కారులో నుంచి గురుగ్రామ్ రోడ్డలపై కరెన్సీ నోట్లు,,,వైరల్ కావడంతో కేసు నమోదుచేసిన పోలీసులు

సోషల్ మీడియా వచ్చాక అన్ని రకాల వీడియోలు వైరల్ కావడం.. నేరాలు చేసిన వారికి ఆ వీడియోల ద్వారా గుర్తించి శిక్షలు విధించడం ఇటీవల బాగా పెరిగిపోయింది. ఇదిలావుంటే రోడ్డుపై కారులో వెళ్తోన్న ఇద్దరు యువకులు.. అందులో నుంచి కరెన్సీ నోట్లను వెదజల్లిన ఓ వీడియో ప్రస్తుతం సోషల్ మీడియాలో చక్కర్లు కొడుతోంది. ఇటీవల విడుదలైన ఓ వెబ్‌ సీరిస్‌లోని సన్నివేశాన్ని తలపించే ఈ ఘటన హరియాణాలోని గురుగ్రామ్‌లో చోటుచేసుకుంది. ఈ వీడియో వైరల్‌ కావడంతో పోలీసులు రంగంలోకి దిగి.. యువకులు ఇద్దరిని అదుపులోకి తీసుకున్నారు. పలు సెక్షన్ల కింద వారిపై కేసు నమోదు చేశారు. గురుగ్రామ్‌లోని గోల్ఫ్‌ కోర్స్‌ రోడ్డులో ఓ కారు వెళ్తుండగా.. అందులోని ఇద్దరు యువకులు కూర్చుని ఉన్నారు.

వీరిలో ఒకరు వాహనం నడుపుతుండగా.. మరొకరు కారు వెనుకభాగంలో కూర్చుని డిక్కీ తెరిచి రోడ్లపై కరెన్సీ నోట్లు విసురుతుండటం వీడియోలో కనిపిస్తోంది. డబ్బులు విసురుతున్న యువకుడు.. తనను గుర్తుపట్టకుండా ముఖానికి కర్చీఫ్‌ అడ్డంగా కట్టుకున్నాడు. అయితే, ఢిల్లీకి చెందిన ఓ యూట్యూబర్‌ ఈ పని చేసినట్లు తెలుస్తోంది. ఇటీవల అమెజాన్ ప్రైమ్‌లో విడుదలైన ‘ఫర్జీ’ వెబ్‌ సీరిస్‌లో ఇటువంటి సన్నివేశం ఉంటుంది. కారులోంచి నకిలీ కరెన్సీ నోట్లను రహదారిపైకి విసురుతూ పోలీసుల నుంచి తప్పించుకునేందుకు ఇద్దరు వ్యక్తులు ప్రయత్నిస్తారు. ఇదే మాదిరిగా ఆ దృశ్యాన్ని అనుకరించే ప్రయత్నంలో ఈ ఇద్దరు యువకులు కరెన్సీ నోట్లను కారులో నుంచి కుమ్మరించి అడ్డంగా బుక్కయ్యారు. వీడియో వైరల్ కావడంతో పోలీసులు అదుపులోకి తీసుకున్నారు.

గురుగ్రామ్ డీఎల్ఎఫ్ ఏసీపీ వికాస్ కౌశిక్ మాట్లాడుతూ.. వీడియో సోషల్ మీడియాలో వైరల్ కావడంతో ఈ సంఘటన పోలీసుల దృష్టికి వచ్చిందని తెలిపారు. ఇద్దరు యువకులూ ఇటీవల విడుదలైన వెబ్-సిరీస్ ఫర్జీలోని ఓ సన్నివేశాన్ని అనుకరిస్తూ గోల్ఫ్ కోర్సు రోడ్డులో నోట్లు విసిరారని చెప్పారు. నిందితులపై పలు సెక్షన్ల కింద కేసు నమోదుచేశామని, ప్రధాని నిందితుడ్ని గుర్తించామని ఏసీపీ కౌశిక్ వివరించారు. నిందితులు జోర్వార్ సింగ్ కల్సీ, గురుప్రీత్ సింగ్‌లను అదుపులోకి తీసుకున్నట్టు వెల్లడించారు.

ఈ ఇద్దరూ కారులో నుంచి నోట్లు విసిరుతుండగా.. వెనుక బైక్‌‌పై నుంచి మరో ఇద్దరు యువకులు వీడియో తీశారని ఏసీపీ చెప్పారు. జోర్వార్ సింగ్ కల్సీ వద్ద కరెన్సీ నోట్లు లభ్యమయ్యాయని, వారు ఉపయోగించిన కారు స్వాధీనం చేసుకునే ప్రయత్నం చేస్తున్నట్టు తెలిపారు.