ఏపీ పోలీస్ కంప్లైంట్స్ అథారిటీ సభ్యుల నియామకం,,,జిల్లాస్థాయిలో కూడా ఏర్పాటు

ఆంధ్రప్రదేశ్‌ రాష్ట్రస్థాయి పోలీసు కంప్లైంట్స్‌ అథారిటీ సభ్యులను ప్రభుత్వం నియమించింది. రిటైర్డ్ ఐఏఎస్‌ అధికారిణి ఉదయలక్ష్మి, రిటైర్డ్ ఐపీఎస్‌ అధికారులు కె.వి.వి.గోపాలరావు, బత్తిన శ్రీనివాసులను నియమించారు. అలాగే జిల్లాస్థాయి పోలీసు కంప్లైంట్‌ అథారిటీలకు పలువుర్ని సభ్యులుగా అపాయింట్ చేస్తూ హోంశాఖ ముఖ్య కార్యదర్శి హరీష్‌కుమార్‌ గుప్తా ఉత్తర్వులు జారీచేశారు. గతంలో సభ్యుడిగా నియమించిన రిటైర్డ్ ఐఏఎస్‌ అధికారి బి.కిషోర్‌ స్థానంలో బత్తిన శ్రీనివాసును అపాయింట్ చేశారు.

విశాఖలో ఉత్తరాంధ్ర ఆరు (విశాఖపట్నం, విజయనగరం, శ్రీకాకుళం, అనకాపల్లి, అల్లూరి సీతారామరాజు, పార్వతీపురం మన్యం) జిల్లాలకు జిల్లాస్థాయి పోలీసు కంప్లైంట్‌ అథారిటీని కూడా నియమించారు. రాజమండ్రిలో.. ఏడు (తూర్పుగోదావరి, కాకినాడ, డా.బీఆర్‌ అంబేద్కర్‌ కోనసీమ, పశ్చిమగోదావరి, ఏలూరు, కృష్ణా, ఎన్టీఆర్‌ జిల్లాలకు జిల్లాస్థాయి పోలీసు కంప్లైంట్‌ అథారిటీని కూడా అపాయింట్ చేశారు.

గుంటూరులో.. ఐదు (గుంటూరు, బాపట్ల, పల్నాడు, ప్రకాశం, నెల్లూరు) జిల్లాలకు జిల్లాస్థాయి పోలీసు కంప్లైంట్‌ అథారిటీనియమించారు. కర్నూలులో.. ఎనిమిది (కర్నూలు, కడప, అనంతపురం, చిత్తూరు, అన్నమయ్య, తిరుపతి, నంద్యాల, శ్రీ సత్యసాయి) జిల్లాలకు సంబంధించిన జిల్లాస్థాయి పోలీసు కంప్లైంట్‌ అథారిటీని అపాయింట్ చేశారు. ప్రతి కేంద్రంలో ముగ్గురు రిటైర్డ్ డీఎస్పీ, అడిషినల్ ఎస్పీ స్థాయి అధికారులను నియమించారు.

2021 జులైలో మద్రాసు హైకోర్టు రిటైర్డ్ జడ్జి జస్టిస్‌ వి.కనగరాజ్‌ ఛైర్మన్‌గా రాష్ట్ర స్థాయి పోలీసు కంప్లైంట్స్‌ అథారిటీని నియమించిన సంగతి తెలిసిందే. అయితే కనగరాజ్‌ నియమాకాన్ని సవాలు చేస్తూ ఏపీ హైకోర్టులో పిటిషన్ దాఖలైంది. 2021 సెప్టెంబరులో హైకోర్టు ఆయన నియమాకాన్ని రద్దు చేసింది. దీంతో అథారిటీ సభ్యుల నియమాకాన్నీ ప్రభుత్వం రద్దు చేసింది.