ఉత్తరాంధ్ర సమస్యలపై ఉద్యమిస్తా; దుప్పల

విశాఖ మహానగరాన్ని మినహాయిస్తే , ఉత్తరాంధ్ర అన్ని రంగాలలో అట్టడుగు స్థాయిలో వుందని గ్రాడ్యుయేట్స్ నియోజకవర్గం నుంచి ఇండిపెండెంట్ గా పోటీచేసిన దుప్పల రవీంద్రబాబు ఆవేదన వ్యక్తం చేశారు. ఉత్తరాంధ్ర వెనుకబాటుతనాన్ని మేధావి వర్గం దృష్టికి తీసుకువెళ్లడానికే, పోటీ చేశానని చెప్పారు. స్థానిక ఒక హోటల్లో బుధవారం మీడియా సమావేశం ఏర్పాటు చేసి, ఆయన మాట్లాడారు. తన అభిప్రాయాలు మంచి చర్చకు దారితీయడానికి మీడియా సహకరించిందని ప్రత్యేకంగా ధన్యవాదాలు తెలిపారు. పట్టభద్రులు సామాజికంగా చైతన్యవంతులని, సామాన్యులు నమ్ముతారని కానీ, ఈసారి చాలామంది ఆ నమ్మకాన్ని వమ్ము చేశారని రవీంద్రబాబు ఆవేదన వ్యక్తం చేశారు. కులం , ధనం , అధికారం ఈ ఎన్నికలలో కీలక పాత్ర పోషించడం, ప్రజాస్వామ్యానికి ప్రమాదసూచికలన్నారు. ఉత్తరాంధ్ర గురించి కేంద్ర , రాష్ట్ర ప్రభుత్వాలను నిలదీసే వ్యక్తి , శక్తి లేని స్థితిలో ఈ ప్రాంత ప్రజాప్రతినిధులు ఉన్నారని విమర్శించారు. ఉత్తరాంధ్రను కేంద్రం వెనుకబడిన ప్రాంతంగా గుర్తించి , మంజూరు చేస్తున్న నిధులు ఏమవుతున్నాయని, రాష్ట్ర ప్రభుత్వం ప్రత్యేక ప్రణాళిక రూపొందించిందా? అని ప్రశ్నించారు.

వలసల నివారణకు , ఐటిఐ, డిప్లొమా, డిగ్రీ చదివిన వారికి ఉపాధి అవకాశాలు లేని భారీ పరిశ్రమలకు రాయితీలు ఇవ్వడం సరికాదన్నారు. చిన్న పరిశ్రమలను ప్రోత్సహించాలని, నియోజకవర్గం యూనిట్ గా ప్రభుత్వ పారిశ్రామిక విధానం వుండాలని రవీంద్రబాబు డిమాండ్ చేశారు. ఉత్తరాంధ్ర వ్యవసాయ రంగం శరవేగంగా దిగజారిపోతుందని, సాగు భూములు రియల్ ఎస్టేట్లుగా మారిపోతున్నాయని, తన భూమిలోనే రైతు , కూలీగా బతికే స్థితి వచ్చిందన్నారు. సాగునీటి సదుపాయం వుంటే, భూమిని రైతు అమ్ముకోడని చెప్పారు. విశాలమైన సముద్ర తీరం ఉన్నా, విశాఖ-పారాదీప్ మధ్య ఫిషింగ్ హార్బర్ లేక, వీరావల్ వంటి ప్రాంతాలకు మత్స్యకార యువత వలసపోతున్నారని చెప్పారు. త్వరలో ఉత్తరాంధ్ర సమస్యలు - పరిష్కార మార్గాలు అనే అంశంపై చర్చావేదికలు నిర్వహిస్తామన్నారు. ఈ సమావేశానికి అధ్యక్షత వహించిన కవీ, జర్నలిస్టు నల్లి ధర్మారావు ముందుగా మాటాడుతూ, సిక్కోలు జల సాధన, సంరక్షణ సమితిని , ఉత్తరాంధ్ర సమితిగా విస్తరిస్తున్నట్టు చెప్పారు. దీనికి కన్వీనర్ గా రవీంద్రబాబు ఉంటారనీ, రిటైర్డ్ ఇరిగేషన్ ఇంజనీర్లు, ప్రొఫెసర్లు, రైతు సంఘాల ప్రతినిధులు , ఆసక్తి గల మేధావులతో పూర్తి కమిటీని త్వరలో ప్రకటిస్తామన్నారు.