ఏపీలో జోరుగా వానలు కురుస్తున్నాయి,,,,మరో రెండు రోజులు వర్షాలు

ఆంధ్రప్రదేశ్‌లో ఈ ఏడాది వేసవి కాలం విచిత్రంగా వానాకాలాన్ని తలపిస్తోంది. గతవారం నుంచి వానలు కురుస్తూనే ఉన్నాయి. ద్రోణి ప్రభావంతో మరో రెండు రోజుల పాటూ ఈ వర్షాలు ఇలాగే కొనసాగతాయని వాతావరణశాఖ తెలిపింది. అలాగే ఈ నెల 7న ఆగ్నేయ బంగాళాఖాతంలో అల్పపీడనం ఏర్పడనుంది. 8నాటికి వాయుగుండంగా మారే అవకాశం ఉందని అంచనా వేస్తున్నారు. అలా మెల్లిగా బంగాళాఖాతం వైపు కదులుతూ తుఫాన్‌గా మారే ఛాన్స్ ఉందంటున్నారు. ఈ తుఫాన్‌కు మోచాగా నామకరణం చేశారు. ఏపీలో పలుచోట్ల తేలికపాటి నుంచి మోస్తరు వర్షాలు కురుస్తాయంటున్నారు.

ఈ ద్రోణి ప్రభావంతో గుంటూరు, విజయవాడలో వానలు పడతాయని ఏపీ వెదర్ మ్యాన్ తెలిపారు. అలాగే పల్నాడు, ఎన్టీఆర్, కృష్ణ, డాక్టర్ బీఆర్ అంబేద్కర్ కోనసీమ, తూర్పుగోదావరి, నెల్లూరు జిల్లాల్లో తేలికపాటి నుంచి ఓ మోస్తరు వానలు కురుస్తాయంటున్నారు. గుంటూరు, ప్రకాశం, తిరుపతి, ఏలూరు, కాకినాడ, పార్వతీపురం మన్యం, శ్రీకాకుళం, అల్లూరి సీతారామరాజు, అనకాపల్లి, చిత్తూరు జిల్లాలో కూడా తేలికపాటి జల్లులు కురుస్తాయంటున్నారు. అంతేకాదు బంగాళాఖాతంలో ఈ నెల 7న అల్పపీడనం ఏర్పడనుందని.. ఈ ప్రభావం దక్షిణ కోస్తాపై ఉంటుందని చెబుతున్నారు.

ఏపీలో నాలుగు రోజుల నుంచి మోస్తరు నుంచి భారీ వానలు పడుతూనే ఉన్నాయి. ఉమ్మడి గుంటూరు, ఉమ్మడి పశ్చిమ గోదావరి, ఉమ్మడి అనంతపురం, కర్నూలు, ప్రకాశంతో పాటూ మరికొన్ని జిల్లాల్లో జోరున వర్షాలు కురుస్తూనే ఉన్నాయి. ఈ వర్షాలతో రైతులు తీవ్రంగా నష్టపోతున్నారు. ధాన్యం తడిసిపోయి, మిగిలిన పంటలు నీటమునిగి పంట నష్టపోతున్నారు. ఇప్పుడు తుఫాన్ టెన్షన్ కూడా వారిని వెంటాడుతోంది. ఒకవేళ తుఫాన్ ఏపీపై ప్రభావం చూపిస్తే పరిస్థితి ఏంటని ఆందోళనలో ఉన్నారు.

మరోవైపు అకాల వర్షాలతో తడిసిన ధాన్యాన్ని కొనుగోలు చేస్తామంటోంది ప్రభుత్వం. రైతులు ఆందోళన చెందాల్సిన అవసరం లేదని.. మిల్లర్లు, ప్రైవేట్‌ వ్యాపారులను నమ్మి మోసపోవద్దన్నారు. ముందుగా తడిసిన ధాన్యాన్ని ఆఫ్‌లైన్‌లో సేకరించేందుకు ఏర్పాట్లు చేశామన్నారు. ధాన్యాన్ని ఆఫ్‌లైన్‌లో సేకరించి డ్రయర్‌ సౌకర్యం, డ్రయర్‌ ప్లాట్‌ఫారమ్‌ ఉన్న మిల్లులకు తరలిస్తున్నామని తెలిపారు.

అంతేకాదు వర్షాల కారణంగా పంట దెబ్బతిన్న రైతులను ఆదుకునేందుకు ప్రభుత్వం చర్యలు తీసుకుంటోందన్నారు అధికారులు. ఈ నెల 8 వరకు వర్ష సూచన ఉందని.. ఆ తర్వాత వానలు తగ్గుముఖం పడితే పంట నష్టం అంచనాలు, ఆర్బీకేల్లో సోషల్‌ ఆడిట్‌ పూర్తి చేసి రెండు వారాల్లో ప్రభుత్వానికి నివేదిక ఇస్తామన్నారు. ఒకవేళ రైతులకు ఇబ్బందులుంటే వ్యవసాయశాఖ టోల్‌ ఫ్రీ నంబర్‌ 155251కు ఫిర్యాదు చేయాలని సూచించారు.

ఇటు రెండు నెలల క్రితం మార్చిలో కురిసిన అకాల వర్షాలతో పంటలు దెబ్బ తిన్నాయని.. దీనికి సంబంధించి దాదాపు రూ.34.22 కోట్ల పంట నష్ట పరిహారాన్ని రైతులకు ఖరీఫ్‌ సీజన్‌కు ముందుగానే జమ చేస్తామన్నారు అధికారులు. ప్రస్తుతం వర్షాలకు దెబ్బతిన్న పంట నష్టాన్ని అంచనా వేసి ఆ పరిహారాన్ని కూడా ఈ నెలాఖరులోగా అందించేలా చూస్తామన్నారు.