బీహార్ ఉప ముఖ్యమంత్రి తేజస్వీ యాదవ్ కు జన్మించిన కూతురు

బీహార్ ఉపముఖ్యమంత్రి, ఆర్జేడీ అగ్రనేత తేజస్వి యాదవ్ సతీమణి రాజశ్రీ యాదవ్.. పండంటి ఆడబిడ్డకు జన్మనిచ్చారు. తన బిడ్డను చేతుల్లో ఎత్తుకొని ఉన్న ఫోటోను తేజస్వి యాదవ్ సోషల్ మీడియాలో షేర్ చేస్తూ.. ‘ఈశ్వరుడు సంతోషించి పుత్రికారత్నం రూపంలో బహుమతి పంపాడు’ అని రాశారు. వీరి ప్రేమ బంధానికి గుర్తుగా కుమార్తె జన్మించడంతో ఆర్జేడీ కార్యకర్తలు కూడా హర్షం వ్యక్తం చేస్తూ శుభాకాంక్షలు చెబుతున్నారు. లాలూ ప్రసాద్ యాదవ్ కుమార్తె రోహిణి ఆచార్య సైతం తన సోదరుడు బిడ్డను ఎత్తుకున్న ఫోటోను షేర్ చేస్తూ శుభాకాంక్షలు తెలిపారు.

ఢిల్లీ ముఖ్యమంత్రి, ఆమ్ ఆద్మీ పార్టీ చీఫ్ అరవింద్ కేజ్రీవాల్.. తేజస్వీ యాదవ్‌కు అభినందనలు తెలుపుతూ ట్వీట్ చేశారు. ‘పవిత్ర నవరాత్రి రోజుల్లో మాతా రాణి ఈ రూపంలో ఆశీర్వదించారు. మీకు, మీ కుటుంబానికి అభినందనలు తేజస్వీ జీ. కుమార్తె రాణికి ప్రేమపూర్వక ఆశీర్వాదాలు. ఈశ్వరుడు మీ కుటుంబాన్ని ఎల్లప్పుడూ ఆనందంగా ఉంచుగాక’ అని ట్వీట్ చేశారు.

పెళ్లికి ముందు రాజశ్రీ యాదవ్ పేరు రాచెల్ గొడిన్హో ఆమె స్వస్థలం హర్యానాలోని రేవారీ. వారు క్రైస్తవ మతాన్ని అనుసరిస్తారు. రాచెల్ తన తల్లిదండ్రులతో కలిసి చిన్ననాటి నుంచి ఢిల్లీలోనే నివాసం ఉండేవారు. తేజస్వీ యాదవ్, రాచెల్.. ఢిల్లీలోని ఆర్కే పురమ్ ప్రాంతంలో ఉన్న ఢిల్లీ పబ్లిక్ స్కూల్‌లో చదివారు. నాటి నుంచే వారి మధ్య పరిచయం ఉంది. ఆ పరిచయం కాస్త ప్రేమగా మారింది. తేజస్వీ యాదవ్ క్రికెటర్‌గా తన కెరీర్‌ను ప్రారంభించిన సమయంలో రాచెల్‌తో డేటింగ్ చేశారు. అనంతరం ఇరువురూ తమ పెద్దల అనుమతితో 2021 డిసెంబర్ 9న వివాహం చేసుకున్నారు. పెళ్లి తర్వాత రాచెల్ తన పేరును రాజశ్రీ యాదవ్‌గా మార్చుకున్నారు.

తన భార్య, వివాహం గురించి తేజస్వీ గతంలో ఒకసారి మాట్లాడుతూ.. ‘నేను ఈ అమ్మాయితో డేటింగ్ చేస్తున్నాను. ఆమెను ఇష్టపడుతున్నాను. పెళ్లి చేసుకోవాలని భావిస్తున్నాను. అయితే, ఆమె క్రిస్టియన్.. అని మా నాన్న (లాలూ ప్రసాద్ యాదవ్)తో చెప్పాను. దానికి మా నాన్న స్పందిస్తూ.. ఇట్స్ ఓకే, నో ప్లాబ్లం అన్నారు. అంతే, మా పెళ్లి జరిగిపోయింది’ అని చెప్పారు.

బీహార్ ముఖ్యమంత్రి, జేడీయూ అధినేత నితీష్ కుమార్.. బీజేపీతో తెగతెంపులు చేసుకొని, ఆర్జేడీతో కలిసి ప్రభుత్వాన్ని ఏర్పాటు చేసిన సంగతి తెలిసిందే. ఈ కొత్త పొత్తులో భాగంగా తేజస్వీ యాదవ్‌కు డిప్యూటీ సీఎం పదవి దక్కింది. క్రికెట్ కెరీర్‌ను పక్కనబెట్టి రాజకీయ ప్రవేశం చేసిన తేజస్వీ యాదవ్.. తన తండ్రి లాలూ స్థాపించిన ఆర్జేడీకి అసలైన వారసుడిగా, పార్టీ బలోపేతానికి కృషి చేస్తున్నారు. గత అసెంబ్లీ ఎన్నికల్లో తమ పార్టీ అత్యధిక స్థానాల్లో విజయం సాధించేలా ముందుండి నడిపించారు. స్వల్ప తేడాతో ముఖ్యమంత్రి పీఠాన్ని చేజార్చుకున్నారు.