సత్తెనపల్లిలో గెలిచి గిఫ్ట్‌గా ఇస్తా,,,కన్నా లక్ష్మీనారాయ

అధిష్టానం తనకు టికెట్ ఇస్తే చంద్రబాబుకు రిటర్న్ గిఫ్ట్ ఇస్తానని సత్తెనపల్లి టీడీపీ ఇంచార్జ్ కన్నా లక్ష్మీనారాయణ వ్యాఖ్యానించారు. తాను సత్తెనపల్లి నుంచి పోటీ చేయడానికి ఒక కారణం ఉందని, ఎన్నికలు డిక్లేర్ అయ్యాక వెల్లడిస్తానని అన్నారు. 1989లో మంత్రి అంబటి రాంబాబు, తాను ఒకేసారి ఎమ్మెల్యే అయ్యామనే విషయాన్ని గుర్తు చేసుకున్నారు. సత్తెనపల్లి టీడీపీ ఇంచార్జ్‌గా తనను పార్టీ అధిష్టానం నియమించడంపై కన్నా స్పందించారు.

'సత్తెనపల్లి నియోజకవర్గంలో చాలా సమస్యలు ఉన్నాయి. ఈ నియోజకవర్గం నాకు కొత్త కాదు.. ఖచ్చితంగా అభివృద్ధి చేస్తా.. చాలామంది నేతలు అసంతృప్తిగా ఉన్నట్లు తెలిసింది. వారందరినీ కలుపుకుని వెళ్తా. అన్ని సామాజికవర్గాలను కలుపుకుని పనిచేస్తా.. నియోజకవర్గంలో టీడీపీ నుంచి గెలిచి చంద్రబాబుకు గిఫ్ట్ ఇస్తా. నాపై నమ్మకం ఉంచి ఇంచార్జ్‌గా అవకాశం ఇచ్చినందుకు ధన్యవాదాలు' అని కన్నా లక్ష్మీనారాయణ తెలిపారు.

కన్నా లక్ష్మీనారాయణను సత్తెనపల్లి టీడీపీ ఇంచార్జ్‌గా నియమిస్తూ బుధవారం టీడీపీ అధిష్టానం ప్రకటన విడుదల చేసింది. దీంతో వచ్చే ఎన్నికల్లో ఆయనకు సత్తెనపల్లి టికెట్ కన్ఫార్మ్ చేసినట్లయింది. గతంలో పెదకూరపాడు నియోజకవర్గం నుంచి ఎమ్మెల్యేగా కన్నా గెలిచారు. కానీ తన నియోజకవర్గం కాదని సత్తెనపల్లిని కన్నా ఎంచుకోవడం కీలకంగా మారింది. గత కొద్దినెలల క్రితం కన్నా టీడీపీలో చేరగా.. సత్తెనపల్లి నుంచి పోటీ చేస్తారని అప్పటినుంచే వార్తలు వినిపిస్తున్నాయి. అందుకు తగ్గట్లుగా గత కొంతకాలంగా సత్తెనపల్లిపై కన్నా దృష్టి పెట్టారు. సత్తెనపల్లి టీడీపీ టికెట్ కోసం మాజీ స్పీకర్ కోడెల శివప్రసాద్ రావు తనయుడు కోడెల శివరాం, మాజీ ఎమ్మెల్యే వైవీ ఆంజనేయులు ఆశలు పెట్టుకున్నారు.

కానీ ఆ నియోజకవర్గంలో మంత్రి అంబటిని ఓడించాలంటే బలమైన అభ్యర్థిని రంగంలోకి దింపాలని చంద్రబాబు భావించారు. అందులో భాగంగా రాజకీయాల్లో సీనియర్ నేతగా ఉన్న కన్నాను పోటీలోకి దింపినట్లు తెలుస్తోంది. సత్తెనపల్లి నియోజకవర్గంలో కాపు ఓటు బ్యాంక్ ఎక్కువగా ఉంది. కాపు సామాజికవర్గంలో కన్నాకు మంచి పేరుంది. అలాగే మాజీ మంత్రిగా పనిచేసిన అనుభవం కూడా ఆయనకు ఉంది. దీంతో అంబటిని ఓడించాలంటే కన్నానే సరైన అభ్యర్థనే అభిప్రాయానికి చంద్రబాబు వచ్చినట్లు చెబుతున్నారు.

సత్తెనపల్లి నియోజకవర్గంలో జనసేన ఓటర్లు కూడా పెద్ద సంఖ్యలో ఉన్నారు. ఒకవేళ టీడీపీ-జనసేన పొత్తు ఉంటే సత్తెనపల్లి టికెట్ టీడీపీనే తీసుకునే అవకాశముందని కన్నా ఎంట్రీతో తెలుస్తోంది. కాపు ఓటు బ్యాంక్, జనసేన ఓటర్లు కన్నాకు ప్లస్ అవుతాయనే చర్చ నియోజకవర్గంలో జోరుగా జరుగుతోంది