వాతావరణ అప్ డేట్స్, భయంకరమైన ఈదురు గాలులు
Andhra Pradesh Telugu | Suryaa Desk | Published : Tue, May 02, 2023, 03:22 PM
రాష్ట్రంలో జోరుగా వర్షాలు పడుతున్న తరుణంలో విశాఖపట్నం వాతావరణ శాఖ తాజా పరిస్థితులని విడుదల చేసింది. విదర్భ నుంచి కర్ణాటక వరకు ద్రోణి విస్తరించింది. ఇంకా దక్షిణ పాకిస్థాన్ పరిసరాల్లో సముద్ర మట్టానికి 3.1 నుంచి 5.8 కి.మీ. ఎత్తులో మరో ద్రోణి విస్తరించింది. వీటి ప్రభావంతో బంగాళాఖాతం, అరేబియా సముద్రం నుంచి భూఉపరితలంపైకి బలంగా తేమగాలులు వీస్తున్నాయి. దీంతో వాతావరణ అనిశ్చితి నెలకొనడంతో ఏపీతోపాటు దక్షిణాదిలో తెలంగాణ, తమిళనాడు, పుదుచ్చేరి, కర్ణాటక, కేరళ, ఇంకా ఉత్తర, ఈశాన్య భారతంలోని అనేక రాష్ట్రాల్లో విస్తారంగా, అక్కడక్కడా భారీవర్షాలు కురుస్తున్నాయి. రాష్ట్రంలో ఆదివారం రాత్రి ప్రారంభమైన వర్షాలు సోమవారం సాయంత్రం వరకు కొనసాగాయి. కొన్నిచోట్ల భారీవర్షాలు కురవడంతోపాటు ఈదురుగాలులు వీచాయి. మంగళ, బుధవారాల్లో కోస్తా, రాయలసీమల్లో అనేకచోట్ల వర్షాలు, అక్కడక్కడ భారీవర్షాలు కురుస్తాయని వాతావరణ శాఖ తెలిపింది. గంటకు 40 నుంచి 50 కిలోమీటర్ల వేగంతో బలమైన గాలులు వీస్తాయని, ఆరుబయట పనులకు వెళ్లేవారు అప్రమత్తంగా ఉండాలని హెచ్చరించింది.
|
|