రాజీనామాపై వెనక్కి తగ్గారు,,,ఎన్సీపీ సారథ్య బాధ్యతలు చేపట్టనున్న పవార్

నేషనలిస్ట్ కాంగ్రెస్ పార్టీ జాతీయ అధ్యక్ష పదవికి రాజీనామా చేసిన శరద్ పవార్.. వెనక్కి తగ్గారు. తన రాజీనామాను వెనక్కి తీసుకున్నారు. ఆయనే స్వయంగా ఈ విషయాన్ని వెల్లడించారు. తన అభిమానులు, కార్యకర్తల కోరిక మేరకే ఈ నిర్ణయాన్ని తీసుకున్నట్లుగా పవార్ స్పష్టం చేశారు. తాను కార్యకర్తల మనోభావాలను గౌరవిస్తానని.. వారి ప్రేమ కారణంగానే రాజీనామాను వెనక్కి తీసుకున్నానని శరద్ పవార్ వ్యాఖ్యానించారు.

ఇదే సమయంలో.. శరద్ పవార్ కీలక వ్యాఖ్యలు చేశారు. భవిష్యత్తులో పార్టీలో సంస్థాగత మార్పులు ఉంటాయని స్పష్టం చేశారు. పార్టీ బాధ్యతలు కొత్తవారికి అప్పగించడం, నూతన నాయకత్వాన్ని సృష్టించడంపై ఫోకస్ పెడతానని స్పష్టం చేశారు. పార్టీ అభివృద్ధి, సిద్ధాంతాలను ప్రజల్లోకి తీసుకెళ్లడానికి పని చేస్తానని వ్యాఖ్యానించారు. తనకు అండగా నిలిచిన కార్యకర్తలకు, నాయకులకు ఎప్పటికీ కృతజ్ఞుడిగా ఉంటానని శరద్ పవార్ స్పష్టం చేశారు.

శరద్ పవార్ మే 2న ఎన్సీపీ అధ్యక్ష పదవికి రాజీనామా చేశారు. ఆ నిర్ణయం మహారాష్ట్ర రాజకీయాల్లో సంచలనంగా మారింది. పవార్ రాజీనామా చేయడాన్ని పార్టీలోని చాలా మంది నేతలు, కార్యకర్తలు ఒప్పుకోలేదు. దీంతో 18 మంది సీనియర్ నేతలతో ఓ కమిటీని ఏర్పాటు చేశారు. ఆ కమిటీ అనేక చర్చలు జరిపి.. పవార్ రాజీనామాను తిరస్కరించింది. అలాగే.. అధ్యక్షుడిగా పవార్‌నే కొనసాగించాలని తీర్మానం చేసింది. ఆ కమిటీలో పవార్ కుమార్తె సుప్రియా సూలే, అజిత్ పవార్ కూడా ఉన్నారు.

ఈ నేపథ్యంలో.. శరద్ పవార్ రాజీనామా విషయంలో వెనక్కి తగ్గారు. అయితే.. శరద్ పవార్ రాజీనామా గురించి ప్రకటన చేసిన సమయంలో పక్కనే ఉన్న అజిత్ పవార్.. శుక్రవారం మాట్లాడిన సమయంలో మాత్రం లేరు. దీంతో అజిత్ పవార్ ఎక్కడ అనే చర్చలు జరుగుతున్నాయి. గత కొన్ని రోజులుగా ఆయన పార్టీ మారబోతున్నారనే వార్తలు హాట్ టాపిక్‌గా మారాయి. ఆ సమయంలో పవార్ రాజీనామా ప్రకటించారు. అప్పుడు అధ్యక్ష పదవి అజిత్ పవార్‌కు ఇవ్వొచ్చనే టాక్ వినిపించింది.