న్యూయార్క్‌లో ప్రమాదానికి గురైన ప్రదర్శన విమానం,,,భారత సంతతీ మహిళా మరణం

న్యూయార్క్‌లో జరిగిన చిన్న విమాన ప్రమాదంలో భారత సంతతికి చెందిన మహిళ చనిపోగా.. ఆమె కుమార్తెతో పాటు పైలట్ ఇన్‌స్ట్రక్టర్ గాయపడ్డారు. భారత సంతతికి చెందిన 63 ఏళ్ల రోమా గుప్తా, ఆమె కుమార్తె రీవా గుప్తా (33)లు ఆదివారం ఓ చిన్న విమానంలో ప్రయాణిస్తుండగా.. న్యూయార్క్‌లోని లాంగ్ ఐల్యాండ్ హోమ్స్ సమీపంలో కూలిపోయింది. కూలిపోవడానికి ముందు కాక్‌పీట్ నుంచి పొగలు వస్తున్నట్టు పైలట్ నివేదించినట్టు మీడియా కథనాలు పేర్కొన్నాయి. సింగిల్ ఇంజిన్ కలిగిన నాలుగు సీట్ల విమానం కూలిపోవడంతో మంటల్లో చిక్కుకుని రోమా మృతిచెందింది.

విమానం టేకాఫ్ అయిన రిపబ్లిక్ ఎయిర్‌పోర్ట్‌కు తిరిగొస్తుండగా ఈ ప్రమాదం చోటుచేసుకుంది. ప్రమాదంలో తీవ్రంగా గాయపడిన రీవా, పైలట్ ఇన్‌స్ట్రక్టర్ ప్రస్తుతం ఆస్పత్రిలో చికిత్స పొందుతున్నారు. ఘటన గురించి నార్త్ లిండెన్‌హురస్ట్ అగ్నిమాపక విభాగం చీఫ్ కెన్నీ స్టాల్లోన్ మాట్లాడుతూ.. విమాన ప్రమాదంలో ఇద్దరికి తీవ్ర గాయాలయ్యాయని, నాకున్న సమాచారం మేరకు స్థానికులు వారిని బయటకు తీశారని చెప్పారు. ప్రస్తుతం స్టోనో బ్రూక్ హాస్పిటల్‌లో రీవా గుప్తా చికిత్స పొందుతోంది. ఆమె మౌంట్ సినాయ్ సిస్టమ్‌లో ఫిజీషియన్ అసిస్టెంట్‌గా పనిచేస్తోంది.

డానీ వైజ్‌మాన్ ఫ్లైట్ స్కూల్ న్యాయవాది ఒలేహ్ డెకైలో మాట్లాడుతూ.. పైలట్‌కు నైపుణ్యం, అన్ని రేటింగ్‌‌‌లతో పాటు అవసరమైన సర్టిఫికెట్లు ఉన్నాయి.. ప్రమాదానికి గురైన విమానానికి గతవారం కేవలం రెండు కఠినమైన తనిఖీల తర్వాత ఎగరడానికి అనుమతి లభించింది అని అన్నారు. ‘‘ఇది ఒక ప్రదర్శన విమానం.. విమానం నడపే ఆసక్తి ఉన్నవారిని అందులో తీసుకెళ్తాం’ అని చెప్పారు.

పైలట్ టూరిస్ట్ విమానంలో ఉన్నాడని సఫోల్క్ కౌంటీ పోలీసులు తెలిపారు. సౌత్ షోర్ బీచ్‌ల మీదుగా విమానం వెళ్లినట్టు ఫ్లైట్ డేటా సూచిస్తోందని, పైలట్ క్యాబిన్‌లో పొగలు వస్తున్న విషయాన్ని రిపబ్లిక్ ఎయిర్‌పోర్ట్ ఎయిర్ ట్రాఫిక్ కంట్రోలర్‌‌కు నివేదించినట్టు చెప్పారు. ఈ ఘటనకు గల కారణాలపై జాతీయ రవాణా భద్రత బోర్డు దర్యాప్తు జరుపుతోంది. అలాగే, ఫెడరల్ ఏవియేషన్ అడ్మినిస్ట్రేషన్ సైతం విచారణకు ఆదేశించింది. ఫెడరల్ ఏవియేషన్ అధికారులు ఘటనా స్థలానికి మంగళవారం మరోసారి చేరుకుని, శిథిలాలను తొలగించి తదుపరి విశ్లేషణ నిర్వహించనున్నారు.