వందేభారత్ రైలుకు... ప్రయాణికుల నుంచి ఆదరణ పెరిగింది

తెలుగు రాష్ట్రాల మధ్య రెండు వందేభారత్ రైళ్లు పరుగులు తీస్తున్నాయి. సికింద్రాబాద్-విశాఖ మధ్య జనవరిలో.. సికింద్రాబాద్-తిరుపతి మధ్య ఈ నెలలోనే రైలు ప్రారంభమైంది. ఇటీవల ప్రారంభమైన సికింద్రాబాద్‌- తిరుపతి (20701) వందేభారత్‌ రైలుకు ప్రయాణికుల నుంచి బాగా ఆదరణ వస్తోంది. హైదరాబాద్ నుంచి తిరుపతి, తిరుమలకు వెళ్లేవారికి బాగా సౌకర్యవంతంగా ఉండటంతో పాటుగా ప్రయాణ సమయం కూడా తగ్గడంతో ప్రయాణికులు ఈ రైలుకు మొగ్గు చూపిస్తున్నారు. రిజర్వేషన్‌లకు డిమాండ్ పెరుగుతోంది.

ఈ రైలు వారంలో మంగళవారం మినహా మిగిలిన ఆరు రోజులు అందుబాటులో ఉంటుంది. అంతేకాదు తిరుపతికి కేవలం ఎనిమిదన్నర గంటల్లోనే వెళ్లొచ్చు. రైలులో ప్రస్తుతం 7 ఏసీ బోగీతో పాటు ఒక ఎగ్జిక్యూటివ్‌ ఏసీ కారు బోగీ మాత్రమే అందుబాటులో ఉన్నాయి. దీంతో రిజర్వేషన్‌ దొరక్క ప్రయాణికులు ఇబ్బందులు పడుతున్నారు. ఈ క్రమంలో సికింద్రాబాద్‌- తిరుపతి వందేభారత్‌కు ఆదరణ పెరగడంతో బోగీలను కూడా పెంచాలని రైల్వేశాఖ భావిస్తోందట. త్వరలోనే 16 బోగీలతో నడిపేందుకు కసరత్తు ప్రారంభించనున్నారు.

సికింద్రాబాద్-తిరుపతి వందే భారత్ ఎక్స్‌ప్రెస్‌ని ప్రారంభించిన మోదీ

అంతేకాదు సికింద్రాబాద్-తిరుపతి వందేభారత్ రైలుకు బోగీలు తగ్గడంపై కేంద్రమంత్రి కిషన్ రెడ్డి కూడా ఆరా తీశారట. ఈ రైలుకు కూడా బోగీల సంఖ్య పెంచాలని సూచనలు చేశారట. అందుకే బోగీలను పెంచాలని భావిస్తున్నారట. దీనిపై అధికారికంగా ప్రకటన రాకపోయినా.. ప్రయాణికుల నుంచి వస్తున్న ఆదరణతో త్వరలోనే బోగీలను పెంచబోతున్నట్లు చెబుతున్నారు. త్వరలోనే ఈ అంశంపై క్లారిటీ వచ్చే అవకాశం ఉంది.

సికింద్రాబాద్-తిరుపతి మధ్య నడిచే ఈ వందేభారత్ రైలు ప్రధానంగా తిరుమలకు వెళ్లే భక్తుల నుంచి మంచి ఆదరణ వస్తోంది. హైదరాబాద్ నుంచి శ్రీవారి దర్శనానికి వెళ్లాలనుకునేవారు.. ఈ రైలులోనే తిరుపతి వెళ్లి, స్వామివారిని దర్శించుకుని మళ్లీ అదే రైల్లో తిరిగి హైదరాబాద్ వచ్చేలా కొందరు ప్లాన్ చేసుకుంటున్నారట. ఇలా వందేభారత్ చాలా సౌకర్యంగా ఉందనే అభిప్రాయాలు వ్యక్తమవుతున్నాయి. ప్రధానంగా బ్రేక్‌ దర్శనం, రూ.300 టికెట్లు బుక్ చేసుకున్నవాళ్లు ఇలా ప్లాన్ చేసుకుంటున్నారట.

వాస్తవానికి రైల్వేశాఖ సికింద్రాబాద్ నుంచి తిరుపతికి చాలా రైళ్లనే నడుపుతోంది. రద్దీని బట్టి ప్రత్యేక రైళ్లను కూడా అందుబాటులోకి తెస్తోంది. అయితే వందేభారత్ వచ్చిన తర్వాత పరిస్థితి మారిపోయిందట.. ఆ రైల్లో వెళ్లేందుకు ఎక్కువమంది ఆసక్తి చూపుతున్నారట. ఒకవేళ రిజర్వేషన్ దొరకని పక్షంలో మిగిలిన రైళ్లలో రిజర్వేషన్ చేసుకుంటున్నారట. వందేభారత్‌లో ఖాళీలు ఉండి.. ఛార్ట్‌ తయారై రైలు బయలుదేరే నాలుగుగంటల ముందుగానే కరెంట్‌ బుకింగ్‌ ద్వారా టికెట్లు పొందే అవకాశం కూడా ఉంది. రైలు బయలుదేరే సమయానికి అరగంట ముందు కూడా టీటీని సంప్రదించి టికెట్‌ పొందచ్చని చెబుతున్నారు.

సికింద్రాబాద్‌ - తిరుపతి ఛైర్‌కార్‌ టికెట్ ధరలు ఇలా ఉన్నాయి..

సికింద్రాబాద్ నుంచి నల్గొండ: - రూ.470

సికింద్రాబాద్ నుంచి గుంటూరు: - రూ. 865

సికింద్రాబాద్ నుంచి ఒంగోలు: - రూ. 1075

సికింద్రాబాద్ నుంచి నెల్లూరు: - రూ. 1270

సికింద్రాబాద్‌ నుంచి తిరుపతి: - రూ. 1680

సికింద్రాబాద్‌ - తిరుపతి ఎగ్జిక్యూటివ్‌ చైర్ కార్ టికెట్ ఛార్జీలు ఇలా ఉన్నాయి..

సికింద్రాబాద్ నుంచి నల్గొండ: - రూ. 900

సికింద్రాబాద్ నుంచి గుంటూరు: - రూ. 1620

సికింద్రాబాద్ నుంచి ఒంగోలు: - రూ. 2045

సికింద్రాబాద్ నుంచి నెల్లూరు: - రూ. 2455

సికింద్రాబాద్‌ నుంచి తిరుపతి: - రూ. 3080

ఇక సికింద్రాబాద్‌ - తిరుపతి వందే భారత్ రైలు.. సికింద్రాబాద్‌ రైల్వే స్టేషన్‌ నుంచి ఉదయం 6 గంటలకు బయల్దేరి.. మధ్యాహ్నం 2.30 గంటలకు తిరుపతికి చేరుకుంటుంది. మళ్లీ తిరిగి తిరుపతి రైల్వే స్టేషన్‌ నుంచి మధ్యాహ్నం 3.15 గంటలకు బయల్దేరి.. రాత్రి 11.45 గంటలకు సికింద్రాబాద్‌ వస్తుంది.