గుంటూరు, పల్నాడు జిల్లాల పర్యటనకు చంద్రబాబు,,,ఇప్పటికే నిరసనల్లో దిగిన వైసీపీ నేతలు

ఎన్నికలు సమీపిస్తున్న కొద్ది ఏపీలో టీడీపీ వర్సెస్ వైసీపీ అన్నట్లుగా వాాతావరణం వేడెక్కుతోంది. ఇదిలావుంటే టీడీపీ అధినేత చంద్రబాబు ఉమ్మడి గుంటూరు జిల్లాలో పర్యటనకు సిద్ధమయ్యారు. ఈ నెల 25, 26, 27న పెదకూరపాడు, సత్తెనపల్లి, తాడికొండలో పర్యటించనున్నారు. అయితే చంద్రబాబుకు పర్యటన కంటే ముందు వైఎస్సార్‌సీపీ చంద్రబాబుకు షాకిచ్చింది. అమరావతిలోని జైల్‌సింగ్ కాలనీలో వైఎస్సార్సీపీ ఫ్లెక్సీలు ఏర్పాటు చేసింది. పెదకూరపాడు నియోజకవర్గానికి సంబంధించిన ప్రశ్నలు సంధిస్తూ ఆ ఫ్లెక్సీలను ఏర్పాటు చేశారు. చంద్రబాబుకు వైఎస్సార్‌సీపీ నేతలు నిరసనలు తెలిపే కార్యక్రమం చేపట్టారు.. చంద్రబాబు సిగ్గు సిగ్గు పేరుతో ఫ్లకార్డులు, ఫ్లెక్సీలు ఏర్పాటు చేశారు.

ఈ ఫ్లెక్సీల వ్యవహారంపై మాజీ ఎమ్మెల్యే టీడీపీ నేత కొమ్మాలపాటి శ్రీధర్ ఆగ్రహం వ్యక్తం చేశారు. వెంటనే అమరావతి పోలీసులకు సమాచారం ఇచ్చారు. కవ్వింపు చర్యగా ఏర్పాటు చేసిన ప్లెక్సీలను వెంటనే తొలగించాలని.. చంద్రబాబు అమరావతి పర్యటన కు పూర్తిస్ధాయిలో పోలీసులు భద్రత కల్పించాలని కోరారు. అధికారపార్టీ దళితుల మధ్య చిచ్చు పెడుతోందని.. ఎన్నికలు సమీపిస్తున్న వేళ అధికారపార్టీకి దళితులపై ప్రేమ పుట్టుకొచ్చిందా అన్నారు.

మరోవైపు చంద్రబాబు పల్నాడు పర్యటనపై నేతలు సమావేశమయ్యారు. సత్తెనపల్లిలో జరిగిన కార్యక్రమంలో పార్టీ నేతలు పాల్గొన్నారు. అధికారం చేజారుతుండటంతో సీఎం జగన్‌మోహనరెడ్డిలో ఆందోళన కనిపిస్తోందన్నారు టీడీపీ నేతలు. జగన్‌ కార్యక్రమాల్లో ప్రజలు గోడలు దూకి పారిపోతున్నారని సెటైర్లు పేల్చారు. యర్రగొండపాలెంలో చంద్రబాబు కాన్వాయ్‌పై రాళ్లు రువ్వి శవాలతో రాజకీయాలు చేయాలని వైఎస్సార్‌సీపీ ప్రభుత్వం ప్రయత్నించిందన్నారు. పరిశ్రమలు పక్క రాష్ట్రాలకు తరలిపోతున్నాయని.. అందుకే రాష్ట్రంలో నిరుద్యోగులు పెరుగుతున్నారని వ్యాఖ్యానించారు. ఈనెల 26న జరిగే చంద్రబాబు పర్యటన విజయవంతం చేయాలను కేడర్‌కు పిలుపునిచ్చారు. ఎన్నికలు ఎప్పుడు జరిగినా టీడీపీదే విజయం అన్నారు.

ఇదిలా ఉంటే సత్తెనపల్లి టీడీపీలో ముసలం రేగింది. ఆదివారం జరిగిన సభలో మాజీ స్పీకర్ కోడెల శివప్రసాదరావుకు నివాళులు అర్పించలేదంటూ ఆయన కుమారుడు శివరామ్ అలకబూనారు. తన తండ్రిని చిన్నచూపు చూస్తున్నారని ఆవేదన వ్యక్తం చేశారు. సత్తెనపల్లి లో జరిగిన పార్టీ సమావేశంలో కోడెలకు కనీస నివాళులు అర్పించ లేకపోవడం చాలా బాధాకరం అన్నారు. పార్టీలో కొందరు వ్యక్తులు పదవుల కోసం కోడెల గారి పేరుని తుడి చెయ్యాలన్న ప్రయత్నం చేస్తున్నారన్నారు. ఈ విషయం పై సాయంత్రం కోడెల శివరామ్ మీడియా ముందుకు వచ్చే అవకాశం ఉంది.

ఇదిలా ఉంటే.. కోడెల శివప్రసాదరావుకు నివాళి అర్పించలేదని కొందరు కార్యకర్తలు చెప్పడంతో సమావేశం చివర్లో కోడెలకు నాయకులు నివాళి అర్పించారని చెబుతున్నారు. చంద్రబాబు పర్యటన ఉండటంతో.. సత్తెనపల్లి నియోజకవర్గ టీడీపీ ఇంఛార్జ్‌ను ప్రకటిస్తార చర్చ జరిగింది. కానీ అలాంటిది ఏమీ లేదని పార్టీ నేతలు అంటున్నారు. త్వరలోనే సత్తెనపల్లి ఇంఛార్జ్‌‌పై ప్రకటన ఉంటుందంటున్నారు.