ఆ భార్య దగ్గర మూడు రోజులు.. ఈ భార్య దగ్గర మూడు రోజులు: గ్వాలియర్ కుటుంబ న్యాయస్థానం తీర్పు

భర్త విషయంంలో గొడవలు పడుతున్న సవతులకు న్యాయస్థానం ఎవరికి ఇబ్బంది లేకుండా విలక్షణమైన తీర్పు ఇచ్చింది. ఏ భార్యకు ఇబ్బంది కలగకుండా భర్తను సమానంగా విభజించి.. ఒక్కో భార్య దగ్గర వారంలో 3 రోజులు గడపాలని సదరు భర్తను ఆదేశించింది. అయితే, ఆదివారం మాత్రం ఆయన ఇష్టానికే వదిలేసింది. ఆ రోజున ఇద్దరు భార్యల్లో ఎవరితోనైనా ఉండవచ్చని వెల్లడించింది. ఇద్దరు భార్యలతో వారంలో సమానంగా మూడేసి రోజుల చొప్పున గడపాలంటూ మధ్యప్రదేశ్‌లోని గ్వాలియర్ కుటుంబ న్యాయస్థానం ఈ తీర్పును ఇచ్చింది.

వివరాల్లోకి వెళ్తే.. గ్వాలియర్‌కు చెందిన ఓ వ్యక్తి ప్రస్తుతం హరియాణాలోని బహుళజాతి కంపెనీలో సాఫ్ట్‌వేర్ ఇంజినీర్‌గా పనిచేస్తున్నాడు. అతడికి 2018లో గ్వాలియర్‌ ప్రాంతానికి చెందిన సీమ అనే మహిళతో మొదటి వివాహమైంది. పెళ్లైన ఏడాది తర్వాత వీరికి ఒక అబ్బాయి పుట్టాడు. అయితే, 2020లో కరోనా మహమ్మారి వ్యాప్తిలోకి రావడంతో దేశవ్యాప్తంగా లాక్‌డౌన్‌ విధించిన సమయంలో తన భార్య సీమ, కుమారుడ్ని పుట్టింటికి పంపించాడు. ఆ సమయంలో ఒంటరిగా ఉన్న ఇంజినీర్‌.. లాక్‌డౌన్ ఎత్తివేసిన తర్వాత భార్య లేకుండానే హరియాణాకు వెళ్లాడు.

ఈ క్రమంలో తన సంస్థలో పనిచేసే ఉద్యోగినికి దగ్గరయ్యాడు. ఆమెతో సంబంధం పెట్టుకుని, రెండో వివాహం చేసుకున్నాడు. ఆమెకు ఓ పాప పుట్టింది. అయితే, భర్త వచ్చి తనని తీసుకెళ్తాడని ఎదురుచూసిన సీమకు అతడి ప్రవర్తనపై అనుమానం వచ్చింది. ఓపిక నశించి.. హరియాణాకు వెళ్లడంతో అప్పుడే అసలు విషయం బయటపడింది. కంపెనీలో పనిచేసే మహిళను రెండో పెళ్లి చేసుకుని, బిడ్డను కన్నాడని తెలుసుకుని నిర్ఘాంతపోయింది. భర్తను నిలదీసిన సీమ.. అతడితో గొడవపడి గ్వాలియర్‌కు వచ్చేసింది. చివరకు న్యాయపోరాటం చేయాలని నిర్ణయించుకుంది.

తనకు న్యాయం చేయాలంటూ.. గ్వాలియర్‌లోని ఫ్యామిలీ కోర్టును ఆశ్రయించింది. 6 నెలల పాటు ఇరువురికీ కోర్టు నాలుగుసార్లు కౌన్సెలింగ్‌ ఇచ్చింది. తనకు, కుమారుడికి భర్త నుంచి తగిన ఆర్థిక సహాయం అందడం లేదని కోర్టుకు సీమ తెలియజేసింది. దీంతో వేరే మార్గం వెతకాలని సదరు భర్త పట్టుబట్టాడు. చివరకు ముగ్గురితో చర్చలు జరిపిన కౌన్సెలర్‌ హరీష్‌ దివాన్‌.. మధ్యే మార్గంగా సయోధ్య కుదిర్చారు. వారంలో మూడు రోజుల ఒక్కోక్కరి దగ్గర ఉండాలని, ఆదివారం ఒక్క రోజు మాత్రం ఆయన ఎవరిని ఇష్టపడితే అక్కడే ఉండొచ్చని స్పష్టం చేసింది. ఈ నిర్ణయాన్ని అతడి ఇద్దరు భార్యలు అంగీకరించడంత కథ సుఖాంతమయ్యింది. ఈ తీర్పు తర్వాత ఆ భర్త తన భార్యలిద్దరికీ గురుగ్రామ్‌లో చెరో ఫ్లాట్‌ కొనిచ్చాడు.