున్నట్లు పవన్ కళ్యాణ్ పేర్కొన్నారు. ఈ మేరకు జనసేనాని బుధవారం ఓ ప్రకటన విడుదల చేశారు. శక్తి స్వరూపిణి స్త్రీ.. బహుకృత రూపిణి స్త్రీ.. బహుముఖ ప్రజ్ఞాశాలి స్త్రీ.. మానవ సృష్టికి మూలకారిణి స్త్రీ.. ఇంతటి మహోన్నతమైన స్త్రీకి మనం ఏమిస్తే రుణం తీరుతుందని పవన్ కళ్యాణ్ భావోద్వేగం చెందారు. తల్లిగా.. తోబుట్టువుగా.. భార్యగా.. బిడ్డగా.. భిన్నరూపాలలో మన మధ్య ఉన్న స్త్రీమూర్తి సేవలు వెల కట్టలేనివన్నారు.

మహిళామణి లేని ఇల్లు దీపం లేని కోవెల వంటిదని.. ఇంతటి మహత్తరమైన వనితా లోకానికి మహిళా దినోత్సవ శుభాకాంక్షలు అని పవన్ కళ్యాణ్ అన్నారు. ఎక్కడ స్త్రీలు గౌరవించబడతారో అక్కడ దేవతలు కొలువై ఉంటారని మనం చెప్పుకొంటుంటామని.. అది అక్షరాలా సత్యమన్నారు. స్త్రీలను గౌరవించే చోట శాంతిసౌభాగ్యాలు విలసిల్లతాయని తాను ధృడంగా విశ్వసిస్తానని తెలిపారు. అయితే స్త్రీ సంపూర్ణ సాధికారిత సాధించడానికి, వారు స్వేచ్ఛగా జీవించడానికి సమాజం, ప్రభుత్వాలు ప్రత్యేక దృష్టి సారించాల్సి ఉందన్నారు.

స్త్రీ ఆర్థిక స్వావలంబనతో స్వశక్తిపై నిలబడాలన్నా, సాధికారిత సాధించాలన్నా చట్ట సభల్లో వారి సంఖ్యా బలం పెరగాల్సి ఉందని తాను ప్రగాఢంగా నమ్ముతానని పేర్కొన్నారు. చట్టసభల్లో మహిళలకు 33 శాతం రిజర్వేషన్ కల్పించాలని జనసేన డిమాండ్ చేయడంతో పాటు ఈ అంశాన్ని తమ పార్టీ ఎన్నికల ప్రణాళికలో పొందుపరిచిన విషయం ఆడపడుచులు అందరికీ విదితమే అన్నారు. ఈ దిశగా తన రాజకీయ ప్రయత్నం చిత్తశుద్ధితో కొనసాగుతుందని మీకు సవినయంగా విన్నవిస్తూ మహిళామణులందరికీ శుభాలు కలగాలని మనస్ఫూర్తిగా ఆకాంక్షిస్తున్నానని పవన్ కళ్యాణ్ పేర్కొన్నారు.