ఆడుకుంటూ నీటి గుంటలో పడిపోయిన చిన్నారులు.,,,వెంటనే గుంతలోకి దూకి పిల్లలను కాపాడిన తల్లులు.
Andhra Pradesh Telugu | Suryaa Desk | Published : Wed, May 31, 2023, 07:57 PM
నీటి గుంటలో పడిన తమ పిల్లలను రక్షించి ఇద్దరు తల్లులు దుర్మరణం పాలయ్యారు. హృదయ విదారకరమైన ఈ ఘటన నెల్లూరు నగరంలోని భగత్సింగ్ కాలనీలో బుధవారం (మే 31) చోటు చేసుకుంది. స్థానికులు తెలిపిన వివరాల ప్రకారం.. పెన్నానది రివిట్మెంట్ వాల్ నిర్మాణం కోసం జేసీబీతో గుంతలు తవ్వి వదిలేశారు. ఇటీవల కురిసిన వర్షాలతో ఆ గుంతల్లో నీరు చేరాయి. బుధవారం సాయంత్రం ఆడుకుంటూ అటుగా వెళ్లిన ఇద్దరు చిన్నారులు ప్రమాదవశాత్తూ ఓ గుంతలో పడిపోయారు. అది గమనించిన ఆ ఇద్దరు చిన్నారుల తల్లులు షాహినా, షబీనా వెంటనే గుంత వద్దకు పరుగెత్తుకొచ్చి అందులో దూకారు. చిన్నారులను బయటకుతీసి కాపాడారు కానీ, వారిద్దరూ పైకి రాలేకపోయారు. ఆ సమయంలో వారికి సాయం చేసేందుకు కూడా అటుగా ఎవరూ రాలేదు. దీంతో బురదలో చిక్కుకుపోయి గుంతలోనే ప్రాణాలు విడిచారు.
ఈ ఘటనతో స్థానికంగా తీవ్ర విషాదం అలుముకుంది. కొంత కాలంగా అక్కడ నిర్మాణ పనులు కొనసాగుతున్నాయని.. అయితే, జేసీబీతో గుంతలు తవ్వి వదిలేశారని స్థానికులు ఆరోపిస్తున్నారు. భారీ గుంతల వద్ద ఎలాంటి రక్షణ చర్యలు చేపట్టకపోవడం వల్లే ఈ విషాదం చోటు చేసుకుందని ఆగ్రహం వ్యక్తం చేస్తున్నారు. నిర్మాణ పనుల్లో జాప్యం కూడా ప్రమాదానికి కారణమైందని చెబుతున్నారు. బాధిత కుటుంబాలకు న్యాయం చేయాలని డిమాండ్ చేస్తూ స్థానికులు ఆందోళనకు దిగారు.
|
|