ఆరో తరగతి బాలికతో ఆర్టీసీ డ్రైవర్ అసభ్య ప్రవర్తన

చిన్నారులపై సమాజంలో లైంగిక వేధింపులు కొనసాగుతూనే ఉన్నాయి. దీంతో ఆడపిల్లలను బయటికి పంపించాలంటేనే తల్లిదండ్రులు వణికిపోయే పరిస్థితి ఉంది. ఆరో తరగతి చదువుతున్న ఓ బాలికను ఆమెకు తాత వయసుండే ఓ ఆర్టీసీ డ్రైవర్ వేధింపులకు గురిచేస్తున్నాడు. బస్సులో ప్రయాణించే సమయంలో బాలికతో వెకిలి వేషాలు వేస్తూ.. అసభ్యంగా ప్రవర్తిస్తున్నాడు. అమ్మాయికి బలవంతంగా ముద్దులు పెట్టి, అసభ్యంగా ప్రవర్తించి.. వాటిని ఫోటోలు తీశాడు. ఆ తర్వాత.. ఆ ఫోటోలు చూపిస్తే అందరూ ఆమెనే తిడతారని చెప్పి బెదిరింపులకు గురిచేస్తూ లైంగికంగా వేధిస్తున్నాడు. అభంశుభం తెలియని ఆ బాలిక.. ఆ వేధింపులు భరించలేక చివరికి తన తల్లికి తన గోడు చెప్పుకొని బోరుమంది. తిరుపతి జిల్లా శ్రీకాళహస్తి పరిధిలోని బుచ్చినాయుడు కండ్రిగలో ఈ ఘటన వెలుగులోకి వచ్చింది.

బుచ్చినాయుడు కండ్రిగలో ఆరో తరగతి చదువుతున్న బాలిక స్కూలుకు వెళ్లే క్రమంలో రోజూ శ్రీకాళహస్తి డిపోకు చెందిన ఆర్టీసీ బస్సులోనే ప్రయాణిస్తోంది. బస్సు డ్రైవర్ శ్రీనివాసులు (46 ఏళ్లు) గత కొన్ని రోజులుగా ఆ బాలికను వేధిస్తున్నాడు. మొదట్లో బాలిక భయపడి ఆ బాధను ఎవ్వరికీ చెప్పుకోలేదు. ఆ భయంతో నాలుగైదు రోజులు స్కూలుకు కూడా వెళ్లలేదు. స్కూల్‌కి వెళ్లాలని తల్లిదండ్రులు హెచ్చరించడంతో ఏం చేయాలో తెలియక తనలో తానే కుమిలిపోయింది. రోజురోజుకూ వేధింపులు తీవ్రం కావడంతో చివరికి ధైర్యం చేసి తన బాధను తల్లిదండ్రులకు చెప్పుకుంది.

అసలు విషయం తెలిశాక తల్లిదండ్రులు ఆగ్రహానికి గురయ్యారు. స్థానికులు, జనసేన కార్యకర్తలతో కలిసి, ఆర్టీసీ డ్రైవర్‌ను పట్టుకొని చితకబాదారు. అనంతరం అతడిని పోలీసులకు అప్పగించారు. ఇలాంటి డ్రైవర్లుంటే.. ఆడపిల్లలను బస్సుల్లో ఎలా పంపించాలని తల్లిదండ్రులు నిలదీస్తున్నారు.