అవినాష్‌రెడ్డి విచారణ రేపటికి వాయిదా

మాజీ మంత్రి వైఎస్‌ వివేకానందరెడ్డి హత్య కేసులో  రోజుకో ట్విస్ట్ నెలకొంటోంది. తాజాగా ఈ కేసులో కడప వైఎస్సార్ కాంగ్రెస్ పార్టీ ఎంపీ వైఎస్ అవినాష్‌రెడ్డి సీబీఐ విచారణ మంగళవారానికి వాయిదా పడింది. మంగళవారం ఉదయం 10.30 గంటలకు మరోసారి విచారణకు రావాలని సీబీఐ అధికారులు కోరారు. ఈ మేరకు సీబీఐ అదనపు ఎస్పీ ముఖేశ్‌ శర్మ వాట్సాప్‌లో వైఎస్ అవినాష్‌ రెడ్డికి సీఆర్‌పీసీ 160 కింద నోటీసులు పంపించారు. దీంతో సీబీఐ కార్యాలయం నుంచి మధ్యలోనే అవినాష్‌ రెడ్డి వెనుదిరిగారు.

ఇదిలావుంటే

ఇదిలావుంటే వైఎస్ వివేకానందరెడ్డి హత్య కేసు విచారణలో భాగంగా అవినాష్‌రెడ్డికి సీబీఐ ఆదివారం నోటీసు జారీ చేసిన విషయం తెలిసిందే. సోమవారం మధ్యాహ్నం 3 గంటలకు హైదరాబాద్ సీబీఐ కార్యాలయంలో విచారణకు హాజరు కావాలని నోటీసుల్లో పేర్కొంది. ఈ నేపథ్యంలో అవినాష్‌ రెడ్డి విచారణ నిమిత్తం హైదరాబాద్‌లోని సీబీఐ కార్యాలయానికి వెళ్లారు. అయితే, విచారణ వాయిదా వేస్తున్నట్లు సమాచారం అందడంతో కార్యాలయం నుంచి ఆయన వెనుదిరిగారు.

మరోవైపు ఈ కేసులో ఎంపీ అవినాష్ రెడ్డి తండ్రి వైఎస్ భాస్కర్‌రెడ్డిని సీబీఐ అధికారులు ఆదివారం అరెస్టు చేసి న్యాయమూర్తి ఎదుట హాజరుపరచగా.. ఆయనకు సీబీఐ న్యాయమూర్తి 14 రోజుల రిమాండ్‌ విధించారు. దీంతో భాస్కర్‌రెడ్డిని అధికారులు చంచల్‌గూడ జైలుకు తరలించారు. ఈ క్రమంలో అవినాష్ రెడ్డి అరెస్టుపైనా జోరుగా చర్చలు జరుగుతున్నాయి.

మరోవైపు తెలంగాణ హైకోర్టులో సోమవారం మధ్యాహ్నం అవినాష్‌రెడ్డి ముందస్తు బెయిల్‌ పిటిషన్‌పై విచారణ ఉన్నందునే సీబీఐ తన విచారణను వాయిదా వేసినట్లు తెలుస్తోంది. వివేకా హత్య కేసులో అవినాష్ రెడ్డిని ఇప్పటికే సహ నిందితుడిగా పేర్కొన్న సీబీఐ.. ఇప్పటికే ఆయన తండ్రి భాస్కర్ రెడ్డిని అరెస్ట్ చేసింది. ఈ క్రమంలో అవినాష్ రెడ్డిని సైతం అరెస్ట్ చేసే అవకాశం ఉన్నట్లు చర్చ జరుగుతోంది. ఈ క్రమంలోనే ముందస్తు బెయిల్ కోసం అవినాష్ రెడ్డి హైకోర్టులో పిటిషన్ దాఖలు చేయడంతో కోర్టు తీర్పు కోసం వేసి చూసేందుకే సీబీఐ విచారణను మంగళవారానికి వాయిదా వేసినట్లు తెలుస్తోంది.