చూస్తుండగానే గల్లంతయ్యాడు. కాస్త దూరంలో మృతదేహం లభ్యమైంది
Andhra Pradesh Telugu | Suryaa Desk | Published : Fri, May 05, 2023, 10:10 PM
విజయవాడ నగరంలో శుక్రవారం (మే 5) కురిసిన భారీ వర్షం గురునానక్‌ కాలనీలో తీవ్ర విషాదం నింపింది. భారీ వర్షాలకు డ్రైన్ (మురుగు కాల్వ) పొంగి పొర్లింది. అభిరామ్ అనే ఆరేళ్ల బాలుడు ప్రమాదవశాత్తూ ఆ డ్రైనేజీలో పడి కొట్టుకుపోయాడు. అతడి కోసం స్థానికులతో కలిసి పోలీసులు, ఫైర్ సిబ్బంది తీవ్రంగా గాలించారు. బాలుడు జారిపడిన ప్రదేశానికి కాస్త దూరంలో అతడి మృతదేహం లభించింది. బాలుడి మృతదేహాన్ని ఆస్పత్రికి తరలించారు. అల్లారు ముద్దుగా పెంచుకుంటున్న కుమారుడు విగతజీవిగా మారడంతో తల్లిదండ్రులు కుప్పకూలారు. కన్నీరుమున్నీరుగా విలపిస్తున్నారు.
తమ కళ్ల ముందే బాలుడు కాల్వలో పడి, చూస్తుండగానే ప్రవాహంలో కొట్టుకుపోయాడని.. బాలుడిని కాపాడలేకపోయామని ప్రత్యక్ష సాక్షి ఒకరు తెలిపారు. తోటి పిల్లలతో ఆడుకుంటూ అభిరామ్.. మురుగు కాల్వలో పడిపోయాడని చెప్పారు. బాలుడు ప్రమాదానికి గురైన చోట డ్రైనేజీకి పైకప్పు లేదు. దీంతో బాలుడు ఆడుకుంటూ వెళ్లి అందులో పడిపోయాడు. ఘటనకు సంబంధించిన సమాచారం అందిన వెంటనే అక్కడికి చేరుకున్న పోలీసులు.. డీఆర్‌ఎఫ్ సిబ్బందితో కలిసి బాలుడి కోసం గాలింపు చర్యలు చేపట్టారు. డ్రైనేజీలపై పైకప్పు వేయాలని అధికారులను ఎన్నిసార్లు కోరినా పట్టించుకోలేదని స్థానికులు ఆరోపిస్తున్నారు.
|
|