యర్రగొండపాలెంలో పర్యటన.... అడ్డుకుంటామన్న మంత్రి సురేష్

ప్రకాశం జిల్లా యర్రగొండపాలెంలో ఉద్రిక్త వాతావరణం ఏర్పడింది. యర్రగొండపాలెంలో చంద్రబాబు నాయుడు రోడ్ షో ఉంది. దాన్ని అడ్డుకుంటామని వైఎస్సార్సీపీ ప్రకటించింది. మంత్రి ఆదిమూలపు సురేష్ నేతృత్వంలో.. వైసీపీ శ్రేణులు భారీ సంఖ్యలో రోడ్డెక్కారు. నల్ల బెలూన్లు, టీ షర్టులు ధరించి.. బాబు గో బ్యాక్ ప్లకార్డులతో నిరసన కార్యక్రమం చేపట్టారు. ఇటు టీడీపీ శ్రేణులు కూడా మంత్రి సురేష్  ఆఫీసు వైపు దూసుకొచ్చే ప్రయత్నం చేశారు. ఇటు మంత్రి సురేష్ రోడ్డుపై టీ షర్టు విప్పేసి చంద్రబాబుపై ఆగ్రహంగా మాట్లాడారు. దీంతో యర్రగొండపాలెంలో హైటెన్షన్ నెలకొంది.

వెంటనే అప్రమత్తమైన పోలీసులు.. ఇరు వర్గాలను అదుపు చేశారు. అయితే.. ఈ పరిణామాల నేపథ్యంలో.. ఎన్ఎస్‌జీ అలెర్ట్ అయ్యింది. చంద్రబాబుకు మరింత భద్రత పెంచింది. నిఘా వర్గాల హెచ్చరికలతో భద్రత పెంచినట్టు తెలుస్తోంది. మరోవైపు చంద్రబాబుపై మంత్రి ఆదిమూలపు సురేష్ ఘాటు వ్యాఖ్యలు చేశారు. చంద్రబాబు నాయుడు దళిత ద్రోహి అని ఫైర్ అయ్యారు. దళితులను అవమానించిన బాబూ కొడుకులకు దళిత నియోజకవర్గం యర్రగొండపాలెంలో తిరిగే అర్హతే లేదన్నారు.

దళితులుగా పుట్టాలని ఎవరైనా అనుకుంటారా అంటూ అవహేళన చేసిన చంద్రబాబుకు ఇప్పుడు దళితుల ఓట్లు కావాల్సి వచ్చాయని.. అందుకోసమే దళితులపై ప్రేమ ప్రదర్శిస్తున్నారని మంత్రి సురేష్ ఆరోపించారు. దళిత ప్రజలనే కాదు.. సొంత పార్టీ దళిత నాయకులను కూడా హేళన చేస్తూ చంద్రబాబు అవమానిస్తుంటారని మంత్రి విమర్శించారు. ఇటీవల యర్రగొండపాలెం నియోజకవర్గ టీడీపీ ఇంఛార్డ్ ఎరిక్షన్ బాబును కూడా చంద్రబాబు ఘోరంగా అవమానించారని మంత్రి సురేష్ చెప్పారు.