నాది అలాంటి మనస్తత్వం కాదు.. బాలినేని

కొంత మంది కావాలనే తనపై దుష్ప్రచారం చేస్తున్నారని మాజీ మంత్రి, వైఎస్సార్ కాంగ్రెస్ పార్టీ ఎమ్మెల్యే బాలినేని శ్రీనివాస రెడ్డి ప్రెస్ మీట్‌లో కంటతడి పెట్టుకున్నారు. సొంత పార్టీ నేతలపైనే పరోక్షంగా తీవ్ర వ్యాఖ్యలు చేశారు. కొంత మంది కావాలనే తనపై దుష్ప్రచారం చేస్తున్నారని.. వారెవరో, ఎందుకు చేస్తున్నారో ప్రజలకు తెలుసునని ఆయన అన్నారు. తాను టికెట్ ఇప్పించిన వారే తనపై అధిష్టానానికి ఫిర్యాదు చేశారంటూ ఆవేదన వ్యక్తం చేశారు. గోనె ప్రకాశ్ రావు చేసిన వ్యాఖ్యలకు బదులిచ్చారు.

తనపై కొందరు కావాలనే దుష్ప్రచారం చేస్తున్నారని మాజీ మంత్రి, ఒంగోలు ఎమ్మెల్యే బాలినేని శ్రీనివాసరెడ్డి అన్నారు. వైఎస్సార్ తనకు రాజకీయభిక్ష పెట్టారని.. పార్టీ ఆవిర్భావం నుంచి వారి వెంటే (వైఎస్సార్, వైఎస్ జగన్) నడిచానని ఆయన చెప్పుకొచ్చారు. సొంత పార్టీ నేతలపైనే పరోక్షంగా తీవ్ర ఆరోపణలు చేశారు. ప్రెస్ మీట్‌లో కంటతడి పెట్టుకున్నారు. తనను ఎవరు ఇబ్బంది పెడుతున్నారో అందరికీ తెలుసని.. వారి పేరు ప్రత్యేకంగా చెప్పాల్సిన అవసరం లేదని బాలినేని అన్నారు. తన గురించి మాట్లాడాల్సిన అవసరం గోనె ప్రకాశ్ రావుకు ఏముందని బాలినేని ప్రశ్నించారు. కొందరు కావాలనే ఆయనతో అలా మాట్లాడిస్తున్నట్టు అనిపిస్తోందని ఆయన అనుమానం వ్యక్తం చేశారు. ‘నాపై నిందలు, ఆరోపణలు భరించలేకపోతున్నా. నేను తప్పు చేసినట్టు నిరూపిస్తే రాజకీయాల నుంచి తప్పుకుంటా’ అని బాలినేని అన్నారు. రీజినల్ కోఆర్డినేటర్ పదవికి రాజీనామా చేసిన తర్వాత తొలిసారిగా ఒంగోలు వచ్చిన ఆయన.. మీడియా ప్రతినిధులతో మాట్లాడారు.

‘నాకు వైఎస్‌ రాజశేఖర్ రెడ్డి రాజకీయ భిక్ష పెట్టారు. 1999లో నేను రాజకీయాల్లోకి వచ్చాను. 2009లో వైఎస్సార్ మంత్రి పదవి ఇచ్చారు. వైఎస్సార్ మరణం నా రాజకీయ జీవితంలో తీరని లోటు. జగన్ ఓదార్పు యాత్ర సమయంలో నన్ను మంత్రి పదవి నుంచి తొలగిస్తామని చెప్పినా లెక్క చెయ్యలేదు. జగన్ వెంటే నడిచాను. వైసీపీ ఆవిర్భావం నుంచి పార్టీ కీలక నేతగా పని చేశాను. అలాంటి నాపై లేనిపోని ఆరోపణలు చేస్తున్నారు’ అంటూ బాలినేని ఆవేదన వ్యక్తం చేశారు. ‘చెన్నైలో హవాలా, భూ కబ్జాలు, సినిమాలో పెట్టుబడులు అంటూ నాపై ఆరోపణలు చేస్తున్నారు. వైసీపీ కోసం ఎంతో శ్రమించా, ఎన్నో అవమానాలు పడ్డాను. కానీ, ఈ నిందలను భరించలేకపోతున్నా’ అంటూ బాలినేని భావోద్వేగానికి గురయ్యారు.

‘నేను ఎవరిపైనా సీఎంకు ఫిర్యాదు చేయలేదు. అలాంటి మనస్తత్వం నాది కాదు. నేను టికెట్‌ ఇప్పించిన వారే నాపై అధిష్టానానికి ఫిర్యాదు చేస్తున్నారు. అలాంటి నీచులకు పార్టీపై ప్రేమలేదు. నా వ్యతిరేకుల మాదిరిగా నేను పార్టీకి నష్టం చేయలేదు. వారిపై పార్టీ అధిష్ఠానం చర్యలు తీసుకుంటే మంచిది. ఈ వివాదాలకు పార్టీ అధిష్టానమే ముగింపు పలుకుతుందని ఆశిస్తున్నా’ అని బాలినేని అన్నారు. ఒంగోలు నియోజకవర్గంలో తనపై ప్రజలకు ఎలాంటి వ్యతిరేకత లేదని బాలినేని శ్రీనివాస రెడ్డి చెప్పారు. 3 జిల్లాల్లో గడపగడపకు తిరిగేందుకు వీలు కాకపోవడంతోనే పార్టీ కో-ఆర్డినేటర్‌ పదవికి రాజీనామా చేశానని వివరించారు.

గత కొన్ని రోజులుగా బాలినేని పార్టీ మారుతున్నట్లు వార్తలు వచ్చాయి. ఇదే సమయంలో మాజీ ఎమ్మెల్యే గోనె ప్రకాశ్ రావు మీడియా ముందుకొచ్చి బాలినేని గురించి తీవ్ర విమర్శలు చేశారు. బాలినేనికి వందల కోట్లు ఎలా వచ్చాయని ప్రశ్నించారు. విదేశాల్లో గ్యాంబ్లింగ్‌లు ఆడిన చరిత్ర బాలినేనిదంటూ సంచలన ఆరోపణలు చేశారు. వైవీ సుబ్బారెడ్డి దయవల్లే బాలినేని ఎమ్మెల్యే అయ్యారని.. అలాంటి వైవీని ఆడిపోసుకోవద్దని అన్నారు. బాలినేని టీడీపీలోకి వెళ్తున్నారంటూ మరో బాంబ్ పేల్చారు. ఈ నేపథ్యంలో మీడియా ప్రతినిధులతో మాట్లాడిన బాలినేని పలు అంశాలపై స్పష్టతనిచ్చారు.