నాలుగు గెలిచి ఎవరెస్టు శిఖరం ఎక్కినట్లు భావిస్తున్నారు
Andhra Pradesh Telugu | Suryaa Desk | Published : Sun, Apr 02, 2023, 06:48 PM
ఇటీవల జరిగిన 21 ఎమ్మెల్సీ సీట్లకు ఎన్నికలు జరిగితే 4 గెలిచారని, ఆ మాత్రానికే ఎవరెస్ట్ ఎక్కినట్టుగా భావిస్తున్నారని టిడిపిని ఉద్దేశించి వైసీపీ ఎమ్మెల్యే, మాజీ మంత్రి పేర్ని విమర్శలు గుప్పించారు. ఇక జన్మలో గెలుపు చూడలేరనే భావనతో సంబరాలు చేసుకుంటున్నారని టీడీపీపై వ్యంగ్యం ప్రదర్శించారు.
175 నియోజకవర్గాల్లో పోటీ చేసే దమ్ము టీడీపీకి ఉందా అని ప్రశ్నించారు. అసలు, 175 నియోజకవర్గాల్లో బరిలో దింపేందుకు అభ్యర్థులు ఉన్నారా? అని ప్రశ్నించారు. టీడీపీకి 38 నియోజకవర్గాల్లో అసలు అభ్యర్థులే లేరని అన్నారు. పదిమందిని కలుపుకుంటే కానీ పోటీ చేయలేని పరిస్థితి చంద్రబాబుది అని పేర్ని నాని ఎద్దేవా చేశారు. చంద్రబాబు తలకిందులుగా తపస్సు చేసినా, ఎంతమందిని పోగేసుకొచ్చినా జగన్ ను ఏమీ చేయలేరని ధీమా వ్యక్తం చేశారు.
"175 నియోజకవర్గాల్లో జనసేనకు ఎన్ని సీట్లు ఇస్తారు? బీజేపీలో ఉండి టీడీపీ జెండా మోస్తున్న వారికి ఎన్ని సీట్లు ఇస్తున్నారు?" అని నిలదీశారు. వై నాట్ పులివెందుల అంటున్నారని, అలాంటి వారందరికీ ఆహ్వానం పలుకుతున్నామని తెలిపారు. మరి చంద్రబాబు, పవన్ కు పులివెందులలో పోటీ చేసే దమ్ముందా? అని పేర్ని నాని సవాల్ విసిరారు. పులివెందులలో పోటీ చేస్తే మీరో, మేమో తేలిపోతుంది అని స్పష్టం చేశారు.
|
|