చిక్కుల్లో రాజోలు ఎమ్మెల్యే రాపాక వరప్రసాద్

రాజోలు ఎమ్మెల్యే రాపాక వరప్రసాద్‌ చిక్కుల్లో పడ్డారు. ఇటీవల వైరల్ అయిన వీడియో.. ఆయన ఎన్నికపై పూర్తిస్థాయి విచారణ చేయాలని రాష్ట్ర ఎన్నికల సంఘం ఆదేశించింది. ఈ అంశంపై తనకు నివేదిక ఇవ్వాలని జిల్లా కలెక్టర్‌‌ను రాష్ట్ర ఎన్నికల ప్రధానాధికారి ముకేష్‌కుమార్‌ మీనా ఆదేశించారు. రాపాక వరప్రసాద్ మార్చి 24న అంతర్వేదిలో జరిగిన వైఎస్సార్‌సీపీ ఆత్మీయ సమ్మేళనంలో పాల్గొన్నారు. ఈ క్రమంలో ఆయన చేసిన వ్యాఖ్యల వీడియో వైరల్ అయ్యింది.

దొంగ ఓట్లపై ఎమ్మెల్యే రాపాక సంచలన వ్యాఖ్యలు

తమ సొంత గ్రామం చింతలమోరిని ఎమ్మెల్యే ప్రస్తావించారు. కొందరు వ్యక్తులు దొంగ ఓట్లు వేయడానికే వచ్చేవారని చెప్పుకొచ్చారు. అక్కడితో ఆగకుండా ఒక్కొక్కరు 5-10 ఓట్లు వేసేవారని.. అవే తన గెలుపునకు సహకరించేవని వ్యాఖ్యానించారు. ఈ వీడియో సోషల్ మీడియాలో వైరల్ కావడంతో వివాదం జరిగింది. ఈ వీడియో ఎపిసోడ్‌పై సఖినేటిపల్లి మండలం కేశవదాసుపాలేనికి చెందిన వెంకటపతిరాజా రాష్ట్ర ఎన్నికల సంఘానికి ఫిర్యాదు చేశారు.

వెంకటపతిరాజు గత నెల 24న ఈ-మెయిల్‌ ద్వారా ఎన్నికల సంఘానికి ఫిర్యాదు చేశారు. వెంటనే స్పందించిన రాష్ట్ర ఎన్నికల ప్రధానాధికారి ముకేష్‌కుమార్‌ మీనా.. ఎన్నికపై విచారణ నిర్వహించి, వారం రోజుల్లో నివేదిక ఇవ్వాలని కలెక్టర్‌ హిమాన్షు శుక్లాను ఆదేశించారు. ఈ వ్యవహారంపై విచారణ నిస్పక్షపాతంగా ఉండాలని వెంకటపతిరాజా అంటున్నారు. తాను దొంగ ఓట్లతో విజయం సాధించానని ఒప్పుకున్నారని.. ఆయన ఎన్నిక ప్రజాస్వామ్యానికి విరుద్ధమన్నారు. వెంటనే విచారణ చేసి కాలయాపన లేకుండా చర్యలు తీసుకోవాలని డిమాండ్ చేశారు.

ఆ వీడియోలో చేసిన వ్యాఖ్యలపై గతంలోనే దుమారం రేగింది. చింతలమోరిలోని తన ఇంటి సమీపంలో ఉండే ఓ పోలింగ్ బూత్ గురించి ప్రస్తావించారు. సొంత ఊరిలో తనకు ఏడు నుంచి ఎనిమిది వందల వరకు మెజార్టీ వచ్చేదని చెప్పుకొచ్చారు. అంతేకాదు ఎమ్మెల్యే రాపాక గతంలో చింతలమూరి గ్రామ సర్పంచ్‌గా పనిచేశారు. ఈ వీడియోపై దుమారం రేగడంతో ఆయన కూడా స్పందించారు. కొందరు తన వ్యాఖ్యల్ని వక్రీకరించారని.. గతంలో ఎప్పుడో 32 ఏళ్ల క్రితం జ‌రిగిన స‌ర్పంచ్ ఎన్నిక‌ల విషయాన్ని ప్రస్తావించినట్లు క్లారిటీ ఇచ్చారు. తాను సరదాగా నవ్వుకోవడానికి ఈ కామెంట్స్ చేసినట్లు చెప్పారు.

అంతేకాదు రాపాక వరప్రసాద్ ఎమ్మెల్యే కోటా ఎమ్మెల్సీ ఎన్నికల తర్వాత కూడా సంచలన వ్యాఖ్యలు చేశారు. తనకు టీడీపీ నుంచి ఆఫర్ వచ్చిందని.. రూ.10 కోట్లు ఇస్తామని తనతో బేరసారాలు చేశారని ఆరోపించారు. కానీ తాను ఆ ఆఫర్ తిరస్కరించాను అన్నారు. టీడీపీ కూడా రాపాకకు కౌంటర్ ఇచ్చింది. తాము బేరసారాలు చేస్తే.. ఆ రోజే ఎందుకు చెప్పలేదని ప్రశ్నించారు. నిజాయితీ గురించి మాట్లాడే రాపాక.. ఏ పార్టీలో గెలిచి ఏ పార్టీలోకి వెళ్లారని ప్రశ్నించారు.