చంద్రబాబు, పవన్ ఏకాభిప్రాయంతో ఉన్నారు... నారా లోకేష్

వచ్చే ఎన్నికల్లో టీడీపీ, జనసేన పొత్తులపై చంద్రబాబు, పవన్ తుది నిర్ణయం తీసుకుంటారని టీడీపీ జాతీయ ప్రధాన కార్యదర్శి నారా లోకేష్ వ్యాఖ్యానించారు. పొత్తులపై ఇప్పటికే పలుమార్లు చర్చ కూడా జరిపారని గుర్తు చేశారు. రాష్ట్రాన్ని కాపాడే విషయంలో చంద్రబాబు, పవన్ ఏకాభిప్రాయంతో ఉన్నారని అన్నారు. ప్రస్తుతం యువగళం పాదయాత్ర వైఎస్సార్ జిల్లాలో జరుగుతుండగా.. ఈ సందర్భంగా లోకేష్ మీడియాతో మాట్లాడారు.

పార్టీ కోసం కష్టపడి జనాల్లో తిరిగే నేతలను టీడీపీ వదిలిపెట్టుకోదని, అలాంటి వారికి టికెట్లు వస్తాయని లోకేష్ క్లారిటీ ఇచ్చారు. కష్టపడి పనిచేసే నియోజకవర్గ ఇంచార్జ్‌లకే వచ్చే ఎన్నికల్లో టికెట్లు వస్తాయని తేల్చిచెప్పారు. ఇటీవల మహానాడులో ప్రకటించిన ఆరు హామీలను ప్రజల్లోకి తీసుకెళ్తామని తెలిపారు. రుణమాఫీ హామీ అసలు ఇవ్వబోమని అన్నారు. టీడీపీ తొలి విడత మేనిఫెస్టోను నేతలు ప్రజల్లోకి విస్తృతంగా తీసుకెళ్లాలని, దాని పనితీరు ఆధారంగానే టికెట్ల కేటాయింపు ఉంటుందన్నారు. తాము అధికారంలోకి వస్తే వైసీపీ ప్రభుత్వంలో అక్రమాలకు పాల్పడిన అధికారులను వదిలిపెట్టమని, వారిపై చట్టపరంగా చర్యలు తీసుకుంటామంటూ వార్నింగ్ ఇచ్చారు.

తాము అధికారంలోకి వచ్చిన తర్వాత చిత్తూరు ఎస్పీ అంతు తేలుస్తామని లోకేష్ హెచ్చరించారు. పాదయాత్రలో భాగంగా చేనేత కార్మికులతో లోకేష్ ముచ్చటించారు. టీడీపీ అధికారంలోకి వచ్చిన తర్వాత చేనేతను దత్తత తీసుకుంటామని హామీ ఇచ్చారు. ప్రభుత్వ భూములను ఆక్రమించుకున్నవారి భరతం పడతామని, వాటిని తిరిగి తీసుకుని పేదలకు పంచి పెడతామని లోకేష్ పేర్కొన్నారు. ఇసుక దందా ద్వారా వైసీపీ నేతలు రూ.కోట్లు దోచుకుంటున్నారని ఆరోపించారు. జగన్ అధికారంలోకి వచ్చిన తర్వాత ఒక్క కంపెనీనైనా కొత్తగా రాష్ట్రానికి తీసుకొచ్చారా? అని లోకేష్ ప్రశ్నించారు.