చిరుద్యోగి లీక్ తో. సోషల్ మీడియాలో అమెరికా రక్షణ రహస్యాలు

ఉక్రెయిన్..రష్యా మధ్య సాగిన యుద్దం గురించి యావత్తు ప్రపంచానికి తెలుసు. కానీ  ఆ యుద్దం వెనక దాగివున్న రహస్యాలు తెలుసా... అమెరికా రక్షణ శాఖకు చెందిన అత్యంత కీలకమైన రహస్యాలను, యుద్ధ ప్రణాళికలను లీక్‌ చేసిన 21 ఏళ్ల యువకుడ్ని అరెస్ట్ చేశారు. అతుడు అమెరికా ఎయిర్‌ నేషనల్‌ గార్డ్‌‌ జాక్‌ టెయిక్సిరా‌గా గుర్తించారు. మస్సాచుసెట్స్‌లోని అతడి నివాసంలో ఎఫ్‌బీఐ అధికారులు అదుపులోకి తీసుకొన్నారు. జాక్‌పై గూఢచర్యం అభియోగాలు నమోదుచేసిన పోలీసులు.. శుక్రవారం బోస్టన్‌లోని న్యాయస్థానం ఎదుట హాజరుపర్చనున్నారు. ఈ దశాబ్ద కాలంలో అమెరికాలో అతిపెద్ద భద్రతా రహస్యాల లీక్ ఇదే కావడంతో బైడెన్ యంత్రాంగానికి మింగుడుపడటం లేదు.

జాక్ టెయిక్సిరా మస్సాచుసెట్స్ 102 ఎయిర్‌ నేషనల్ గార్డ్‌ ఇంటెలిజెన్స్ విభాగంలో సైబర్ ట్రాన్స్‌పోర్ట్ సిస్టమ్స్ జర్నీమ్యాన్‌గా పనిచేస్తున్నాడు. 2019లో సర్వీసులో చేరిన జాక్.. కేప్‌కోడ్‌లోని ఒటిస్‌ వద్ద విధులు నిర్వహిస్తున్నాడు. చాలా చిన్న హోదాలో ఉండే వ్యక్తికి కీలక పత్రాలు ఎలా చిక్కాయో అంతుబట్టడం లేదు. అత్యంత కీలకమైన ఈ విభాగం నుంచే అమెరికా వాయుసేన దాడులకు ముందు డ్రోన్ల ద్వారా సమాచార సేకరిస్తారు. లేదా ఇరాక్‌, సిరియా వంటి చోట్ల అమెరికా పదాతి దళాలకు అవసరమైన సహాయక కార్యక్రమాలు కూడా దీని ద్వారా జరుగుతాయి.

అలాగే, అమెరికా సైన్యంలో అత్యంత రహస్య ఆపరేషన్లకు వెళ్లే బృందాలకు కూడా సహాయపడతారు. దీంతోపాటు నాటో జనరల్స్‌, ప్రపంచ వ్యాప్తంగా ఉన్న అమెరికన్‌ బ్యూరోక్రాట్లకు అవసరమైన సహకారం అందిస్తుంది. ఈ నేపథ్యంలో నేషనల్ గార్డ్ ఇంటెలిజెన్స్‌లో పనిచేసేవారికి అమెరికాలోని అత్యంత రహస్య పత్రాలను చూసే అవకాశం ఉంటుంది. వీటిల్లో మ్యాప్‌లు, విశ్లేషణ పత్రాలు వంటి ఉంటాయి. అమెరికా సైన్యంలోని 600 మందికిపైగా అధికారులకు టాప్‌ సీక్రెట్‌ క్లియరెన్స్‌లు ఉన్నాయి.

అదే సమయంలో వారి సహాయకులు, పెంటగాన్‌లో పనిచేసే చాలా మంది కల్నల్స్, యుద్ధనౌక కెప్టెన్లు, జూనియర్‌ ఆఫీసర్లు, ఇంటెలిజెన్స్‌ విభాగంలో పనిచేసే ఏజెంట్లకు ఇటువంటి క్లియరెన్స్‌లు లభించాయి. జాక్‌కు కూడా ఇలానే యాక్సెస్‌ లభించినట్లు తెలుస్తోంది. ‘అత్యంత కీలకమైన డాక్యుమెంట్‌లను జాతీయ గార్డు యూనిట్‌తో పంచుకోవడం దారుణం.. ఇది నిజంగా పెంటగాన్ వైఫల్యమే’అని ప్రెసిడెంట్స్ డైలీ బ్రీఫ్ మాజీ సీనియర్ ఎడిటర్ డెన్నిస్ వైల్డర్ అన్నారు.

అమెరికా రక్షణ రహస్యాలు మొదటిసారి మార్చి 1 న ‘డిస్కార్డ్‌’ అనే సోషల్‌ మీడియా వేదికపై కనిపించాయి. ఆ తర్వాత వీటి సంఖ్య మరింత పెరిగింది. డిస్కార్డ్‌ను ఎక్కువగా వీడియో గేమర్లు చాట్‌ రూమ్‌ల కోసం వినియోగిస్తుంటారు. వీటిల్లో మైన్‌క్రాఫ్ట్‌ అనే గేమ్‌ కోసం.. ఫిలిప్పినో యూట్యూబర్‌ కోసం ఏర్పాటు చేసిన చాట్‌ రూమ్‌ల్లో ఇవి ప్రత్యక్షం అయ్యాయి. ఆ తర్వాత మరింత విస్తరించాయి.

లీక్ తీవ్రతను తగ్గించడానికి అధ్యక్షుడు జో బైడెన్ ప్రయత్నించినప్పటికీ.. నిపుణులు, మాజీ అధికారులు ఇది ఉక్రెయిన్ యుద్ధం సంబంధించిన అంచనాలను మాత్రమే కాకుండా ప్రపంచవ్యాప్తంగా గూఢచర్యానికి పాల్పడుతుందనే అనే విషయాన్ని కూడా హైలైట్ చేసే భారీ లీక్ అని మండిపడుతున్నారు.