దేశీయంగా వీసా రెన్యువల్ ప్రక్రియ ప్రారంభం,,,వీసాల విషయంలో అమెరికా కీలక నిర్ణయం

వీసాల విషయంలో భారతీయ టెక్కీలకు అమెరికా తీపి కబురు అందించింది. ఈ ఏడాది 10 లక్షలకుపైగా వర్క్‌ వీసాలను (హెచ్‌-1బీ, ఎల్‌ వర్క్ వీసాలు) జారీ చేయనున్నట్టు ప్రకటించింది. వేసవిలో కొత్త విద్యా సంవత్సరం ప్రారంభమయ్యే సమయానికి పెండింగ్‌లోని భారతీయ విద్యార్థుల వీసాలన్నింటినీ పరిష్కరిస్తామని అమెరికా విదేశాంగ శాఖ సహాయ మంత్రి డోనాల్డ్‌ లూ వెల్లడించారు. హెచ్-1బీ, ఎల్ వీసాల సహా ఈ ఏడాది భారతీయులను దృష్టిలో ఉంచుకుని భారీగా వీసాల జారీకి కసరత్తు చేస్తున్నామని ఆయన చెప్పారు. బిజినెస్‌, టూరిస్ట్ వీసాల కోసం మొదటిసారి చేసిన దరఖాస్తుల క్లియరెన్స్‌లో విపరీత జాప్యం భారతీయులకు ఇబ్బందిగా మారింది. అయితే, ఈ విషయాలన్నీ తమ దృష్టిలో ఉన్నాయని లూ అన్నారు.

హెచ్‌-1బీ, వీ వీసాల వెయిటింగ్ పీరియడ్‌ను ప్రస్తుతం 60 రోజులకు తగ్గించామని లూ తెలిపారు. కొన్ని నాన్‌- ఇమ్మిగ్రెంట్‌ వీసాల రెన్యువల్‌కు పిటిషన్‌దారు స్వయంగా హాజరు కావాల్సి ఉండగా, వీటిని దేశీయంగానే పునరుద్ధరించే ప్రక్రియను ఈ ఏడాది చివర్లో ప్రయోగాత్మకంగా తిరిగి అమలు చేయాలని నిర్ణయించినట్లు ఆయన వెల్లడించారు. ఉద్యోగాలు కోల్పోయిన హెచ్‌-1బీ వీసాదారులు తమ హోదాను పునరుద్ధరించుకోవడానికి ఏమేం చేయాలో సూచిస్తూ... అమెరికన్‌ హోంల్యాండ్‌ సెక్యూరిటీ విధివిధానాలను విడుదల చేసిందని లూ పేర్కొన్నారు. ఇదిలావుంటే ఉన్నత విద్య కోసం అమెరికాకు వెళుతున్న విదేశీ విద్యార్థుల్లో భారతీయులు రెండోస్థానంలో ఉన్నారు. ఈ నేపథ్యంలో భారతీయులు అధికంగా కోరుకునే హెచ్‌-1బీ, ఎల్‌ వర్క్‌ వీసాల జారీకి అమెరికా ప్రాధాన్యం ఇవ్వడం శుభపరిణామం.

‘‘భారత్‌-యూఎస్ ద్వైపాక్షిక సంబంధాలకు అమెరికాలో బలమైన మద్దతు ఉంది.. గత మూడు దశాబ్దాలకుపైగా అమెరికాలో నివశిస్తోన్న భారతీయ అమెరికన్లతో మన సంబంధాలు నడుస్తున్నాయి.. ప్రతి ఏడాది 10 లక్షల మందికి పైగా ప్రజలు ఇరుదేశాల మధ్య ప్రయాణిస్తూ ఉంటారు.. ప్రస్తుతం లక్ష మంది వరకు అమెరికన్లు భారత్‌లోనూ నివసిస్తున్నారు’’ అని డొనాల్డ్‌ లు వివరించారు. బైడెన్ భారత్ పర్యటన రానున్న వేళ అమెరికా ఈ ప్రకటన రావడం విశేషం.