స్వర్ణదేవాలయానికి సమీపంలో వరుస పేలుళ్లు

అమృత్‌సర్‌లోని అర్దరాత్రి స్వర్ణ దేవాలయానికి సమీపంలోని హెరిటేజ్ స్ట్రీట్‌లో పేలుడు సంభవించిన విషయం తెలిసిందే. తాజాగా, సోమవారం కూడా అదే ప్రాంతంలో పేలుడు జరగడం గమనార్హం. శనివారం జరిగిన ప్రమాదంలో ఆరుగురు గాయపడ్డారు. హెరిటేజ్ స్ట్రీట్‌లోని ఓ రెస్టారెంట్‌లో చిమ్నీ పేలుడు వల్ల ప్రమాదం జరిగినట్టు పోలీసులు పేర్కొన్నారు. అయితే, ఈ ఘటనతో స్థానికులు, భక్తులు ఒక్కసారిగా ఉలిక్కిపడ్డారు. ఉగ్రదాడి జరిగిందేమోనని భయాందోళనకు గురయ్యారు. ఈ ఘటనపై సమాచారం అందుకున్న పోలీసులు అక్కడికి చేరుకుని.. పేలుడు ఉగ్రదాడి కాదని నిర్దారించారు. పేలుడుకు గల కారణాలపై దర్యాప్తు చేస్తున్నారు.

తాజాగా, అదే ప్రాంతంలో పేలుడు జరగడంతో కలకలం రేగుతోంది. సీనియర్ పోలీస్ అధికారులు, బాంబు డిస్పోసల్ స్క్యాడ్, ఫోరెన్సిక్ బృందాలు సంఘటనా స్థలానికి చేరుకుని విచారణ చేపట్టాయి. అయితే, పేలుడుకు గల కారణాలపై పోలీసులు మాత్రం నోరు విప్పడం లేదు. సోమవారం ఉదయం 6.30 గంటలకు పేలుడు శబ్దాలు వినిపించినట్టు స్థానికులు చెబుతున్నారు.

పేలుడు జరిగిన చోట కొంత పౌడర్‌ని స్వాధీనం చేసుకుంది. ఈ ఘటనకు సంబంధించి అమృత్‌సర్ పోలీస్ కమిషనర్ నౌనిహాల్ సింగ్ మాట్లాడుతూ.. ఇప్పుడే స్పందించడం తొందరపాటు అవుతుందని పేర్కొన్నారు. ఇక, ఈ పేలుడుతో ఆటోరిక్షాలో ఉన్న ఆరుగురు బాలికలకు అద్దాలు తగిలి స్వల్ప గాయాలైనట్లు స్థానికులు తెలిపారు. ఇక, ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది. గ్రీన్ బెల్ట్, మురుగునీటి పారుదల లైన్లు మొదలైన వాటిలో ఏదైనా అనుమానాస్పద వస్తువులను దాచిపెట్టారా? అనే ఉద్దేశంతో విస్తృతంగా సోదాలు నిర్వహిస్తున్నట్లు వర్గాలు తెలిపాయి. అంతరాయం లేకుండా సెర్చ్ ఆపరేషన్ కోసం పోలీసులు రహదారికి ఒక వైపు కూడా బ్లాక్ చేశారు.

శనివారం నాటి ఘటనకు సంబంధించి సోషల్ మీడియాలో ఓ వీడియో వైరల్ కాగా.. దీనిపై అమృత్‌సర్ పోలీస్ కమిషనర్ స్పష్టత నిచ్చారు. ‘అమృత్‌సర్‌లో పేలుళ్లకు సంబంధించిన వార్త సోషల్ మీడియాలో వైరల్ అవుతోంది.. ప్రస్తుతం పరిస్థితి అదుపులో ఉంది.. ఈ ఘటనకు సంబంధించిన వాస్తవాలను నిర్ధారించడానికి విచారణ కొనసాగుతోంది. భయాందోళన చెందాల్సిన అవసరం లేదు’’ అని ట్విట్టర్‌లో పేర్కొన్నారు. శాంతి భద్రతలకు విఘాతం కలగకుండా చూడాల్సి ఉందని.. ఏదైనా షేర్ చేయడానికి ముందు వాస్తవాన్ని తనిఖీ చేయాలని ఆయన ప్రజలను కోరారు. ఇటీవల ఖలీస్థాన్ వేర్పాటువాది అమృత్‌‌పాల్ సింగ్ అంశం పంజాబ్‌లో కలవరం కలిగించింది. ఈ నేపథ్యంలో పేలుళ్లు జరగడం ప్రాధాన్యత సంతరించుకుంది.