మనోభావాలు దెబ్బతీసివుంటే మన్నించండి: పేర్ని నాని

ఔరంగజేబు గురించి తాను చేసిన వ్యాఖ్యలను వెనక్కు తీసుకుంటున్నాను మాజీ మంత్రి పేర్ని నాని అన్నారు. తాను ఉద్ధేశపూర్వకంగా ఎలాంటి వ్యాఖ్యలను చేయలేదని.. తన వ్యాఖ్యలు ఎవరి మనోభావాలనైనా దెబ్బతీసినట్లైతే మన్నించమని కోరుతున్నాను అన్నారు. ఇటీవల ఓ పొలిటికల్ ప్రెస్ మీట్‌లో చంద్రబాబు గురించి తాను మాట్లాడానని.. నమ్మినవారికి ఎలా వెన్నుపోటు పొడిచాడో చంద్రబాబును ఔరంగజేబుతో పోల్చాను అన్నారు.

తాను చిన్నప్పటి నుంచి చదివిన చరిత్ర, పాఠ్యాంశాల్లో ఔరంగజేబు రాజకీయ ప్రస్థానం గురించి మాత్రమే తెలుసుకున్నట్లు చెప్పారు. ఔరంగజేబును ముస్లిం సోదరులంతా వలీగా భావిస్తారని తాను ఎక్కడా వినలేదని.. తాను మాట్లాడిన మాటలకు కొందరు ఎక్కువగా ప్రచారం కల్పిస్తున్నారన్నారు. తనకు అల్లా పై, మహ్మద్ ప్రవక్త పై ఎంతో నమ్మకం ఉందని.. అనేకసార్లు తాను దర్గాలకు వెళ్లానన్నారు. తన మాటలు ఎవరి మనసులను గాయపరిచినా మన్నించాలని కోరారు మాజీ మంత్రి.

చంద్రబాబును ప్రస్తావిస్తూ ఔరంగజేబుపై చేసిన వ్యాఖ్యలు దుమారం రేపాయి. చంద్రబాబు వెన్నుపోటూ అంటూ కామెంట్స్ చేసే క్రమంలో ఔరంగజేబు ప్రస్తావన వచ్చింది. దీంతో ఔరంగజేబును అవమానకరంగా మాట్లాడిన పేర్ని నాని.. ముస్లిం సమాజానికి వెంటనే క్షమాపణ చెప్పాలని కొందరు డిమాండ్ చేశారు. ఔరంగజేబు గురించి తెలుసుకుని మాట్లాడితే బావుండేది అన్నారు. రాజకీయల గురించి మాట్లాడే క్రమంలో ఇలా మాట్లాడారని తాము భావించామన్నారు. రాజకీయాల్లో చాలామంది వెన్నుపోటుదారులు ఉండొచ్చు.. కానీ ఔరంగజేబు పేరును ప్రస్తావించడం సరికాదన్నారు. రాజకీయ నేతలు అప్రమత్తంగా ఉండాలని.. ఇలాంటి వ్యాఖ్యలు సరికాదన్నారు. ఇలా విమర్శలు రావడంతో పేర్ని నాని స్పందించారు.