ఓ వ్యక్తి చేసిన పనికి భయాందోళనలో విమాన ప్రయాణికులు

ఇటీవల విమానాల్లో ప్రయాణికుల దురుసుప్రవర్తన హాట్  టాపిక్ గా మారుతోంది. తాజాగా గోవా నుంచి ఢిల్లీకి వెళ్తున్న విమానంలో అనుకోని సంఘటన జరిగింది. సోమవారం గోవా నుంచి ఢిల్లీకి బయల్దేరిన ఏఐ 882 విమానంలో ఓ ప్రయాణికుడు బీభత్సం సృష్టించాడు. ఎయిర్ ఇండియా సిబ్బందితో ఆ ప్రయాణికుడు దురుసుగా ప్రవర్తించాడు. ఈ ఘటన మంగళవారం వెలుగులోకి వచ్చింది. ఈ విషయాన్ని ఎయిర్ ఇండియా అధికార ప్రతినిధి ఒకరు వెల్లడించారు. తొలుత ఎయిర్ ఇండియా సిబ్బందితో వాగ్వాదానికి దిగిన ప్రయాణికుడు.. ఆ తర్వాత దుర్భాషలాడినట్లు విమానయాన సంస్థ యాజమాన్యం తెలిపింది. ఆ తర్వాత ఎయిర్ ఇండియా సిబ్బందిలో ఒకరిపై దాడి చేసినట్లు పేర్కొంది. ఈ ఘటనతో ఒక్కసారిగా విమానంలోని ప్రయాణికులంతా భయాందోళనకు గురయ్యారు.

ఆ ప్రయాణికుడు గోవా నుంచి ఢిల్లీకి వెళ్లే వరకు నానా యాగీ చేసినట్లు ప్రత్యక్ష సాక్ష్యులు వెల్లడించారు. విమానం ఢిల్లీకి చేరిన తర్వాత కూడా ఆ ప్రయాణికుడి ప్రవర్తనలో మార్పు రాలేదని పేర్కొన్నారు. ఢిల్లీ విమానాశ్రయంలో విమానం దిగిన తర్వాత అక్కడ ఉన్న భద్రతా సిబ్బంది.. ప్రయాణికుడిని అదుపులోకి తీసుకున్నట్లు వివరించారు. ఈ ఘటనపై డైరెక్టరేట్ జనరల్ ఆఫ్ సివిల్ ఏవియేషన్ - డీజీసీఏకు నివేదించినట్లు ఎయిర్ ఇండియా సంస్థ తెలిపారు. ప్రయాణికుడి చేష్టలను తీవ్రంగా ఖండిస్తున్నఎయిర్ ఇండియా తెలిపింది. సిబ్బందికి అన్నివిధాలా సాయం అందిస్తామని పేర్కొంది. అయితే ఈ ప్రయాణికుడి వివరాలను మాత్రం ఎయిర్‌ ఇండియా తెలుపలేదు.

ఇటీవల ఢిల్లీ నుంచి లండన్ వెళ్లే విమానంలోనూ ఓ ప్రయాణికుడు ఇలాంటి ఘటనే జరిగింది. ఏప్రిల్‌ 10 న జరిగిన ఈ ఘటనలో ఓ ప్రయాణికుడు ఇద్దరు మహిళా క్యాబిన్‌ సిబ్బందితో అనుచితంగా ప్రవర్తించాడు. ఆ తర్వాత ఎయిర్‌ ఇండియా సదరు వ్యక్తిపై రెండేళ్ల పాటు.. తమ విమానాల్లో ప్రయాణించకుండా నిషేధం విధించింది. క్యాబిన్ క్రూ సూపర్‌వైజర్ ఫిర్యాదు మేరకు పోలీసులు ఆ ప్రయాణికుడిపై కేసు నమోదు చేసినట్లు అధికారులు తెలిపారు. ఆ వ్యక్తిని పంజాబ్‌కు చెందిన జకీరత్‌ సింగ్‌ పడ్డాగా గుర్తించారు.\