కత్తితో బైకర్‌ను బెదిరించిన గూడ్స్ వాహనం డ్రైవర్,,,అదుపులోకి తీసకొన్న పోలీసులు

బెంగళూరులోని రామ్‌మూర్తి నగర్‌లో గూడ్స్ వాహనం డ్రైవర్.. బైక్ రైడర్‌ను కత్తితో బెదిరించిన వీడియో వైరల్‌గా మారింది. దీనిపై నెటిజన్ల నుంచి విమర్శలు రావడంతో.. పోలీసులు రంగంలోకి దిగారు. ఆ డ్రైవర్‌ను అరెస్టు చేశారు. ఈ ఘటన శనివారం నాడు బెంగళూరులో జరిగింది. శనివారం రోజు గూడ్స్ వాహనం డ్రైవర్ రామ్మూర్తినగర్ బ్రిడ్జి దగ్గర మొబైల్ ఫోన్ మాట్లాడుకుంటూ డ్రైవింగ్ చేస్తున్నాడు. ఈ క్రమంలో అతని వాహనం.. కుడి వైపున వస్తున్న స్కూటర్‌ను ఢీకొట్టింది.

ద్విచక్రవాహనాన్ని ఢీకొట్టడంపై స్కూటర్‌ డ్రైవర్‌ ప్రకాశ్‌ అతన్ని ప్రశ్నించారు. ఆ సందర్భంగా డ్రైవర్‌ రోడ్డుపై తన వాహనాన్ని ఆపి.. కత్తి పట్టుకుని కిందకు దిగాడు. తనను ప్రశ్నించిన ప్రకాశ్‌ను బెదిరించాడు. వీరిద్దరి మధ్య జరిగిన వాగ్వాదాన్ని.. ప్రకాశ్ కుమారుడు వీడియో తీశాడు. దాన్ని బెంగళూరు పోలీసుల దృష్టికి తీసుకెళ్లాడు. వీడియో తోపాటు.. తమకు జరిగిన అనుభవాన్ని ట్వీట్ చేశారు. ‘‘ఈరోజు బెంగళూరులో ద్విచక్ర వాహనంపై వెళ్తున్నాము. ఈ సమయంలో.. ఓ డ్రైవర్ మొబైల్ ఫోన్ మాట్లాడుతూ మా స్కూటర్‌ను ఢీకొట్టాడు. స్కూటర్ వెనుక కూర్చున్న నాన్న.. ఇదేమని ప్రశ్నించగా.. ఆ సమయంలో ఆ డ్రైవర్ వాహనం దిగి మమ్మల్ని కత్తితో బెదిరించాడు’’ అని ట్వీట్ చేశాడు.

ఈ ట్వీట్‌ను గమనించిన బెంగళూరు పోలీసులు.. సదరు డ్రైవర్‌ను అదుపులోకి తీసుకున్నారు. బెంగళూరు పోలీసుల సోషల్ మీడియా ఖాతా ఈ విషయాన్ని వెల్లడించారు. "రోడ్డుపై జరిగిన సంఘటనలో.. ద్విచక్ర వాహనదారులకు గూడ్స్ వాహనం డ్రైవర్ కత్తిని చూపుతున్న వీడియో వైరల్ అవుతోంది. దీనికి సంబంధించి ఎఫ్ఐఆర్ నమోదు చేశాం. రామ్మూర్తి నగర్ పోలీసులు నిందితుడిని అరెస్టు చేశారు" అని ట్వీట్ చేశారు.