కిడ్నాప్ డ్రామా ఆడి అడ్డంగా బుక్కయి మహిళా... చివరకు అలా

కొన్ని సందర్భాలో మనం వేసే పథకాలు బెడసికొడుతాయి. అలాంటి ఘటనే  దక్షిణాఫ్రికాలో చోటు చేసుకొంది. కిడ్నాప్ డ్రామా ఆడి భర్త నుంచి భారీ మొత్తంలో డబ్బు కోట్టేయడానికి ఫ్లాన్ చేసిన భారతీయ సంతతి మహిళ.. అడ్డంగా పోలీసులకు బుక్కయ్యింది. దక్షిణాఫ్రికాలో జరిగిన ఈ ఘటనలో 2 మిలియన్ రాండ్స్ (దాదాపు రూ.90 లక్షలు) కొట్టేయడానికి ప్లాన్ చేసిన భారతీయ సంతతికి చెందిన మహిళను పోలీసులు అరెస్ట్ చేశారు. తనను ఎవరో కిడ్నాప్ చేశారని భర్తకు ఫోన్ చేసిన మహిళ.. విడుదల చేయాలంటే 2 మిలియన్ రాండ్స్ డిమాండ్ చేస్తున్నారని ఫోన్ చేసి చెప్పింది. అయితే, చివరకు పీటర్‌మారిట్జ్‌బర్గ్ నగరంలోని ఓ హోటల్‌లో ఆమె ఉన్నట్టు గుర్తించిన పోలీసులు.. భర్త నుంచి డబ్బులు కొట్టేయడానికే ఈ ప్లాన్ వేసినట్టు గ్రహించారు.

నేషనల్ ప్రాసిక్యూటింగ్ అథారిటీ ప్రతినిధి నటాషా కారా మాట్లాడుతూ.. భారత సంతతికి చెందిన 47 ఏళ్ల ఫిరోజా బీ బీ జోసెఫ్‌పై అభియోగాలు మోపారని, జూన్ 7 వరకూ కోర్టు బెయిల్ మంజూరు చేసింది. మంగళవారం ఆమెను పోలీసులు అరెస్ట్ చేశారని చెప్పారు. సోమవారం నాడు జోసెఫ్ భర్తకు ఆమెను కిడ్నాప్ చేసినట్టు ఫోన్ కాల్ వచ్చిందని, విడిచిపెట్టాలంటే కొంత నగదు ఇవ్వాలని కోరారని పోలీస్ అధికార ప్రతినిధి కల్నల్ రోబర్ట్ నెటిషుండే అన్నారు. ఛార్జ్‌షీట్‌లో పేర్కొన్న వివరాల ప్రకారం 2 మిలిన్ రాండ్సు డిమాండ్ చేశారు. రెండోసారి ఓ వ్యక్తి ఫోన్ చేసి.. తాము అడిగినట్టు డబ్బు ఇవ్వకుండా నీ భార్యను చంపేస్తామని బెదిరించారని తెలిపారు.

దీనిపై విచారణ చేపట్టిన పోలీసులు.. ఫీనిక్స్ నుంచి 80 కిలోమీటర్ల దూరంలో ఉన్న పీటర్‌మారిట్జ్‌బర్గ్‌లోని ఒక కాసినోలో జోసెఫ్ ఉన్నట్టు సీసీటీవీ ఫుటేజీని పోలీసులు కనుగొన్నారు. మారుపేరుతో హోటల్‌లో గదిని అద్దెకు తీసుకున్న ఆమె.. బెడ్‌‌పై కూర్చుని బ్రేక్‌ఫాస్ట్ తింటుండగా పోలీసులు అక్కడకు వెళ్లడంతో గుట్టురట్టయ్యింది. కిడ్నాపర్లు తన నగలను ఎత్తుకెళ్లారని దబాయించింది. అయితే, అవన్నీ ఆమె దగ్గరే ఉన్నాయని పోలీసులు గుర్తించారు.