రేపటి నుంచి ‘మెగా సర్వే.... సజ్జల వెల్లడి

‘జగనన్నే మా భవిష్యత్తు’ కార్యక్రమానికి ఏర్పాట్లన్నీ పూర్తి చేశామని వైఎస్సార్‌ కాంగ్రెస్ పార్టీ ప్రధాన కార్యదర్శి సజ్జల రామకృష్ణారెడ్డి తెలిపారు. ఈ మేరకు తాడేపల్లిలోని వైసీపీ కార్యాలయంలో జరిగిన విలేకరుల సమావేశంలో సజ్జల రామకృష్ణా రెడ్డి మాట్లాడుతూ.. ఏప్రిల్ 7వ తేదీ నుంచి 7 లక్షల మంది వైసీపీ సైనికులు 14 రోజుల్లో (ఏప్రిల్ 7 నుంచి ఏప్రిల్ 20) రాష్ట్రంలోని 1.60 కోట్ల కుటుంబాలకు సంబంధించిన 5 కోట్ల మంది ప్రజలను కలిసి ‘మెగా సర్వే’ చేయనున్నట్లు తెలిపారు.

ఈ 7 లక్షల మంది కార్యకర్తల్లో కొత్తగా నియమితులైన గృహ సారథులు, గ్రామ, వార్డు సచివాలయ కన్వీనర్లు కూడా ఉంటారని సజ్జల రామకృష్ణారెడ్డి తెలిపారు. వీరు ఇంటింటికి తిరిగి ‘మెగా సర్వే’ నిర్వహిస్తారని పేర్కొన్నారు. ఈ సైనికులందరూ గత 3- 4 నెలలుగా వైసీపీ కేంద్ర కార్యాలయం, ప్రాంతీయ సమన్వయకర్తలతో పాటు ఎమ్మెల్యేలతో నేరుగా సంప్రదింపులు జరిపారని.. అలాగే, మండలాల వారీగా శిక్షణ కూడా పొందారని చెప్పారు.

వైసీపీ ప్రభుత్వం ప్రజలకు ఎన్నో సంక్షేమ పథకాలను అందజేస్తోందని.. కుల, మత, రాజకీయ పార్టీలతో సంబంధం లేకుండా లబ్ధిదారులకు సంక్షేమ పథకాల నిధులను నేరుగా వారి బ్యాంకు ఖాతాల్లోకి జమ చేస్తోందని సజ్జల రామకృష్ణారెడ్డి తెలిపారు. తద్వారా సంక్షేమ పథకాల అమలులో మధ్యవర్తులు, అవినీతికి తావు లేకుండా చేసిందన్నారు. కానీ, టీడీపీ హయాంలో పథకాలు అందాలంటే ప్రజలు జన్మభూమి కమిటీలకు లంచాలు ఇచ్చేవారని.. ఈ పరిస్థితిని వైసీపీ పూర్తిగా మార్చివేసిందని వివరించారు.

మన బడి నాడు - నేడు కార్యక్రమం ద్వారా జగనన్న ప్రభుత్వం ప్రభుత్వ పాఠశాలలను ప్రైవేట్ పాఠశాలలకు ధీటుగా తీర్చిదిద్దిందని సజ్జల రామకృష్ణారెడ్డి తెలిపారు. దీంతో పేద విద్యార్థులకు డిజిటల్ క్లాస్‌రూమ్‌లు, అధునాతన ట్యాబ్‌లు, మెరుగైన టాయిలెట్లు వంటి సౌకర్యాలు అందుబాటులోకి వచ్చాయని వివరించారు. ఇంగ్లిష్ మీడియం చదువులతో పిల్లల బంగారు భవిష్యత్తుకు బాటలు వేస్తోందన్నారు. అదే గత టీడీపీ హయాంలో ప్రభుత్వ పాఠశాల భవనాలు శిథిలావస్థకు చేరి కనీసం తాగు నీరు, టాయిలెట్ల ఉండేవి కావని వివరించారు. ఇక, రాష్ర్ట చరిత్రలో తొలిసారిగా బీసీలను సమాజానికి వెన్నుముకగా గుర్తించి వారికి రాజకీయాల్లో కీలక పదవులు ఇచ్చి సీఎం జగన్ చరిత్రను తిరగరాశారని పేర్కొన్నారు.

ఎస్సీ, ఎస్టీ, మైనారిటీల సంక్షేమ, ఆర్థిక పురోగతి కోసం ప్రభుత్వం అనేక సంక్షేమ పథకాలు అందిస్తోందని సజ్జల రామకృష్ణారెడ్డి పేర్కొన్నారు. కానీ గత టీడీపీ హయాంలో చంద్రబాబు ఎస్సీ, ఎస్టీలను కించపరుస్తూ.. ఎస్సీలు పుట్టాలని ఎవరు మాత్రం కోరుకుంటారని ఘోరంగా అవమానించారని పేర్కొన్నారు. చంద్రబాబు తన పాలనలో ఎస్సీ, ఎస్టీ, మైనారిటీలను ఆర్థికంగా, రాజకీయంగా అణచివేసి తీవ్రంగా వేధించారని తెలిపారు.

ఈ కార్యక్రమంలో భాగంగా వైసీపీ ప్రభుత్వంపై సంతృప్తి వ్యక్తం చేసిన ప్రజలకు సీఎం జగన్‌కు మద్దతు ఇస్తున్నట్లు ధ్రువీకరిస్తూ రసీదు ఇస్తారని సజ్జల తెలిపారు. అనంతరం ప్రజల అనుమతితో ‘జగనన్నే మా భవిష్యత్తు’ స్టిక్కర్లను ఇంటి తలుపు, సెల్‌ఫోన్‌లకు అతికించనున్నారని చెప్పారు. చివరగా ప్రజలు సీఎం జగన్‌కు తమ మద్దతును తెలిపేందుకు 82960-82960 నంబ‌ర్‌కు మిస్డ్ కాల్ ఇవ్వాలని కోరుతారని సజ్జల తెలిపారు.

రాష్ట్రంలోని 100 శాతం కుటుంబాలను రికార్డు స్థాయిలో 14 రోజుల్లో కవర్ చేయడం ఈ కార్యక్రమం ముఖ్య లక్ష్యమని సజ్జల రామకృష్ణారెడ్డి తెలిపారు. గత కొన్ని నెలలుగా రెట్టింపు అయిన పార్టీ క్యాడర్ మొత్తాన్ని యాక్టివేట్ చేసి, ఇంటింటికీ వెళ్లి సీఎం జగన్ ఎలా పనిచేశారో నేరుగా ప్రజలను అడిగి తెలుసుకుని, ఆయన సందేశాన్ని చివరి మైలు వరకు తీసుకెళ్లడమే ఈ కార్యక్రమం ముఖ్యఉద్దేశమని సజ్జల రామకృష్ణారెడ్డి వివరించారు.